HPV Vaccine India: దేశవ్యాప్తంగా ఉచిత హెచ్‌పీవీ వ్యాక్సినేషన్ ప్రారంభం- తల్లిదండ్రులు తీసుకోవాల్సిన జాగ్రత్తలు ఇవే!

HPV Vaccine India: ఈ కార్యక్రమాన్ని జాతీయ స్థాయిలో ప్రధానమంత్రి నరేంద్ర మోదీ రాజస్థాన్‌లో ప్రారంభించగా, తెలుగు రాష్ట్రాల్లో ఇది పండుగలా మొదలైంది. 

దేశవ్యాప్తంగా ఉచిత హెచ్‌పీవీ వ్యాక్సినేషన్ ప్రారంభం- తల్లిదండ్రులు తీసుకోవాల్సిన జాగ్రత్తలు ఇవే!

Source : X.com

Show Quick Read

Key points generated by AI, verified by newsroom

• దేశవ్యాప్తంగా గర్భాశయ ముఖద్వార క్యాన్సర్ నివారణకు హెచ్‌పీవీ వ్యాక్సినేషన్ ప్రారంభమైంది.
• ఆంధ్రప్రదేశ్, తెలంగాణలో సీఎంలు, మంత్రుల చేతుల మీదుగా టీకా కార్యక్రమం మొదలైంది.
• 9-14 ఏళ్ల బాలికలకు ఉచితంగా గార్డాసిల్-4 వ్యాక్సిన్ అందిస్తున్నారు.
• తల్లిదండ్రులు పిల్లలకు భోజనం తినిపించి, అరగంట పర్యవేక్షణలో ఉంచాలి.

HPV Vaccine India: మన దేశంలో మహిళల ఆరోగ్యంపై కేంద్ర రాష్ట్ర ప్రభుత్వాలు ఒక చారిత్రాత్మకమైన ముందడుగు వేశాయి. ముఖ్యంగా మహిళల్లో ప్రాణాంతకంగా మారుతున్న గర్భాశయ ముఖద్వార క్యాన్సర్‌ను బాల్య దశలోనే అడ్డుకోవడానికి హెచ్‌పీవీ వ్యాక్సినేన్ అనే బృహత్తర కార్యక్రమాన్ని దేశవ్యాప్తంగా ప్రారంభించాయి. ఈ టీకా కార్యక్రమం మన ఇంటి ఆడ బిడ్డలకు భవిష్యత్‌కు ఒక గొప్ప భరోసా అని చెప్పవచ్చు. 

ఈ కార్యక్రమాన్ని జాతీయ స్థాయిలో ప్రధానమంత్రి నరేంద్ర మోదీ రాజస్థాన్‌లో ప్రారంభించగా, తెలుగు రాష్ట్రాల్లో ఇది పండుగలా మొదలైంది. 

ఆంధ్రప్రదేశ్‌లో విజయనగరం జిల్లా చీపురుపల్లిలో ముఖ్యమంత్రి చంద్రబాబు నాయుడు స్వయంగా ఈ వ్యాక్సినేషన్ ప్రారంభించారు. ఈ కార్యక్రమంలో ఆరోగ్య శాఖ మంత్రి సత్యకుమార్ కూడా పాల్గొన్నారు. ఈ సందర్భంగా ముఖ్యమంత్రి చంద్రబాబు మాట్లాడుతూ... ప్రతీ బాలికకు హెచ్‌పీవీ వ్యాక్ిన్‌ వేయించాల్సిన బాధ్యత తల్లిదండ్రులపై ఉందని అన్నారు.  ఆరోగ్యం అనేది కేవలం మందుల వల్ల వచ్చేది కాదని, అది ఆనందాన్ని, ఆదాయాన్ని ఇస్తుందని చెప్పారు. మారుతున్న ఆహారపు అలవాట్ల వల్ల క్యాన్సర్‌ ముప్పు పెరుగుతోంది, అందుకే ముందస్తు జాగ్రత్త అవసరం అన్నారు. ప్రజల ఆరోగ్యం కోసం బడ్జెట్‌లో 19వేల కోట్లు ఖర్చు చేస్తున్నట్టు తెలిపారు. ఈ వ్యాక్సిన్లు పాడవకుండా ఉండటానికి రాష్ట్ర వ్యాప్తంగా కోల్డ్ చైన్ పాయింట్లు కూడా ఏర్పాటు చేశామన్నారు. 

హైదరాబాద్‌లోని కింగ్ కోఠి జిల్లా ఆసుపత్రిలో రాష్ట్ర వైద్యారోగ్య శాఖ మంత్రి దామోదర రాజనర్సింహ  కార్యక్రమానికి శ్రీకారం చుట్టారు. మూడు నెలల ప్రత్యేక డ్రైవ్ నిర్వహిస్తున్నట్టు మంత్రి తెలిపారు. రాష్ట్రవ్యాప్తంగా 3.50 లక్షల మందికి టీకా వేస్తామని వివరించారు. మొదటి నెలలో అన్ని ప్రభుత్వ జనరల్ ఆసుపత్రులు, ఏరియా ఆసుపత్రులు,సామాజిక ఆరోగ్య కేంద్రాల్లో టీకాలు అందుబాటులో ఉంటాయి. ఆ తర్వాత నుంచి అన్ని ప్రాథమిక ఆరోగ్య కేంద్రాల్లో కూడా లభిస్తాయి. ఇది ఒకే డోసు ఎడమ చేతికి వేస్తారు. టీకా వేసిన తర్వాత గుర్తుగా వేలికి మార్క్ పెడతారు. యూ-విన్ పోర్టల్‌లో పేరు నమోదు చేసుకోవాలి. ఆన్‌లైన్‌ కుదరని వారు నేరుగా సెంటర్‌కు వెళ్లి కూడా రిజిస్ట్రేషన్ చేయించుకోవచ్చు. 

గర్భాశయ ముఖద్వార క్యాన్సర్ అనేది మహిళలను ఎక్కువగా వేధించే సమస్య. ఈ వ్యాక్సిన్‌ తీసుకోవడం వల్ల ఆ క్యాన్సర్‌ రాకుండా జీవితాంతం రక్షణ లభిస్తుంది. ప్రస్తుతం 9నుంచి  14 ఏళ్ల లోపు ఉన్న బాలికలకు ఈ టీకాను ప్రభుత్వం అందిస్తోంది. ఈ వయసులో టీకా ఇవ్వడం వల్ల మంచి ఫలితాలు ఉంటాయని వైద్య నిపుణులు చెబుతున్నారు. బయట ప్రైవేటు ఆసుపత్రుల్లో వేల రూపాయల ఖరీదు చేసే ఈ గార్డాసిల్-4 వ్యాక్సిన్‌ను ప్రభుత్వం ఇప్పుడు ఉచితంగా అందిస్తోంది. 

తల్లిదండ్రులు పాటించాల్సిన నియమాలు 

ప్రభుత్వం కొన్ని ముఖ్యమైన గైడ్‌లైన్స్‌ను విడుదల చేసింది. వాటిని తల్లిదండ్రులు కచ్చితంగా పాటించాలని సూచించింది. టీకా వేయించుకునే పిల్లలు కచ్చితంగా టిఫిన్ లేదా భోజనం చేసి రావాలని అన్నారు. ఖాళీ కడుపుతో రావద్దని సూచించారు. టీకా వేసుకున్న ఒక అరగంట పాటు ఆసుపత్రిలోనే వైద్యుల పర్యవేక్షణలో ఉండాలి. టీకా వేసిన చోట కొంచెం నొప్పి ఉంటుందని, జ్వరం కూడా రావచ్చని చెప్పారు. అలర్జీలు ఉన్నా, అనారోగ్యంతో ఉన్నా సరే టీకా వేయించుకోవద్దని సూచిస్తున్నారు. 

మరిన్ని చదవండి

HPV వ్యాక్సిన్ ఎవరికి అవసరం? మగవారు కూడా వేసుకోవచ్చా? అది ఎలా పని చేస్తుంది? 

రూ. 10 HPV వ్యాక్సిన్ ఉచితంగా నేటి నుంచి పంపిణీ! వ్యాక్సినేషన్‌కు 14 ఏళ్ల బాలికలకు అవసరమయ్యే పత్రాలివే!