Citroen Basalt X Prices Hiked : వాహనదారులకు షాక్ - సిట్రోయెన్ బసాల్ట్ X ధరలు పెంచుతూ కంపెనీ నిర్ణయం!

సిట్రోయెన్ ఇండియా తన బసాల్ట్ X ఎస్‌యూవీ కూపే ధరలను రూ. 40,000 వరకు పెంచింది. పెరిగిన ఇన్‌పుట్ ఖర్చుల వల్ల ఈ నిర్ణయం తీసుకుంది.

Written By : Ayesha | Updated at : 18 Apr 2026 03:17 PM (IST)

Citroen Basalt

Source : www.citroen.in

Citroen Basalt X Prices Hiked News: ప్రముఖ ఫ్రెంచ్ ఆటోమొబైల్ సంస్థ సిట్రోయెన్, తన స్టైలిష్ ఎస్‌యూవీ కూపే 'బసాల్ట్ X' (Basalt X) ధరలను భారీగా పెంచింది. వేరియంట్‌ను బట్టి ఈ పెరుగుదల గరిష్టంగా రూ. 40,000 వరకు ఉంది. 2026 సంవత్సరంలో సిట్రోయెన్ ధరలను పెంచడం ఇది రెండోసారి. అంతకుముందు జనవరి నెలలో ఒకసారి రేట్లు సవరించగా, ఇప్పుడు ఏప్రిల్‌లో మరోసారి పెంచింది. ఆటోమొబైల్ రంగంలో పెరుగుతున్న ముడిసరుకు ఖర్చులు, ద్రవ్యోల్బణం దృష్ట్యా ఈ నిర్ణయం తీసుకున్నట్లు తెలుస్తోంది. ఈ కొత్త ధరలు వెంటనే అమలులోకి వస్తాయని కంపెనీ స్పష్టం చేసింది.

కొత్త ధరల వివరాలు..
సిట్రోయెన్ బసాల్ట్ X బేస్ వేరియంట్ అయిన 'యు' (You) ధర ఇప్పుడు రూ. 8.55 లక్షలకు (ఎక్స్‌షోరూమ్) చేరింది. గతంలో ఇది రూ. 8.15 లక్షలుగా ఉండేది, అంటే ఏకంగా రూ. 40,000 పెరిగింది. అలాగే ప్లస్ 1.2 లీటర్ నేచురల్లీ ఆస్పిరేటెడ్ పెట్రోల్ మాన్యువల్ ట్రిమ్ ధర రూ. 37,000 పెరిగి రూ. 9.99 లక్షలకు చేరుకుంది. ఇతర వేరియంట్లపై రూ. 35,000 నుండి రూ. 40,000 వరకు అదనపు భారం పడింది. టర్బో-పెట్రోల్ మాన్యువల్ వెర్షన్లు, డ్యూయల్-టోన్ మోడల్స్ ధరలు కూడా లక్షల్లో పెరిగాయి. ఆటోమేటిక్ వెర్షన్లు (Plus, Max, Max dual-tone) అన్నింటిపై రూ. 40,000 పెరగడం గమనార్హం.

ఇంజిన్ - పర్ఫార్మెన్స్..
ఈ కారు రెండు రకాల 1.2 లీటర్ పెట్రోల్ ఇంజిన్ ఆప్షన్లతో లభిస్తోంది. అందులో ఒకటి 80 bhp పవర్, 115 Nm టార్క్‌ను ఇచ్చే నేచురల్లీ ఆస్పిరేటెడ్ యూనిట్. దీనికి 5-స్పీడ్ మాన్యువల్ గేర్‌బాక్స్ జత చేశారు. రెండోది మరింత పవర్‌ఫుల్ అయిన టర్బోచార్జ్డ్ వెర్షన్. ఇది 108.5 bhp పవర్, 205 Nm టార్క్‌ను అందిస్తుంది. ఇందులో 6-స్పీడ్ మాన్యువల్ లేదా ఆటోమేటిక్ గేర్ బాక్స్ ఎంచుకునే అవకాశం ఉంది. బసాల్ట్ X తన యూనిక్ డిజైన్, కంఫర్ట్ లెవల్స్ తో మార్కెట్లో మంచి గుర్తింపు తెచ్చుకుంది. ఈ కార్ కు సంబంధించి మార్కెట్లో సపరేట్ వినియోగ దారులు కూడా ఉన్నారని కంపెనీ వర్గాలు పేర్కొంటున్నాయి.

మార్కెట్ పోటీ..
సిట్రోయెన్ బసాల్ట్ X ప్రధానంగా టాటా కర్వ్ (Tata Curvv), హ్యుందాయ్ క్రెటా, మారుతి సుజుకి గ్రాండ్ విటారా వంటి పాపులర్ మోడల్స్ తో పోటీ పడుతోంది. అలాగే రాబోయే టాటా సియెర్రా, రెనాల్ట్ డస్టర్, కియా సెల్టోస్ వంటి కార్లకు కూడా ఇది గట్టి సవాలు విసురుతోంది. ధరలు పెరిగినప్పటికీ, కూపే ఎస్‌యూవీ సెగ్మెంట్‌లో బసాల్ట్ X తనకంటూ ఒక ప్రత్యేక స్థానాన్ని నిలుపుకుంది. కొత్తగా కారు కొనాలనుకునే వారు లేటెస్ట్ ఆన్-రోడ్ ధరలు, ఆఫర్ల కోసం స్థానిక డీలర్‌షిప్‌లను సంప్రదించడం మంచిది అని విశ్లేష‌కులు సూచిస్తున్నారు. బడ్జెట్ ఎస్‌యూవీ కోసం చూసే వారికి ఈ ధరల పెరుగుదల కొంచెం నిరాశ కలిగించే విషయమేన‌ని పేర్కొంటున్నారు. ఏదేమైనా మూడు నెలల వ్యవధిలో రెండుసార్లు కార్ల ధరలు పెంచడంతో నిపుణులు ఆశ్చర్యం వ్యక్తం చేస్తున్నారు. ఈ పరిణామాంతో సేల్స్ కాస్త తగ్గే అవకాశమున్నట్లు తెలుస్తోంది.