Deepotsav in Ayodhya: అయోధ్యలో దీపోత్సవం.. గిన్నిస్ ప్రపంచ రికార్డ్‌ వెయిటింగ్!

గిన్నిస్ బుక్ రికార్డ్ కోసం అయోధ్య రెడీ అయింది. ఈరోజు సాయంత్రం 12 లక్షల దీపాలతో అయోధ్య మెరిసిపోనుంది.

అయోధ్యలో కనులపండువగా దీపోత్సవం

దీపోత్సవం కోసం అయోధ్య అందంగా ముస్తాబవుతోంది. ఆలయాలు, మార్కెట్లు, ఇళ్లు, వ్యాపార సముదాయాలు ఇలా అన్నింటిని దీపావళి వేళ అంగరంగ వైభవంగా తయారు చేస్తున్నారు. చోటీ దివాళీ సందర్భంగా ఈ రోజు అయోధ్యను దీపాలతో అలంకరించనున్నారు. అయితే ఈసారి 12 లక్షల దీపాలను వెలిగించి ప్రపంచ రికార్డ్ నెలకొల్పాలని యోగి సర్కార్ భావిస్తోంది. 

अवधपुरी प्रभु आवत जानी। भई सकल सोभा कइ खानी।। pic.twitter.com/lAhdkCwsAb

— Yogi Adityanath (@myogiadityanath) November 2, 2021

కనులపండువగా..

ఈ 12 లక్షల దీపాలలో 9 లక్షలు సరయు నది తీరాన ఉన్న రామ్ కీ పైడీ ఘాట్‌లో వెలిగించనున్నారు. మిగిలిన 3 లక్షల దీపాలు అయోధ్యలోని వివిధ మఠాల్లో వెలిగిస్తారు. ఈ కార్యక్రమాన్ని తిలకించడానికి గిన్నిస్ బుక్ ఆఫ్ రికార్డ్స్ బృందం కూడా విచ్చేసింది.

అయితే ఇవన్నీ కనీసం 5 నిమిషాల పాటు వెలగాలి.. అప్పుడే ప్రపంచ రికార్డ్ నెలకొల్పుతుంది. ఈరోజు మధ్యాహ్నం 2 గంటల లోపు యోగి ఆదిత్యనాథ్ అయోధ్య చేరుకుంటారు. సాయంత్రం 5 గంటల 20 నిమిషాలకు ఆయన రామ్ కీ పైడీ ఘాట్‌లో సరయు హారతి ఇస్తారు. అనంతరం 6 గంటల నుంచి దీపోత్సవం జరగనుంది.

ఐదు దీపాలు..

ఈ కార్యక్రమాన్ని చూసేందుకు అయోధ్య ప్రజలు పెద్ద ఎత్తున వచ్చే అవకాశం ఉందని అధికారులు చెబుతున్నారు. సోమవారం ప్రారంభమైన ఈ దీపోత్సవ కార్యక్రమం ఐదురోజుల పాటు సాగనుంది. ఈరోజు కార్యక్రమంలో అయోధ్యలోని ప్రతి గ్రామం నుంచి ఓ ఐదు దీపాలు ఇక్కడ వెలిగిస్తారు. 

భారీ భద్రత.. 

ఈ కార్యక్రమంలో ఎలాంటి అవాంఛనీయ ఘటనలు జరగకుండా యోగి సర్కార్ పటిష్ట భద్రతా ఏర్పాట్లు చేసింది. అయోధ్యలోని ప్రతి గల్లీలో పోలీసులు కాపు కాస్తున్నారు. ఎక్కడికక్కడ బారీకేడ్లను ఏర్పాటు చేశారు. ఈ దీపోత్సవ కార్యక్రమాన్ని 2017 నుంచి చేస్తున్నారు. 2017లో 51 వేల దీపాలతో ఈ కార్యక్రమాన్ని ప్రారంభించారు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి