Indo-China Dispute: మెట్టు దిగిన చైనా.. భారత్‌తో సైనిక చర్చలకు డ్రాగన్ ఓకే

సరిహద్దులో నెలకొన్న సమస్యలను పరిష్కరించేందుకు 14వ దఫా చర్చలను త్వరలోనే ఏర్పాటు చేయాలని భారత్- చైనా నిర్ణయించుకున్నాయి.

భారత్‌తో సైనిక చర్చలకు చైనా సుముఖత

భారత్- చైనా సైనిక చర్చలపై కీలక నిర్ణయం తీసుకున్నాయి ఇరు దేశాలు. సరిహద్దులో ఇరుదేశాల మధ్య నెలకొన్న సమస్యలకు సత్వర పరిష్కారం కనుగొనాలని ఇరువర్గాలు అంగీకరించుకున్నట్లు భారత విదేశాంగ శాఖ వెల్లడించింది. ఈ మేరకు సరిహద్దు సమస్యపై ఏర్పాటైన 'వర్కింగ్ మెకానిజం ఫర్ కన్సల్టేషన్ అండ్ కోఆర్డినేషన్'(డబ్ల్యూఎంసీసీ) సమావేశంలో చర్చలు జరిపినట్లు విదేశాంగా శాఖ పేర్కొంది.

లోతైన చర్చలు..

తూర్పు లద్దాఖ్​లో చైనా సైన్యంతో నెలకొన్న ప్రతిష్టంభనపై ఆ దేశ సైనిక ప్రతినిధులతో లోతైన చర్చలు జరిపినట్లు విదేశాంగ శాఖ తెలిపింది. ఇటీవల జరిగిన 13వ దఫా చర్చలు విఫలం కావడం వల్ల తర్వాతి దఫా చర్చలు త్వరగానే జరపాలని నిర్ణయించినట్లు పేర్కొంది.

కీ పాయింట్స్..

• ఇరువర్గాలు సరిహద్దులో క్షేత్రస్థాయి పరిస్థితులను చేయిదాటిపోకుండా చూసుకోవాలని నిర్ణయించుకున్నాయి.
• వాస్తవాధీన రేఖ వెంబడి అన్ని ఘర్షణ ప్రాంతాల నుంచి బలగాల ఉపసంహరణను పూర్తి చేయాలన్న లక్ష్యాన్ని సాధించాలని నిర్ణయించాయి.
• 14వ విడత సీనియర్ కమాండర్ల చర్చలు త్వరగా నిర్వహించుకునేందుకు ఇరువర్గాలు అంగీకరించాయి.
•  అవాంఛనీయ ఘటనలు జరగకుండా క్షేత్రస్థాయిలో సంయమనం పాటించాలని ఏకాభిప్రాయానికి వచ్చాయి.
• చర్చలు విఫలం..

తూర్పు లద్దాఖ్‌లో నియంత్రణ రేఖ వద్ద శాంతి నెలకొల్పేందుకు చైనా- భారత్ మధ్య ఇటీవల జరిగిన 13వ విడత చర్చలు విఫలమయ్యాయి. ఎల్‌ఏసీ వద్ద ప్రస్తుత పరిణామాలకు చైనా చేసిన దుస్సాహసాలే కారణమని డ్రాగన్‌తో జరిగిన చర్చల్లో భారత్ ప్రస్తావించినట్లు అధికారులు తెలిపారు. ఇరు దేశాల మధ్య జరిగిన ద్వైపాక్షిక ఒప్పందాలకు తూట్లు పొడుస్తూ, ఎల్‌ఏసీ వద్ద యథాతథ స్థితిని మార్చేందుకు చైనా ప్రయత్నం చేసిందని భారత ఆర్మీ స్పష్టం చేసింది. ఎల్‌ఏసీ వద్ద ఉద్రిక్తతలు తగ్గించేందుకు చైనా తగిన చర్యలు చేపట్టాలని, తద్వారా శాంతి నెలకొల్పాలని భారత సైన్యం అభిప్రాయపడింది.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి