Brahmamudi February 11th: సీన్ రివర్స్- ప్లాన్ సక్సెస్, రాహుల్ కి పడిపోయిన స్వప్న- అప్పు తలకి గాయం

దుగ్గిరాల కుటుంబానికి తన కూతుర్ని కోడల్ని చేయాలని కనకం ప్లాన్స్ వేస్తోంది. ఈరోజు ఎపిసోడ్లో ఏం జరిగిందంటే..

Image Credit: Disney Plus Hotstar/ Star Maa

రాజ్ స్వప్న కోసం బొకే తీసుకుని కారు స్టార్ట్ చేయబోతుంటే అది స్టార్ట్ అవదు. వెంటనే చాటుగా గమనించిన ఒక వ్యక్తి రాహుల్ కి ఫోన్ చేసి మీరు చెప్పినట్టే కారు స్టార్ట్ కాకుండా చేశానని అంటాడు. రాజ్ ఆటో ఎక్కినా ఏం చేసినా చెప్పమని అతనికి చెప్తాడు. స్వప్న కేఫ్ కి కొంచెం దూరంలో ఆటో దిగి అప్పుని వెళ్లిపొమ్మని చెప్తుంది. దీంతో అప్పు వెళ్ళిపోతుంది. తను రావడం అక్కడే కారులో ఉన్న రాహుల్ చూసి ఇంత రిచ్ అమ్మాయి కారులో కాకుండా కాలి నడకన వస్తుందేంటి అని రౌడీలకి ఫోన్ చేసి చెప్పినట్టు చేయమని చెప్తాడు. ఆ రౌడీలు స్వప్న చెయ్యి పట్టుకుని అల్లరి చేయబోతారు. కావాలంటే బ్యాగ్ తీసుకుని వెళ్లిపొమ్మని బతిమలాడుతుంది. అదంతా చూస్తూనే ఉన్న రాహుల్ హీరో ఎంట్రీకి టైమ్ అయ్యింది, ఇప్పుడు వాళ్ళతో ఫైట్ చేసి హీరో అయిపోదామని అనుకుంటాడు. కానీ అప్పు ఆ రౌడీలతో ఫైటింగ్ కి దిగుతుంది.

రౌడీలను అప్పు చితక్కొడుతుంది. వీడు ఎవడు మధ్యలో హీరోయిజాన్ని చూపిస్తున్నాడని వెంటనే రౌడీకి ఫోన్ చేసి ఆ టోపీ గాడిని సైడ్ చేయమని రాహుల్ ఫోన్ చేసి చెప్తాడు. దీంతో అతను అప్పుని కొట్టుకుంటూ పక్కకి వెళ్లిపోగానే మిగతా రౌడీలు ఇప్పుడు నిన్ను ఎవరు కాపాడతారని అనగానే రాహుల్ హీరోలాగా ఎంట్రీ ఇచ్చి వాళ్ళతో ఫైట్ చేస్తాడు. అది చూసి స్వప్న తనకి పడిపోతుంది. రౌడీ అప్పుని తల మీద కొట్టేసి వెళ్ళిపోతాడు. స్వప్న వెయిట్ చేస్తూ ఉంటుందని అనుకుని రాజ్ క్యాబ్ బుక్ చేసుకుని వెళ్ళిపోతాడు. అక్కడే ఉన్న వ్యక్తి రాహుల్ కి ఫోన్ చేసి విషయం చెప్తాడు. అప్పు గురించి కావ్యకి ఒకతను ఫోన్ చేసి చెప్తాడు. దీంతో కావ్య కంగారుగా వెళ్ళిపోతుంది. రాహుల్, స్వప్న ఇద్దరూ కేఫ్ లో కూర్చుని మాట్లాడుకుంటూ ఉంటారు.

మీ అందానికి ఎప్పుడో ఫ్యాన్ అయిపోయానని రాహుల్ స్వప్నకి బిస్కెట్లు వేస్తూ ఉంటాడు. ఆ కేఫ్ లో వాలెంటైన్స్ డే సందర్భంగా కపుల్స్ కి చిన్న కాంప్లిమెంట్ అని చెప్పి ఐస్ క్రీమ్ ఇస్తాడు. అతను రాహుల్, స్వప్నని లవర్స్ అనుకుని మాట్లాడతాడు. ప్రపంచంలోకెల్లా అత్యంత అద్భుతమైన అమ్మాయి కనిపించినప్పుడు గిఫ్ట్ ఇవ్వాలని జేబులో పెట్టుకుని తిరుగుతున్నా అని రాజ్ చేయించి డైమండ్ రింగ్ స్వప్నకి ఇస్తాడు. అది చూసి స్వప్న ఆశ్చర్యపోతూ సంతోషపడుతుంది. ఈ విషయం రాజ్ కి చెప్పొద్దని అంటాడు. తనే డైమండ్ రింగ్ ఇస్తే రాజ్ ఇంకెంత కాస్ట్లీ గిఫ్ట్ ఇస్తాడో అనుకుని స్వప్న మనసులో సంబరపడుతుంది. రాజ్ వచ్చాడని రాహుల్ ఎరేంజ్ చేసిన మనిషి ఫోన్ చేసి చెప్పడంతో అక్కడ నుంచి వెళ్ళిపోతాడు.

కావ్య అప్పుని తీసుకుని ఇంటికి వస్తుంది. కేఫ్ దగ్గర జరిగిన గొడవ అంతా అప్పు కావ్యకి చెప్తుంది. రాజ్ తనతో గొడవపడినట్టే ఇంకెవరితోనే గొడవపడి ఉంటాడు అందుకే వాళ్ళు దాడి చేసి ఉంటారు, సమయానికి నువ్వు లేకపోతే అక్క పరిస్థితి ఏంటని కావ్య కంగారుగా వెళ్ళిపోతుంది. రాజ్ తనకి గిఫ్ట్ తెచ్చానని చెప్పి ఓపెన్ చేసి చూడమని చెప్తాడు. అందులో డైమండ్ నెక్లెస్ ఉంటుందని అనుకుంటూ ఓపెన్ చేస్తుంది.. అందులో రాధా, కృష్ణుల బొమ్మ, చాక్లెట్ బాక్స్ ఉంటుంది. రాహుల్ డైమండ్ రింగ్ ఇస్తే ఇతను ఇంకాస్త బెటర్ గిఫ్ట్ ఇస్తాడని అనుకుంటే ఇలా చేశాడే అని స్వప్న బిత్తరపోతుంది. ఆర్డర్ చేయమని స్వప్న అనేసరికి రాజ్ కాఫీ తెమ్మని చెప్తాడు. ప్రేమ గురించి మీ అభిప్రాయం ఏంటని స్వప్న అడుగుతుంది. దీంతో రాజ్ ఒక పెద్ద ఫిలాసఫీ మొదలుపెడతాడు. రొమాంటిక్ పర్సన్ అనుకుంటే ఇంత రసహీన పక్షి అనుకోలేదని బిక్కమొహం వేస్తుంది.