Diet for Hypothyroidism : థైరాయిడ్తో ఇబ్బంది పడుతున్నారా? వైద్యులు సూచిస్తోన్న తినాల్సిన, తినకూడని ఫుడ్స్ లిస్ట్ ఇదే
Thyroid Friendly Foods : థైరాయిడ్ సమస్యలు ఉన్నవారు కొన్ని ఫుడ్స్ జోలికి వెళ్లకూడదని.. అలాగే కొన్ని లిమిటెడ్గా తీసుకోవాలని సూచిస్తున్నారు నిపుణులు. అవేంటి.. వాటివల్ల ఎలాంటి ఎఫెక్ట్ ఉంటుందో చూసేద్దాం.
- థైరాయిడ్ నియంత్రణకు సమతుల్య, యాంటీ ఇన్ఫ్లమేటరీ ఆహారం ముఖ్యం.
- అయోడిన్, సెలీనియం థైరాయిడ్ హార్మోన్ ఉత్పత్తికి చాలా అవసరం.
- ప్రాసెస్ చేసిన ఆహారాలు, అధిక చక్కెర థైరాయిడ్ ఆరోగ్యాన్ని ప్రతికూలంగా ప్రభావితం చేస్తాయి.
- మందులతో పాటు పోషకాహారం, వ్యాయామం, ఒత్తిడి తగ్గింపు కీలకం.
Best Foods to Eat and Avoid For Thyroid : ప్రస్తుతం చాలామందిని వేధిస్తున్న ఆరోగ్య సమస్యల్లో థైరాయిడ్ ఒకటి. ముఖ్యంగా హైపోథైరాయిడిజం సమస్యతో బాధపడేవారి సంఖ్య రోజురోజుకూ పెరుగుతోంది. అయితే కేవలం మందులు మాత్రమే కాకుండా.. సరైన ఆహారపు అలవాట్లు కూడా థైరాయిడ్ నియంత్రణలో కీలక పాత్ర పోషిస్తాయని నిపుణులు చెప్తున్నారు. సరైన డైట్ పాటిస్తే హార్మోన్ల సమతుల్యత మెరుగుపడి.. శరీరంలో వాపు, అలసట వంటి సమస్యలు తగ్గే అవకాశం ఉందంటున్నారు.
వైద్యుల సూచనలు
యశోద హాస్పిటల్స్కు చెందిన చీఫ్ డైటీషియన్ డాక్టర్ సుజాత స్టీఫెన్ ఆర్డీ ప్రకారం.. థైరాయిడ్ సమస్యలున్నవారు సమతుల్యమైన, యాంటీ ఇన్ఫ్లమేటరీ డైట్ తీసుకోవడం చాలా ముఖ్యం. ముఖ్యంగా తాజా పండ్లు, కూరగాయలు, సంపూర్ణ ధాన్యాలు, ప్రోటీన్ అధికంగా ఉండే ఆహారం, నట్స్, విత్తనాలు, ఆరోగ్యకరమైన కొవ్వులు ఉండే ఆహారం తీసుకోవడం మంచిదని చెబుతున్నారు. మెడిటరేనియన్ డైట్ కూడా హైపోథైరాయిడిజం ఉన్నవారికి ఉపయోగకరంగా ఉంటుందని సూచిస్తున్నారు.
అయోడిన్ మంచిదా? కాదా?
థైరాయిడ్ హార్మోన్ల ఉత్పత్తికి అయోడిన్ ఎంతో అవసరం. అయోడైజ్డ్ ఉప్పు, పాల పదార్థాలు, గుడ్లు, సీఫుడ్, సీవీడ్ వంటి వాటిలో అయోడిన్ సమృద్ధిగా ఉంటుంది. అయితే డాక్టర్ సలహా లేకుండా అయోడిన్ సప్లిమెంట్స్ తీసుకోవద్దని నిపుణులు హెచ్చరిస్తున్నారు. ఎందుకంటే అధికంగా అయోడిన్ తీసుకోవడం వల్ల హషిమోటోస్ థైరాయిడిటిస్ వంటి ఆటో ఇమ్యూన్ థైరాయిడ్ సమస్యలు మరింత పెరిగే ప్రమాదం ఉందంటున్నారు.
థైరాయిడ్ సెలీనియం లింక్..
థైరాయిడ్ ఆరోగ్యానికి సెలీనియం కూడా చాలా ముఖ్యమని చెబుతున్నారు. ఇది థైరాయిడ్ హార్మోన్ల మెటబాలిజాన్ని మెరుగుపరచడంలో సహాయపడటమే కాకుండా.. థైరాయిడ్ గ్రంథిని ఆక్సిడేటివ్ డ్యామేజ్ నుంచి రక్షిస్తుంది. బ్రెజిల్ నట్స్, ట్యూనా చేపలు, సార్డిన్స్, గుడ్లు, పప్పులు, ఓట్స్ వంటి వాటిలో సెలీనియం లభిస్తుంది.
మల్టీ విటమిన్స్..
జింక్, ఐరన్, మెగ్నీషియం, విటమిన్ డి, విటమిన్ బి12 లోపాలు కూడా హైపోథైరాయిడిజంతో సంబంధం కలిగి ఉంటాయని నిపుణులు చెబుతున్నారు. వీటి లోపం వల్ల అలసట, బలహీనత, డిప్రెషన్, మెటబాలిజం మందగించడం వంటి సమస్యలు మరింత తీవ్రమయ్యే అవకాశం ఉందని డాక్టర్ సుజాత స్టీఫెన్ తెలిపారు. కాబట్టి వైద్యుల సూచనల మేరకు ఫుడ్స్, సప్లిమెంట్స్ రూపంలో వీటిని తీసుకోవాలని సూచిస్తున్నారు.
తినకూడని ఫుడ్స్ లిస్ట్
థైరాయిడ్ సమస్యలు ఉన్నవారు అల్ట్రా ప్రాసెస్డ్ ఫుడ్స్, అధిక చక్కెర, ప్యాకెట్ స్నాక్స్ వంటి వాటిని తగ్గించాలని సూచిస్తున్నారు. ఇవి శరీరంలో ఇన్ఫ్లమేషన్, ఆక్సిడేటివ్ స్ట్రెస్ పెంచే ప్రమాదం ఉందంటున్నారు. బ్రోకోలీ, క్యాబేజీ, కాలీఫ్లవర్ వంటి క్రూసిఫెరస్ కూరగాయలను మితంగా తీసుకోవచ్చని చెప్తున్నారు. అయితే వాటిని పచ్చిగా తింటే.. కొందరిలో థైరాయిడ్ హార్మోన్ ఉత్పత్తిపై ప్రభావం పడే అవకాశం ఉందని హెచ్చరిస్తున్నారు.
మెడిసన్స్ విషయంలో తీసుకోవాల్సిన జాగ్రత్తలు
థైరాయిడ్ మందులు తీసుకునేవారు ఐరన్, కాల్షియం సప్లిమెంట్స్ విషయంలో జాగ్రత్తగా ఉండాలని నిపుణులు సూచిస్తున్నారు. ఎందుకంటే ఇవి థైరాయిడ్ మందుల శోషణను అడ్డుకునే అవకాశం ఉంటుంది. కాబట్టి న్యూట్రిషనిస్ట్ లేదా వైద్యుల సలహాతోనే వాటిని తీసుకోవాలని చెబుతున్నారు.
అలాగే మందులతో పాటు పోషకాహారం, వ్యాయామం, ఒత్తిడిని తగ్గించుకోవడం, తగినంత నిద్రపోవడం వంటి మంచి అలవాట్లు థైరాయిడ్ ఆరోగ్యాన్ని మెరుగుపరచడంలో కీలక పాత్ర పోషిస్తాయని నిపుణులు సూచిస్తున్నారు.
థైరాయిడ్ రిలేటడ్ టిప్స్ కోసం ఈ లింక్ క్లిక్ చేయండి.
గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.
Before You Go
Simple Yoga for Body Fat | చెడు కొవ్వును సింపుల్ యోగాసనాలతో దూరం చేయండి
టాప్ హెడ్ లైన్స్
ట్రెండింగ్ వార్తలు
