Revanth Reddy: ఇంటర్ కాంటినెంటల్ కప్ ఫుట్‌బాల్‌ టోర్నమెంట్‌ ప్రారంభించిన సీఎం రేవంత్ రెడ్డి

Hyderabad News | హైదరాబాద్ లోని గచ్చిబౌలి స్టేడియంలో ఇంటర్ కాంటినెంటల్ కప్ 4వ ఎడిషన్ 2024ను తెలంగాణ సీఎం రేవంత్ రెడ్డి ప్రారంభించారు. ఇండియా, మారిషస్, సిరియా దేశాలు ఈ టోర్నీలో పాల్గొంటాయి.

ఇంటర్ కాంటినెంటల్ కప్ 4వ ఎడిషన్ 2024

హైదరాబాద్ గచ్చిబౌలి స్టేడియంలో ఇంటర్ కాంటినెంటల్ కప్ (4వ ఎడిషన్) 2024 జరగనుంది. మూడు దేశాలు పాల్గొనే ప్రతిష్టాత్మక ఇంటర్ కాంటినెంటల్ కప్ తాజా ఎడిషన్ ను తెలంగాణ ముఖ్యమంత్రి రేవంత్ రెడ్డి ప్రారంభించారు. అన్ని జట్ల ఆటగాళ్లకు సీఎం శుభాకాంక్షలు తెలియజేశారు.

ఈ టోర్నమెంట్‌లో ఇండియాతో పాటు మారిషస్, సిరియా దేశాల జట్లు తలపడతాయి. ఇండియా, మారిషస్‌ల మధ్య జరిగిన తొలి మ్యాచ్ ఓపెనింగ్ సెర్మనీలో సీఎం రేవంత్ రెడ్డి పాల్గొన్నారు.

ఇండియా, సిరియా, మారిషస్ మూడు దేశాల మధ్య జరిగే ఫుట్‌బాల్ టోర్నమెంట్‌ను హైదరాబాద్‌లో నిర్వహించాలని అఖిల భారత ఫుట్‌బాల్ సమాఖ్య నిర్ణయం పట్ల సీఎం రేవంత్ రెడ్డి హర్షం వ్యక్తం చేశారు.

తెలంగాణ క్రీడాభిమానులు, ముఖ్యంగా హైదరాబాద్ ఫుట్‌బాల్ ఫ్యాన్స్ తరఫున ఆటగాళ్లకు రేవంత్ రెడ్డి స్వాగతం పలికారు. హైదరాబాద్‌ను దేశ క్రీడా రాజధానిగా మార్చాలని ఇటీవల నిర్ణయం తీసుకున్నట్లు సీఎం తెలిపారు.

రౌండ్ రాబిన్ ఫార్మాట్ లో మూడు జట్ల మధ్య మూడు మ్యాచులు జరగనుండగా, సెప్టెంబర్ 6న మారిషస్ వర్సెస్ సిరియా, సెప్టెంబర్ 9న ఇండియా వర్సెస్ సిరియా జట్లు తలపడతాయి.

ఇంటర్ కాంటినెంటల్ కప్ 2024 ప్రారంభోత్సవంలో సీఎం రేవంత్ రెడ్డితో పాటు మంత్రి పొన్నం ప్రభాకర్, క్రీడల సలహాదారు ఏపీ జితేందర్ రెడ్డి, ఆల్ ఇండియా ఫుట్ బాల్ ఫెడరేషన్ అధ్యక్షుడు కళ్యాణ్ చౌబే, తెలంగాణ స్పోర్ట్స్ అథారిటీ చైర్మన్ శివ సేనల్, పలువురు అధికారులు పాల్గొన్నారు.

తెలంగాణ ఆటగాళ్లు ఒలింపిక్స్ లో పతకాలు తెచ్చే స్థాయికి రాష్ట్ర క్రీడా రంగాన్ని తీర్చిదిద్దుతామని సీఎం రేవంత్ రెడ్డి ఇటీవల ప్రకటించారు. జిల్లాల్లో స్పెషల్ కోచింగ్ అకాడమీలపై సర్కార్ ఫోకస్ చేస్తోంది.