Sugar: తీపి పదార్థాలు తగ్గించుకోండి, లేకుంటే చర్మంపై ముడతలు రావడం ఖాయం

తీపి పదార్థాలు తినడం వల్ల చర్మ ఆరోగ్యానికి ఎంతో హాని జరుగుతుంది.

(Image credit: Pixabay)

తీపి పదార్థాలు తినడమంటే ఎంతో మందికి ఇష్టం. రకరకాల స్వీట్లు నోరూరిస్తాయి. వాటిని రోజూ తినేసే వారు ఎంతో మంది. అధికంగా స్వీట్లు తినేవారికి ఆరోగ్యంపై ప్రభావం పడుతుంది. అలాగే చర్మ సౌందర్యం కూడా తగ్గుతుంది. చర్మానికి తీపి పదార్థాలు ఎంతో హాని చేస్తాయి. చక్కెరతో చేసిన ఆహారాన్ని అతిగా తినడం వల్ల మొటిమలు త్వరగా వచ్చే అవకాశం ఉంది. ఆహారంలో పండ్లు, తాజా కూరగయాలు, పాలకూర, చేపలు, నట్స్ వంటివి అధికంగా తినాలి. వీటిని తరచూ తింటుంటే చర్మం మెరుస్తూ ఉంటుంది. తీపి కోరికలను చంపుకోవాల్సిన అవసరం ఉంది. పోషకాహార నిపుణులు తీపి పదార్థాలను తక్కువ తినమని సిఫారసు చేస్తున్నారు. స్వీట్లు అధికంగా తినడం వల్ల చర్మంలో ఎలాంటి మార్పులు జరుగుతాయో చెబుతున్నారు.  

మొటిమలు
అధిక మొత్తంలో చక్కెరను తీసుకోవడం వల్ల శరీరంలో ఇన్‌ఫ్లమ్మేషన్ పెరుగుతుంది. ఇది చర్మంపై మొటిమల రూపంలో బయటపడుతుంది. అధిక చక్కెర తీసుకోవడం వల్ల ఇన్సులిన్ స్థాయిలు పెరుగుతూ ఉంటాయి. ఇది అదనపు సెబమ్ ఉత్పత్తికి కారణమవుతుంది. ఈ సెబమ్ రంధ్రాలను మూసేస్తుంది.  దీనివల్ల మొటిమలు కలిగించే బ్యాక్టీరియా పెరుగుదలకు దారితీస్తుంది. ముఖంపై అధికంగా మొటిమలు వచ్చేస్తాయి. 

ముడతలు 
స్వీట్లలో ఉండే చక్కెర గ్లైకేషన్ అనే ప్రక్రియను ప్రోత్సహిస్తుంది. ఇక్కడ చక్కెర అణువులు చర్మంలోని కొల్లాజెన్, ఎలాస్టిన్ ఫైబర్‌లతో కలుస్తాయి. దీని వల్ల ముడతలు వచ్చే అవకాశం ఎక్కువగా ఉంటుంది. ఇది అకాల వృద్ధాప్యానికి కారణమవుతుంది. స్వీట్లు తినడం వల్ల ఇన్సులిన్ స్థాయిలు కూడా పెరుగుతాయి. పెరిగిన ఇన్సులిన్‌ల ద్వారా అధునాతన గ్లైకేషన్ ఎండ్-ప్రొడక్ట్స్ (AGEs) నిర్మాణం పెరుగుతుంది. ఈ AGEలు కొల్లాజెన్, ఎలాస్టిన్ ఫైబర్‌లను దెబ్బతీస్తాయి. దీని చర్మం ముడతలు పెరిగిపోతాయి. 

జిడ్డు
అధిక మొత్తంలో చక్కెరను తీసుకోవడం వల్ల రక్తంలో చక్కెర స్థాయిలు వేగంగా పెరుగుతాయి. ఇది ఇన్సులిన్ ఉత్పత్తిలో పెరుగుదలకు దారితీస్తుంది. పెరిగిన ఇన్సులిన్ స్థాయిలు సేబాషియస్ గ్రంధులను మరింతగా సెబమ్ ఉత్పత్తి చేసేలా ప్రేరేపిస్తాయి. ఈ అదనపు సెబమ్ వల్ల  చర్మం జిడ్డుగా మారుతుంది. చర్మ రంధ్రాలు మూసుకుపోతాయి. దీనివల్ల చర్మం మరింత జిడ్డుగా కనిపిస్తుంది. చర్మం నిస్తేజంగా మారుతుంది.

పంచదార నిండిన పదార్థాలు తినడం వల్ల శరీరానికి ఒరిగే ఆరోగ్య ప్రయోజనాలు ఏవీ లేవు. కాబట్టి వారానికో ఒక స్వీటుతో సరిపెట్టుకోవాలి. పంచదారతో చేసే స్వీట్లు కన్నా బెల్లంతో చేసిన పదార్థాలు తింటే ఎంతో మేలు. 

గమనిక: పలు అధ్యయనాలు, పరిశోధనలు, హెల్త్ జర్నల్స్ నుంచి సేకరించిన సమాచారాన్ని మీ అవగాహన కోసం ఇక్కడ యథావిధిగా అందించాం. ఈ సమాచారం వైద్యానికి లేదా చికిత్సకు ప్రత్యామ్నాయం కాదు. ఆరోగ్యానికి సంబంధించి.. ఎలాంటి సందేహాలున్నా మీరు తప్పకుండా డాక్టర్‌ను సంప్రదించాలి. ఈ ఆర్టికల్‌లో పేర్కొన్న అంశాలకు ‘ఏబీపీ దేశం’, ‘ఏబీపీ నెట్‌వర్క్’ ఎటువంటి బాధ్యత వహించవని గమనించగలరు.