Chiranjeevi: ప్రజెంట్ 'గాడ్ ఫాదర్'... 15 నుంచి 'భోళా శంకర్'... మెగాస్టార్ స్పీడు మామూలుగా లేదుగా!

ఇటు 'గాడ్ ఫాదర్'... అటు 'భోళా శంకర్'... రెండు సినిమాలను సెట్స్ మీదకు తీసుకు వెళుతున్నారు మెగాస్టార్ చిరంజీవి. నెలలో సగం రోజులు ఓ సినిమా షూటింగ్ చేసి... ఆ తర్వాత మరో సినిమా షూటింగ్ స్టార్ట్ చేస్తారట!

చిరంజీవి

మెగాస్టార్ చిరంజీవి ఇప్పుడు ఏం చేస్తున్నారు? 'గాడ్ ఫాదర్' సినిమా షూటింగులో బిజీగా ఉన్నారు. సోమవారం సినిమా లేటెస్ట్ షెడ్యూల్ మొదలైంది. మలయాళ హిట్ 'లూసిఫర్'కు రీమేక్ ఇది. పొలిటికల్ యాక్షన్ థ్రిల్లర్. ఈ సినిమాకు మోహన్ రాజా దర్శకత్వం వహిస్తున్నారు. రెండు వారాల పాటు హైద‌రాబాద్‌లో చిరంజీవి సహా ఇతర ప్రధాన తారాగణం మీద కీలక సన్నివేశాలు తెరకెక్కించనున్నారు. ఆ తర్వాత నుంచి 'భోళా శంకర్' సెట్స్ మీదకు చిరంజీవి వెళ్లనున్నారు.

అవును... చిరంజీవి రెండు సినిమాలను సెట్స్ మీదకు తీసుకు వెళుతున్నారు. ఓ సినిమా తర్వాత మరో సినిమా అని కాకుండా... ఓ సినిమా కొంత షూటింగ్ చేసి, ఆ తర్వాత  షెడ్యూల్ గ్యాప్ లో మరో సినిమా షూటింగ్ మొదలు పెట్టాలని ఆయన డిసైడ్ అయ్యారు. తమిళ హిట్ 'వేదాళం'కు 'భోళా శంకర్' రీమేక్. దీనికి మెహర్ రమేష్ దర్శకత్వం వహిస్తున్నారు. అందులో చిరంజీవి చెల్లెలుగా కీర్తీ సురేష్, చిరంజీవికి జోడీగా తమన్నా భాటియా కనిపించనున్నారు.

ఇటు 'గాడ్ ఫాదర్'... అటు 'భోళా శంకర్'... రెండూ రీమేక్ సినిమాలే. తెలుగు ప్రజల అభిరుచికి తగ్గట్టు కథల్లో కొన్ని మార్పులు చేశారు. ఆల్రెడీ బౌండ్ స్క్రిప్ట్స్ రెడీగా ఉన్నాయి. షెడ్యూల్స్ పక్కాగా ప్లాన్ చేస్తే... ఓ నెలలో కొన్ని రోజులు ఓ సినిమా, ఆ తర్వాత మరికొన్ని రోజులు మరో సినిమా షూటింగ్ చేసేలా ప్లాన్ చేశారు. ఈ రెండిటికి ముందు చిరంజీవి 'ఆచార్య' సినిమా చేశారు. అది వచ్చే ఏడాది ఫిబ్రవరి 4న ప్రేక్షకుల ముందుకు రానుంది.

'ఆచార్య'లో రామ్ చరణ్ కీలక పాత్ర చేయగా... ఆయనకు జోడీగా పూజా హెగ్డే, చిరంజీవికి జోడీగా కాజల్ అగర్వాల్ నటించారు. కొరటాల శివ దర్శకత్వం వహించారు. మణిశర్మ  సంగీతం అందించారు. సినిమాలో 'నీలాంబరి' పాటను ఈ నెల 5న విడుదల చేయనున్నారు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి