SugarCane Juice: పరగడుపున ఖాళీ పొట్టతో చెరుకు రసం తాగితే ఎన్నో ఆరోగ్య ప్రయోజనాలు

చెరుకు రసాన్ని పరగడుపున తాగమని చెబుతున్నారు పోషకాహార నిపుణులు.

(Image credit: Pixabay)

వేసవిలో చెరుకు రసం తాగే వారి సంఖ్య అధికంగానే ఉంది. ఇది శరీరానికి చలువ చేస్తుంది, కాబట్టి ఈ చెరుకు రసాన్ని ఎక్కువమంది తాగేందుకు ఇష్టపడుతున్నారు. దీన్ని హిందీలో ‘గన్నే కా జ్యూస్’ అని పిలుస్తారు. ఒక గ్లాసు చెరుకు రసంతో రోజును ప్రారంభిస్తే ఎన్నో రకాల ఆరోగ్యాన్ని ప్రయోజనాలు కలుగుతాయని చెబుతున్నారు. ఎక్కువమంది టీ తోనే తమ రోజును ప్రారంభిస్తారు. బదులుగా రోజూ చెరుకు రసాన్ని తాగి చూడండి. మార్పు మీకే తెలుస్తుంది. 

ఈ తీపి పానకం అవసరమైన పోషకాలతో నిండి ఉంటుంది. ఆయుర్వేదంలో కూడా దీనికి ప్రత్యేక స్థానం ఉంది. శతాబ్దాలుగా ఆయుర్వేద సంప్రదాయ మందుల్లో చెరుకు రసాన్ని వాడుతున్నారు. దీన్ని తాగడం వల్ల ఇంకా ఎన్నో ప్రయోజనాలు ఉన్నాయి.

తక్షణమే శక్తి...
చెరుకు రసం ఒక ఎనర్జీ డ్రింక్. దీనిలో గ్లూకోజ్ అధికంగా ఉంటుంది. అధిక చక్కెర కంటెంట్ కారణంగా ఇది తాగిన వెంటనే శక్తిని అందిస్తుంది. ఖాళీ పొట్టతో తాగడం వల్ల ఈ శక్తి శరీరం అంతటా పాకుతుంది. ఇది మీరు ఆరోగ్యకరంగా రోజును కిక్ స్టార్ట్ చేసేందుకు సహకరిస్తుంది.

వేసవికాలంలో డిహైడ్రేషన్ సమస్య బారిన పడుతూ ఉంటారు. దీని నుంచి తప్పించుకునేందుకు చెరుకు రసాన్ని తాగితే మంచిది. ఇది దాహాన్ని తీర్చే అద్భుతమైన పానీయం. నీటి శాతం సమృద్ధిగా ఉంటుంది. శరీరంలో నుంచి బయటికి పోయిన ద్రవాలను తిరిగి నింపేందుకు సహకరిస్తుంది. శరీరంలోని విష పదార్థాలను, ట్యాక్సీన్లను బయటికి పంపిస్తుంది. 

చెరుకు రసంలో విటమిన్ ఏ, విటమిన్ బి, విటమిన్ సి, క్యాల్షియం, మెగ్నీషియం, పొటాషియం, యాంటీ ఆక్సిడెంట్లు పుష్కలంగా ఉంటాయి.  ఇవన్నీ రోగనిరోధక శక్తిని పెంచడానికి సహకరిస్తాయి. ఎముకలు, దంతాలను బలోపేతం చేస్తాయి. జీర్ణ క్రియను మెరుగుపరుస్తాయి. జీర్ణవ్యవస్థ ఆరోగ్యకరంగా నిర్వహించడంలో సహకరిస్తాయి. మలబద్దకాన్ని అడ్డుకుంటాయి. పేగు కదలికలను చురుకుగా చేసి జీర్ణవ్యవస్థకు సహకరిస్తాయి. కాబట్టి ఖాళీ పొట్టతో చెరుకు రసం తాగితే శరీరం అంతా ఆరోగ్యకరంగా ఉంటుంది. 

చెరుకు రసం చర్మ సౌందర్యానికి ఎంతో మేలు చేస్తుంది. రోజు తాగితే ఇందులో ఉండే యాంటీ ఆక్సిడెంట్లు ప్రకాశవంతమైన చర్మాన్ని అందిస్తాయి. మొటిమలు, మచ్చలు వంటివి రాకుండా అడ్డుకుంటాయి. ఆక్సీకరణ ఒత్తిడిని తగ్గించి అకాల వృద్ధాప్యాన్ని రాకుండా నివారిస్తాయి. 

బరువు తగ్గాలనుకునే వారికి చెరుకు రసం ఎంతో మేలు చేస్తుంది. దీనిలో కొవ్వు తక్కువగా ఉంటుంది. కాబట్టి శరీరంలో కొలెస్ట్రాల్ పేరుకుపోదు. ఖాళీ పొట్టతో దీన్ని తాగినప్పుడు త్వరగా పొట్ట నిండిన భావనని ఇస్తుంది. కాబట్టి ఆ రోజు ఎక్కువగా ఆహారం తినాలన్న కోరిక తగ్గుతుంది. 

గమనిక: పలు అధ్యయనాలు, పరిశోధనలు, హెల్త్ జర్నల్స్ నుంచి సేకరించిన సమాచారాన్ని మీ అవగాహన కోసం ఇక్కడ యథావిధిగా అందించాం. ఈ సమాచారం వైద్యానికి లేదా చికిత్సకు ప్రత్యామ్నాయం కాదు. ఆరోగ్యానికి సంబంధించి.. ఎలాంటి సందేహాలున్నా మీరు తప్పకుండా డాక్టర్‌ను సంప్రదించాలి. ఈ ఆర్టికల్‌లో పేర్కొన్న అంశాలకు ‘ఏబీపీ దేశం’, ‘ఏబీపీ నెట్‌వర్క్’ ఎటువంటి బాధ్యత వహించవని గమనించగలరు.