Fake Certificate Scam: నకిలీ సర్టిఫికేట్ల వ్యవహారంపై ఎమ్మెల్యే రాజాసింగ్ ఫైర్- విదేశీయులకు కూడా ఇచ్చారని ఆరోపణలు!

Fake Certificate Scam: హైదరాబాద్ లో వెలుగు చూసిన నకిలీ సర్టిఫికేట్ల జారీ వ్యవహారంపై ఎమ్మెల్యే రాజాసింగ్ సంచలన వ్యాఖ్యలు చేశారు. ఈ వ్యవహారంపై సీబీఐతో దర్యాప్తు చేయించాలని డిమాండ్ చేశారు. పాతబస్తీ కేంద్రంగా నకిలీ బర్త్ సర్టిఫికెట్స్ జారీ చేశారని, ఈ స్కాంలో ఎంఐఎం పాత్ర కూడా ఉందని ఆరోపించారు. ఆన్ లైన్ లో జీహెచ్ఎంసీ బర్త్ సర్టిఫికేట్ వచ్చేలా సాఫ్ట్ వేర్ రూపొందించింది. అయితే ఈ చర్య ద్వారా వ్యవస్థ చిన్నాభిన్నం అయిందనే విమర్శ ఇప్పుడు వినిపిస్తోంది. బర్త్ తో పాటు డెత్ సర్టిఫికేట్లను ఎడాపెడా జారీ చేశారు. అలాగే నాన్ అవైలబిలిటీ పేరుతో గత మార్చి నెల నుంచి డిసెంబర్ దాకా 31 వేల డెత్ సర్టిఫికేట్లు జారీ చేశారు. ఆ నకిలీ సర్టిఫికేట్ల ఆధారంగానే కొందరికి పాస్ పోర్టులు, వీసాలు కూడా మంజూరు చేశారు. వాటిని వాడుకొని కొంత మంది ఉన్నత ఉద్యోగాలు పొందారు. అంతేకాదు ఫేక్ డెత్ సర్టిఫికేట్ల బీమా బురిడీ జరిగిందని గుర్తించారు. ఈ మొత్తం వ్యవహారంలో కంప్యూటర్ ఆపరేటర్లదే కీలక పాత్రగా నిర్ధారించుకున్న పోలీసులు... అలాగే మీ సేవా సిబ్బందితో కొందరు అధికారులు కుమ్మక్కై పత్రాలు జారీ చేసినట్లు గుర్తించారు. 

గతేడాది డిసెంబర్ లో మొఘల్ పురలోని మూడు మీసేవా సెంటర్లలో టాక్స్ ఫోర్స్ పోలీసులు తనిఖీ చేపట్టారు. వందల కొద్దీ నకిలీ సర్టిఫికేట్లు బయటపడ్డాయి. దీంతో ఉన్నతాధికారులు దృష్టికి ఈ అంశం వెళ్లింది. ఇక పోలీసుల చర్యలతో జీహెచ్ఎంసీ మేల్కొంది. గ్రేటర్ లోని 30 సర్కిళ్లలో ఈ తతంగం జరిగినట్లు గుర్తించి, 27 వేలకు పైగా నకిలీ సర్టిఫికేట్లను రద్దు చేస్తున్నట్లు జీహెచ్ఎంసీ ప్రకటించింది. అంతేకాదు విజిలెన్స్ విచారణకు కూడా ఆదేశించింది.