Nani: సూపర్ స్టార్ రజినీకాంత్.. నానికి ఛాన్స్ ఇస్తారా..?

నాని తన అభిమాన నటుడు రజినీకాంత్ గురించి మాట్లాడారు.

సూపర్ స్టార్ రజినీకాంత్.. నానికి ఛాన్స్ ఇస్తారా..?

నేచురల్ స్టార్ డైరెక్టర్ అవుదామని ఇండస్ట్రీకి వచ్చారు. కానీ ఊహించని విధంగా హీరో అయిపోయారు. దీంతో నటుడిగానే కెరీర్ కంటిన్యూ చేస్తున్నారు. కొన్నాళ్లక్రితమే ఆయన సొంతంగా ప్రొడక్షన్ హౌస్ మొదలుపెట్టి సినిమాలను నిర్మిస్తున్నారు. ఇదిలా ఉండగా.. ఇప్పుడు డైరెక్టర్ గా కూడా సినిమాలు చేయాలనుకుంటున్నారు నాని. ఈ విషయాన్ని ఆయనే స్వయంగా చెప్పారు. సూపర్ స్టార్ రజినీకాంత్ గనుక ఛాన్స్ ఇస్తే.. రేపే సినిమాను అనౌన్స్ చేస్తానంటూ చాలా ఎగ్జైటింగ్ గా చెప్పుకొచ్చారు. 

నాని నటించిన 'శ్యామ్ సింగరాయ్' సినిమా విడుదలకు సిద్ధమవుతోంది. దీన్ని తెలుగుతో పాటు తమిళ, మలయాళ, కన్నడ భాషల్లో విడుదల చేస్తున్నారు. దీంతో చిత్రబృందం పలు ప్రాంతాలకు వెళ్తూ.. సినిమాను బాగా ప్రమోట్ చేస్తున్నారు. ఇదే సమయంలో నాని తన అభిమాన నటుడు రజినీకాంత్ గురించి మాట్లాడారు. రజిని సర్ గనుక డేట్స్ ఇస్తే.. రేపే సినిమాను అనౌన్స్ చేస్తానని.. ఆయన్ని డైరెక్ట్ చేయాలనేది తన కోరిక అని చెప్పుకొచ్చారు నాని. 

ఆయన స్టయిల్, స్వాగ్ మిస్ అవ్వకుండా సినిమా తీస్తానని అన్నారు. తన దృష్టిలో 'రోబో' సినిమా రజినీ సర్ సినిమా కాదని.. ఆయన సినిమాల్లో ఫ్యాన్స్ కి నచ్చే అన్ని ఎలిమెంట్స్ ఉండాలని చెప్పారు. రజినీకాంత్ నటించిన 'నరసింహ' సినిమా తనకు బాగా ఇష్టమని.. తనకు ఛాన్స్ వస్తే.. ఆ రేంజ్ సినిమా తీస్తానని చెప్పుకొచ్చారు. మరి రజినీకాంత్.. నాని లాంటి హీరోకి డైరెక్షన్ ఛాన్స్ ఇస్తారేమో చూడాలి. 

ఇక 'శ్యామ్ సింగరాయ్' సినిమాలో సాయిపల్లవి, మడోనా సెబాస్టియన్, కృతిశెట్టి హీరోయిన్లుగా నటించారు. రాహుల్ సాంకృత్యాన్ డైరెక్ట్ చేస్తోన్న ఈ సినిమా డిసెంబర్ 24న ప్రేక్షకుల ముందుకు రానుంది. ఇటీవల విడుదలైన ఈ సినిమా ట్రైలర్ ప్రేక్షకులను ఆకట్టుకుంది. దీంతో సినిమాపై అంచనాలు పెరిగాయి. 

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి