Bobby Deol: ‘రానా నాయుడు’ చూసి బాధపడ్డా, బాబీ డియోల్ సంచలన వ్యాఖ్యలు

బాలీవుడ్ స్టార్ యాక్టర్ బాబీ డియోల్ ‘రానా నాయుడు’పై తీవ్ర అసంతృప్తి వ్యక్తం చేశారు. ఈ సిరీస్ చూసి చాలా బాధ పడినట్లు వెల్లడించారు. మేకర్స్ ఈ సిరీస్ ను అందరూ చూసేలా తెరకెక్కించలేదన్నారు.

Photo Credit: Bobby Deol/Instagram

బాలీవుడ్ దిగ్గజన నటుడు బాబీ డియోల్ వరుస సినిమాలో దుమ్మురేపుతున్నారు. తాజాగా ఆయన ‘యానిమల్’  సినిమాలో కీలక పాత్ర పోషిస్తున్నారు. రణబీర్ కపూర్, రష్మిక మందన్న హీరో, హీరోయిన్లుగా నటిస్తున్న ఈ చిత్రానికి  సందీప్ రెడ్డి వంగ దర్శకత్వం వహిస్తున్నారు. ఈ సినిమాలో రణబీర్ ని ఊర మాస్ లెవెల్లో చూపిస్తున్నారు. ఇప్పటికే సినిమా నుంచి విడుదలైన పోస్టర్స్ మరింత క్యూరియాసిటీ పెంచాయి. తాజాగా 'యానిమల్'లో నెగెటివ్ రోల్ పోషిస్తున్న బాబీ డియోల్ పోస్టర్ ని విడుదల చేశారు. 'యానిమల్ కా విలన్' అనే క్యాప్షన్ తో పోస్టర్ రిలీజ్ చేశారు. ఇందులో బాబీ డియల్ వైలెంట్ మెన్ గా కనిపించారు. త్వరలోనే ఈ సినిమా ప్రేక్షకుల ముందుకు రానుంది. ఇప్పటికే చిత్రబృందం ప్రమోషన్ కార్యక్రమాలను ముమ్మరం చేసింది.

‘రానా నాయుడు’పై బాబీ డియోల్ అసంతృప్తి

ఇక ‘యానిమల్’ సినిమా ప్రమోషన్ లో భాగంగా  బాబీ డియోల్ వరుసగా ఇంటర్వ్యూలు ఇస్తున్నారు. తాజాగా ఓ ఇంటర్వ్యూలో ఆయన తెలుగు స్టార్లు వెంకటేష్, రానా నటించిన ‘రానా నాయుడు’ సిరీస్ పై సంచనల వ్యాఖ్యలు చేశారు. ఇటీవలి కాలంలో భారీ అంచనాల నడుమ విడుదలై, ప్రేక్షకులను ఆకట్టుకోని చిత్రం ఏంటిని యాంకర్ అడిగిన ప్రశ్నకు ఆయన ‘రానా నాయుడు’ అని చెప్పారు. ‘రే డోనోవన్’ రీమేక్ గా తెరకెక్కించిన ‘రానా నాయుడు’ చూసి నిజంగా బాధపడినట్లు చెప్పారు. వాస్తవానికి ‘రే డోనోవన్’ అద్భుతంగా ఉంటుందని చెప్పారు. అయితే, రీమేక్ విషయానికి వచ్చే సరికి అసలు కథ పక్కదోవ పట్టిందన్నారు. తాను ఈ సిరీస్ చూసే ముందు చాలా అంచనాలు పెట్టుకున్నట్లు చెప్పారు. అయితే, ఈ సిరీస్ ను మేకర్స్ అనుకున్న విధంగా తెరకెక్కించడంలో విఫలం అయ్యారని చెప్పారు. ‘రానా నాయుడు‘ సిరీస్ అమెరికన్ పాపులర్ వెబ్ సిరీస్ ‘రే డోనోవర్’కు ఇండియన్ వెర్షన్ గా రూపొందించారు. నెట్ ఫ్లిక్స్ ఈ వెబ్ సిరీస్ ను నిర్మించగా, సుపర్ణ్ వర్మ, కరణ్ అన్షుమన్ తెరకెక్కించారు.  బాలీవుడ్ హాట్ బ్యూటి సుర్విన్ చావ్లా ఇందులో చక్కటి నటన కనబర్చింది. ఆశిష్ విద్యార్థి, సుశాంత్ సింగ్, అభిషేక్ బెనర్జీ, ఆదిత్య మీనన్, ముకుల్ చద్దా కీలక పాత్రల్లో నటించారు.

డిసెంబర్ 1న ప్రపంచ వ్యాప్తంగా విడుదల

ఇక ‘యానిమల్’ సినిమాలో రణబీర్ సరసన రష్మిక మందన్న గీతాంజలి అనే పాత్రలో కనిపించబోతోంది.  బాలీవుడ్ సీనియర్ నటుడు అనిల్ కపూర్ ఇందులో రణబీర్ తండ్రిగా నటిస్తున్నారు. టీ సిరీస్, భద్రకాళి పిక్చర్స్ బ్యానర్లపై భూషణ్ కుమార్, ప్రణయ్ రెడ్డి వంగ సంయుక్తంగా ఈ సినిమాని నిర్మిస్తున్నారు. ప్రస్తుతం పోస్ట్ ప్రొడక్షన్ పనులు జరుపుకుంటున్న ఈ చిత్రం డిసెంబర్ 1న ప్రపంచ వ్యాప్తంగా హిందీ తో పాటు తెలుగు, తమిళ, కన్నడ, మలయాళ భాషల్లో విడుదల కానుంది. ఈ సినిమాపై దేశ వ్యాప్తంగా భారీగా అంచనాలు నెలకొన్నాయి.

ముఖ్యమైన, మరిన్ని ఆసక్తికర కథనాల కోసం ‘టెలిగ్రామ్’లో ‘ఏబీపీ దేశం’లో జాయిన్ అవ్వండి.
Join Us on Telegram: https://t.me/abpdesamofficial