iPhone SE 2022: యాపిల్ అత్యంత చవకైన 5జీ ఫోన్ వచ్చేసింది - లేటెస్ట్ ప్రాసెసర్‌తో - ధర ఎంతంటే?

టెక్ దిగ్గజం యాపిల్ తన కొత్త ఐఫోన్‌ను లాంచ్ చేసింది. అదే ఐఫోన్ ఎస్ఈ (2022). దీని ధర రూ.43,900 నుంచి ప్రారంభం కానుంది.

ఐఫోన్ ఎస్ఈ (2022) స్మార్ట్ ఫోన్ మనదేశంలో లాంచ్ అయింది. (Image Credits: Apple)

iPhone SE (2022): యాపిల్ (Apple) తన కొత్త ఐఫోన్ ఎస్ఈని ఎట్టకేలకు లాంచ్ చేసింది. అదే ఐఫోన్ ఎస్ఈ (2022). 2020 ఏప్రిల్‌లో లాంచ్ అయిన ఐఫోన్ ఎస్ఈ (2020)కి తర్వాతి వెర్షన్‌గా ఈ ఫోన్ లాంచ్ అయింది. ఇందులో 5జీ కనెక్టివిటీని అందించారు. ఏ15 బయోనిక్ చిప్‌పై (A15 Bionic SoC) ఈ ఫోన్ పనిచేయనుంది. గతంలో లాంచ్ అయిన ఐఫోన్ ఎస్ఈ తరహాలోనే దీని డిజైన్ ఉంది.

ఐఫోన్ ఎస్ఈ (2022) ధర
ఈ ఫోన్ ధరను మనదేశంలో రూ.43,900గా నిర్ణయించారు. ఇది 64 జీబీ వేరియంట్ ధర. ఇందులో 128 జీబీ, 256 జీబీ స్టోరేజ్ వేరియంట్లు కూడా ఉండనున్నాయి. వీటి ధరను ఇంకా కంపెనీ వెల్లడించలేదు. అమెరికాలో ఈ ఫోన్ ధరను 429 డాలర్లుగా (సుమారు రూ.33,000) నిర్ణయించారు. మిడ్‌నైట్, స్టార్‌లైట్, (ప్రొడక్ట్) రెడ్ రంగుల్లో ఈ ఫోన్ కొనుగోలు చేయవచ్చు. దీనికి సంబంధించిన ప్రీ-ఆర్డర్లు మనదేశంలో శుక్రవారం నుంచి ప్రారంభం కానున్నాయి. మార్చి 18వ తేదీ నుంచి సేల్ ప్రారంభం కానుంది.

ఐఫోన్ ఎస్ఈ (2022) స్పెసిఫికేషన్లు
ఐఓఎస్ 15 (iOS 15) ఆపరేటింగ్ సిస్టంపై ఈ ఫోన్ పనిచేయనుంది. ఇందులో 4.7 అంగుళాల రెటీనా హెచ్‌డీ డిస్‌ప్లేను అందించారు. దీని డిస్‌ప్లే చూడటానికి గతంలో లాంచ్ అయిన ఐఫోన్ ఎస్ఈ తరహాలోనే ఉంది. అయితే ఫోన్ ముందువైపు, వెనకవైపు అత్యంత కఠినమైన గ్లాస్‌ను అందించినట్లు యాపిల్ అంటోంది. ఐపోన్ 13, ఐఫోన్ 13 ప్రోల్లో అందించిన గ్లాస్ ప్రొటెక్షన్‌ను యాపిల్ ఇందులో కూడా అందించింది.

ఐఫోన్ 13 సిరీస్‌లో అందించిన ఏ15 బయోనిక్ ప్రాసెసర్‌పై ఈ ఫోన్ పనిచేయనుంది. ఈ చిప్ ద్వారా ఐఫోన్ 8 కంటే 1.8 రెట్లు వేగంగా ఈ ఫోన్ పనిచేస్తుందని కంపెనీ ప్రకటించింది. గతంలో లాంచ్ అయిన ఐఫోన్ ఎస్ఈ తరహాలోనే ఇందులో కూడా వెనకవైపు 12 మెగాపిక్సెల్ కెమెరాను అందించారు. అయితే ఇందులో మెరుగైన విజువల్ ప్రాసెసింగ్‌ను అందించినట్లు కంపెనీ తెలిపింది. వెనకవైపు కెమెరా డీప్ ఫ్యూజన్‌ను కూడా సపోర్ట్ చేయనుంది. ఇది 4కే వీడియో రికార్డింగ్‌ను కూడా సపోర్ట్ చేయనుంది. 60 ఎఫ్‌పీఎస్, స్మార్ట్ హెచ్‌డీఆర్4 వద్ద 4కే వీడియోను రికార్డ్ చేయవచ్చు. 

సెల్ఫీలు, వీడియో కాల్స్ కోసం ముందువైపు ఫేస్‌టైం హెచ్‌డీ కెమెరాను అందించారు. 5జీ, 4జీ వోల్టే, వైఫై 5, బ్లూటూత్ వీ5, జీపీఎస్/ఏ-జీపీఎస్, ఎన్ఎఫ్‌సీ, లైటెనింగ్ పోర్టు ఇందులో ఉండనున్నాయి. యాక్సెలరో మీటర్, యాంబియంట్ లైట్ సెన్సార్, బారోమీటర్, గైరో స్కోప్, ప్రాక్సిమిటీ సెన్సార్లు ఇందులో ఉండనున్నాయి.

ఇందులో టచ్ ఐడీని అందించారు. ఒకసారి పూర్తిగా చార్జ్ చేస్తే రోజంతా చార్జింగ్ వస్తుందని కంపెనీ ప్రకటించింది. ఇది కీ స్టాండర్డ్ బేస్డ్ వైర్‌లెస్ చార్జింగ్‌ను సపోర్ట్ చేయనుంది. ఫాస్ట్ చార్జింగ్ సపోర్ట్ కూడా ఇందులో ఉందని కంపెనీ తెలిపింది.