Women Reservation Bill Reality: సూపర్ మెజార్టీ దిశగా ఎన్డీఏ - మహిళా రిజర్వేషన్లు, డీలిమిటేషన్ సవాల్‌లకు మార్గం సుగమం అయినట్లే!?
TMC Split 2026: లోక్‌సభ, రాజ్యసభల్లో తృణమూల్ ఎంపీల మార్పుతో ఎన్డీఏకు మూడింట రెండు వంతుల మెజార్టీ ఖాయమైంది. 50% డీలిమిటేషన్ ఫార్ములా, ఎస్పీ, డీఎంకేల మద్దతు ఉండే అవకాశాలు ఉన్నాయి.
NDA Majority Parliament: భారత పార్లమెంటరీ రాజకీయాల్లో సరికొత్త సమీకరణాలు ఊపందుకున్నాయి. లోక్‌సభ , రాజ్యసభల్లో తృణమూల్ కాంగ్రెస్ చీలిక వర్గం అధికార నేషనల్ డెమోక్రటిక్ అలయన్స్ వైపు మొగ్గు చూపడం దేశ రాజకీయాలను పూర్తిగా మార్చివేస్తోంది. 2024 సార్వత్రిక ఎన్నికల అనంతరం కేంద్రంలో ఏర్పడిన సంకీర్ణ వాతావరణం నుంచి, ఇప్పుడు అధికార బీజేపీ నేతృత్వంలోని కూటమి ఉభయ సభల్లోనూ మూడింట రెండు వంతుల సూపర్ మెజార్టీ మార్కును అందుకోవడానికి అత్యంత సమీపంలోకి చేరింది. ఈ పరిణామం విపక్ష కూటమి అయిన ఇండియా బ్లాక్‌ను తీవ్రంగా నిర్వీర్యం చేయడమే కాకుండా, రాబోయే కాలంలో మోదీ ప్రభుత్వం తీసుకోబోయే చారిత్రాత్మక రాజ్యాంగ సవరణలకు మార్గాన్ని స్పష్టం చేస్తోంది.
ఎన్డీఏకు భారీగా పెరిగిన మెజార్టీ
ప్రస్తుత లోక్‌సభ సంఖ్యా బలాన్ని పరిశీలిస్తే, మొత్తం 543 స్థానాలకు గానూ ఎన్డీఏ కూటమికి స్పష్టమైన మెజార్టీ సుమారు 292 స్థానాలు ఉంది. అయితే, రాజ్యాంగ సవరణలకు అవసరమైన 2/3 వంతుల మెజార్టీ అంటే 362 మార్కును అందుకోవడం గతంలో సవాల్‌గా ఉండేది. కానీ ఇప్పుడు తృణమూల్ కాంగ్రెస్‌కు చెందిన ఎంపీల మద్దతు లేదా విలీనం ద్వారా ఎన్డీఏ బలం ఒక్కసారిగా పెరిగింది. దీనికి తోడు వైఎస్సార్ కాంగ్రెస్ , బీజూ జనతా దళ్ , శిరోమణి అకాలీదళ్ వంటి తటస్థ పార్టీలు, అవసరమైన వేళల్లో ఇండీ కూటమిలోని కొన్ని కీలక ప్రాంతీయ శక్తులు కూడా మద్దతు పలికే వాతావరణం కనిపిస్తోంది. ఈ పరిణామాలతో లోక్‌సభలో 362 మార్కును దాటడం కేంద్ర ప్రభుత్వానికి ఏమాత్రం కష్టసాధ్యం కాదనేది స్పష్టమవుతోంది.
ఎగువసభలోనూ తిరుగులేని ఎన్డీఏ
మరోవైపు, ఎగువ సభ అయిన రాజ్యసభలోనూ ఇదే విధమైన వ్యూహాత్మక ఆధిక్యత దిశగా అడుగులు పడుతున్నాయి. ప్రస్తుతం 245 స్థానాలు గల రాజ్యసభలో ఎన్డీఏ బలం ఇప్పటికే సుమారు 144 స్థానాల వద్ద సుస్థిరంగా ఉంది. చట్టసభల్లో కీలక బిల్లులు ఆమోదం పొందాలంటే ఎగువ సభలోనూ 2/3 వంతుల మెజార్టీ కనీసం 164 స్థానాలు అవసరం. ఇప్పుడు తృణమూల్ కాంగ్రెస్ రాజ్యసభ సభ్యులు కూడా అధికార కూటమి వైపు అడుగులు వేస్తుండటంతో, నామినేటెడ్ సభ్యులు , ఇతర ప్రాంతీయ పార్టీల పరోక్ష సహకారంతో ఎన్డీఏ అత్యంత సులభంగా 164 మార్కును దాటే అవకాశాలు పుష్కలంగా ఉన్నాయి. ఇది పార్లమెంటు ఉభయ సభలపై మోదీ ప్రభుత్వానికి తిరుగులేని పట్టును కల్పిస్తుంది.
త్వరలోనే మహిళా రిజర్వేషన్, డీలిమిటేషన్ బిల్లు
ఈ సంఖ్యా బలం సాధించడం వెనుక ఉన్న అసలు లక్ష్యం.. దశాబ్దాలుగా పెండింగ్‌లో ఉన్న అత్యంత కీలకమైన భౌగోళిక, రాజకీయ సంస్కరణలను అమలు చేయడమే. అందులో మొదటిది మహిళా రిజర్వేషన్ బిల్లు అమలు. గతంలోనే ఈ బిల్లు ఆమోదం పొందినప్పటికీ, దీని అమలు దేశంలో జరగబోయే తదుపరి జనాభా గణన మరియు నియోజకవర్గాల పునర్విభజన ప్రక్రియతో ముడిపడి ఉంది. రాజ్యాంగసవరణ ఇంతకు ముంచు చేయలేకపోయారు. త్వరలో ఉభయ సభల్లో మళ్లీ పెట్టి రాజ్యాంగ సవరణ చేసి చట్టసభల్లో 33% కోటాను గ్రౌండ్ లెవెల్‌లో త్వరితగతిన అమలు చేయడానికి మోదీ ప్రభుత్వానికి ఉన్న అడ్డంకులన్నీ తొలగించే అవకాశాలు ఉన్నాయి.
అన్నింటికంటే కీలకమైన నియోజకవర్గాల పునర్విభజన. జనాభాను నియంత్రించిన దక్షిణాది రాష్ట్రాలకు అన్యాయం జరుగుతుందనే ఆందోళన ఉంది. దీనిని అధిగమించడానికి కేంద్ర ప్రభుత్వం ప్రతిపాదించిన 50 శాతం డీమిలిటేషన్ ఫార్ములా తెరపైకి వచ్చింది. ఈ '50% సీట్ల పెంపు నమూనా' ప్రకారం లోక్‌సభ స్థానాల సంఖ్య ప్రస్తుత 543 నుండి 816 కి పెరుగుతుంది. దీనివల్ల దక్షిణాది రాష్ట్రాలైన తమిళనాడు , ఆంధ్రప్రదేశ్ , తెలంగాణ , కర్ణాటక , కేరళ స్థానాలు గణనీయంగా పెరుగుతాయి. తద్వారా మొత్తం సభలో దక్షిణాది రాష్ట్రాల వాటా ప్రస్తుతం ఉన్న 24 శాతంగానే స్థిరంగా కొనసాగుతుంది. ఈ శాస్త్రీయ ఫార్ములా కారణంగానే, లోక్‌సభలో ప్రాతినిధ్యం, నిధుల కేటాయింపులో తమ రాష్ట్రాలకు ఎలాంటి నష్టం జరగదని నమ్మకం కుదిరితే.. సమాజ్‌వాదీ పార్టీ, ద్రవిడ మున్నేట్ర కజగం వంటి బలమైన ప్రాంతీయ శక్తులు కూడా ఈ బిల్లుకు అంగీకరించే , మద్దతు ఇచ్చే అవకాశాలు స్పష్టంగా కనిపిస్తున్నాయి.
తృణమూల్ ఎంపీల తాజా రాజకీయ పునర్వ్యవస్థీకరణ అనేది కేవలం ఒక పార్టీ బలం పెరగడం మాత్రమే కాదు; ఇది భారతదేశ భవిష్యత్ రాజకీయ పంథాను మార్చే ఒక చారిత్రక పరిణామం. బలహీనపడిన విపక్షాల నేపథ్యంలో, ఉభయ సభల్లో లభించిన 'సూపర్ మెజార్టీ'తో మోదీ ప్రభుత్వం దేశ సమగ్రత, మహిళా శక్తీకరణ , సమాన రాజకీయ ప్రాతినిధ్యం లక్ష్యంగా ప్రవేశపెట్టబోయే 'డీలిమిటేషన్-2026' , 'మహిళా రిజర్వేషన్ల' స్వప్నం సాకారం కావడం ఇక ఎంతమాత్రం అసాధ్యం కాదు.అది ఎప్పుడన్నది మాత్రమే ప్రశ్న.
టాప్ హెడ్ లైన్స్
ట్రెండింగ్ వార్తలు
