India first LGBTQ MP: దేశ పార్లమెంట్లో అడుగుపెట్టనున్న తొలి LGBTQ+ ఎంపీ - మేనకా గురుస్వామికి మమతా బెనర్జీ చాన్స్
Menaka Guruswamy: బెంగాల్ నుంచి రాజ్యసభకు ఎన్నిక కానున్న మేనకా గురుస్వామి చరిత్రలో నిలిచిపోయే ఘనత సాధించనున్నారు. దేశ పార్లమెంట్లో అడుగుపెట్టనున్న తొలి LGBTQ+ ఎంపీ ఆమే అవుతారు.
Menaka Guruswamy India first LGBTQ MP: భారత పార్లమెంటరీ చరిత్రలో ఒక అరుదైన మైలురాయి నమోదవుతోంది. సుప్రీంకోర్టు సీనియర్ న్యాయవాది మేనకా గురుస్వామి దేశంలోనే తొలి ఓపెన్లీ LGBTQ+ మహిళా పార్లమెంట్ సభ్యురాలిగా బాధ్యతలు చేపట్టబోతున్నారు. రాజ్యసభ ఎన్నికలకు పశ్చిమ బెంగాల్ అధికార పార్టీ తృణమూల్ కాంగ్రెస్ ప్రకటించిన నలుగురు అభ్యర్థుల జాబితాలో ఆమె పేరు ఉండటం ఇప్పుడు దేశవ్యాప్తంగా చర్చనీయాంశమైంది.
మేనకా గురుస్వామి కేవలం ఒక న్యాయవాది మాత్రమే కాదు, సామాజిక మార్పు కోసం పోరాడిన మహిళ. 2018లో స్వలింగ సంపర్కాన్ని నేరంగా పరిగణించే ఐపీసీ సెక్షన్ 377 ను సుప్రీంకోర్టు రద్దు చేసేలా ఆమె న్యాయపోరాటం చేసారు. నవతేజ్ సింగ్ జోహార్ కేసులో పిటిషనర్ల తరఫున వాదిస్తూ, రాజ్యాంగం కల్పించిన వ్యక్తిగత స్వేచ్ఛను ఆమె గట్టిగా వినిపించారు. ఆ సమయంలోనే ఆమె తన వ్యక్తిగత జీవితం గురించి కూడా బహిరంగంగా ప్రకటించి ఎందరికో స్ఫూర్తిగా నిలిచారు. తాను స్వయంగా స్వలింగ సంపర్కురాలిగా ప్రకటించుకున్నారు.
తృణమూల్ కాంగ్రెస్ పార్టీ అధినేత్రి మమతా బెనర్జీ ఈసారి రాజ్యసభ ఎన్నికలకు వ్యూహాత్మకంగా అభ్యర్థులను ఎంపిక చేశారు. ఇటీవలి కాలంలో పశ్చిమ బెంగాల్ ప్రభుత్వం ఎదుర్కొన్న పలు కీలక న్యాయపరమైన అంశాల్లో మేనకా గురుస్వామి టీఎంసీ తరఫున వాదనలు వినిపించారు. ఆమె మేధస్సును, సామాజిక స్పృహను గుర్తించిన పార్టీ, ఆమెను ఎగువ సభకు పంపాలని నిర్ణయించింది. మార్చి 16న జరిగే ఎన్నికల్లో ఆమె విజయం లాంఛనమే కావడంతో, పార్లమెంట్లో అడుగుపెట్టే తొలి క్వీర్ ఎంపీగా ఆమె రికార్డు సృష్టించనున్నారు.
మేనకా గురుస్వామి అంతర్జాతీయ స్థాయిలో గుర్తింపు పొందిన అడ్వకేట్. 2019లో ప్రపంచంలోని 100 మంది అత్యంత ప్రభావవంతమైన వ్యక్తుల జాబితాలో ఆమె చోటు దక్కించుకున్నారు ఆమె భాగస్వామి అరుంధతి కట్జూతో కలిసి ఈ గౌరవం దక్కించుకున్నారు. ఆక్స్ఫర్డ్ యూనివర్సిటీలోని రోడ్స్ హౌస్లో ఫోటో పెట్టిన తొలి భారతీయురాలిగా ఆమె అరుదైన గౌరవం పొందారు. హైదరాబాద్ పబ్లిక్ స్కూల్లో ప్రాథమిక విద్యనభ్యసించిన ఆమె, ఆక్స్ఫర్డ్ , హార్వర్డ్ వంటి ప్రతిష్టాత్మక విశ్వవిద్యాలయాల నుంచి న్యాయశాస్త్రంలో పట్టాలు పొందారు.
The Trinamool Congress has nominated @MenakaGuruswamy to the Rajya Sabha. She is an alumnus of the National Law School of India University, Harvard University, and the University of Oxford. She was a Rhodes Scholar. Her thesis studied constitutionalism in India, Pakistan, and… pic.twitter.com/0uFjjBwvyQ
— Sandipan Mitra (@SMitra_) February 27, 2026
భారతదేశం వంటి సంప్రదాయ దేశంలో ఒక LGBTQ+ వ్యక్తి అత్యున్నత చట్టసభకు ప్రాతినిధ్యం వహించడం అంటే, అది కేవలం ఒక వ్యక్తి విజయమే కాదు. సమాజంలో అట్టడుగున ఉన్న వర్గాలకు, లైంగిక మైనారిటీలకు రాజకీయ గొంతుక లభించినట్టే. పార్లమెంట్లో ఆమె ప్రవేశం లింగ సమానత్వం,మానవ హక్కుల దిశగా దేశం వేస్తున్న మరో ముందడుగుగా విశ్లేషకులు భావిస్తున్నారు.
టాప్ హెడ్ లైన్స్
ట్రెండింగ్ వార్తలు
