Bats Worship: ఆ ఊరిలో గబ్బిలాలే గ్రామదేవతలు.... చిత్తూరు జిల్లాలో వింత ఆచారం... గబ్బిలాలకు హాని చేస్తే ఏంచేస్తారో తెలుసా... !

గబ్బిలాలే ఆ గ్రామ ప్రజలకు దేవతలు. నిత్య పూజలు చేస్తూ వింత సంప్రదాయాన్ని నేటికీ కొనసాగిస్తున్నారు. కరోనా టైంలో గబ్బిలాలను చూసి అందరూ హడలెత్తిన పోయినా ఈ గ్రామస్తులు మాత్రం పూజలు చేశారు.

రామచంద్రాపురంలో గబ్బిలాలకు పూజలు

ప్రపంచ వాయు వేగంతో పరుగులు పెడుతున్న నేటి‌ కాలంలోనూ వింత ఆచారాలు కొనసాగిస్తూనే ఉన్నారు. గ్రామాల్లో ఆచరించే ఆచార సంప్రదాయాలను చూసి ఎవరైనా సరే నోరెళ్లబెట్టకుండా ఉండలేరు. చిత్తూరు జిల్లా రామచంద్రాపురం మండలం నడవలూరు గ్రామంలో వింత ఆచారాన్ని నేటికీ పాటిస్తున్నారు. ఆ గ్రామానికి వెళ్లే ముఖ ద్వారం వద్ద పదకొండు చింత చెట్లు దర్శనమిస్తాయి. ఎవరైనా ఆ గ్రామానికి మెదటిసారి వెళ్తే ఆ చింత చెట్లను చూసి భయాందోళనకు గురవుతుంటారు. ఆ పదకొండు చింత చెట్ల నిండా గబ్బిలాలు వేళాడుతూ వింతైన శబ్దాలు చేస్తూ ఉంటాయి. అయితే ఆ గబ్బిలాలను ఆ గ్రామస్తులు దైవంగా భావించి నిత్యం పూజలు చేస్తుంటారు. ఆదివారం వస్తే చాలు ఇక్కడ పూజలు కూడా నిర్వహిస్తుంటారు. రాత్రుళ్లు ఆహార వేటలో ఉండే ఈ గబ్బిలాలు తెల్లారేసరికి తిరిగి ఆ చింత చెట్టు వద్దకు చేరుకుంటాయి. 

అనారోగ్య సమస్యలు నిరోధించేందుకు గబ్బిలాలకు పూజలు

గబ్బిలాలను దైవంగా కొలవడం ఆ గ్రామస్తులకు ఇటీవల వచ్చిన సంప్రదాయం కాదు. పూర్వీకుల వద్ద నుంచి వచ్చిన ఈ సంప్రదాయాన్ని నేటికీ కొనసాగిస్తున్నట్లు గ్రామస్తులు తెలిపారు. ఆ గబ్బిలాలు ఉండడం వల్లనే తమ గ్రామానికి ఎటువంటి ఆపద వాటిళ్లడంలేదని, అందరూ సంతోషంగా ఉండగలుగుతున్నామని ఆ గ్రామస్తులు అంటున్నారు. అంతే కాకుండా తమ గ్రామంలో గబ్బిలాలు ఉండడం కారణంగానే చాలా మంది తమ పిల్లలకు చిన్నతనంలో‌ వచ్చే సమస్యలను అధిగమించేందుకు ఆ చెట్ల వద్దకు వచ్చి గబ్బిలాలకు పూజకు నిర్వహిస్తుంటారని అంటున్నారు. సాధారణంగా చిన్నతనంలో పిల్లలు బరువు తక్కువగా పుట్టడం, సన్నని కాళ్లు, చేతులు కలిగి పుట్టడం చూస్తుంటాం. అలాంటి వారిని ఈ చెట్ల వద్దకు తీసుకొచ్చి ప్రత్యేక పూజలు చేసి, ఆ చెట్ల కొమ్మలతో వేడి చేసిన నీటితో వారికి స్నానం చేయించి, వారి ధరించిన దుస్తులను ఆ చెట్లకు కడితే పక్షి దోష పరిహారం చేస్తుంటారు. ఇలా దైవ స్వరూపంగా భావించే గబ్బిలాలకు ఎవరైనా కీడు చేయాలని వస్తే వారిని అదే చెట్టుకు కట్టివేస్తుంటారు. ఆ గ్రామస్తులు.

గబ్బిలాలే రక్షిస్తాయని నమ్మకం

కరోనా సమయంలో గబ్బిలాలు చూసి అందరూ భయపడిన ఆ గ్రామస్తులు మాత్రం ఎటువంటి భయం లేకుండా గబ్బిలాలకు పూజలు నిర్వహించారు. ప్రతి రోజు ఇంటి ఒక్కొక్కరు చొప్పున ఆ గబ్బిలాలకు పూజలు నిర్వహిస్తారు. పూర్వీకుల నుంచి సంప్రదాయంగా వచ్చిన వాటిని నేటిని కొనసాగించడడం తమకు ఎంతో సంతోషంగా ఉంటుందని ఆ గ్రామస్తులు అంటున్నారు. ఆ గబ్బిలాలే తమ గ్రామానికి రక్షణగా ఉంటున్నాయని గ్రామస్తులు అంటున్నారు. 

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి