Gas and Bloating : గ్యాస్, బ్లోటింగ్ను తగ్గించే సహజమైన ఫుడ్స్ ఇవే.. జీర్ణక్రియ మెరుగుపడాలంటే ఇవి తినేయండి
Foods to Ease Bloating : గ్యాస్, కడుప ఉబ్బరం సమస్యలు చాలామందిని ఇబ్బంది పెడతాయి. దీనివల్ల ఎన్నో ఇబ్బందులు ఎదుర్కోవాల్సి వస్తుంది. అయితే ఈ సమస్యను దూరం చేసే ఫుడ్స్ లిస్ట్ ఇక్కడుంది. చూసి లాగించేయండి.
- కడుపులో గ్యాస్, ఉబ్బరం ఆహారపు అలవాట్ల వల్ల తరచుగా వస్తాయి.
- అల్లం, పెరుగు, సోంపు వంటివి జీర్ణక్రియను మెరుగుపరచి ఉపశమనం ఇస్తాయి.
- అరటి, పుదీనా, కీరదోస కూడా గ్యాస్ తగ్గించి, శరీరాన్ని హైడ్రేట్ చేస్తాయి.
- తీవ్రమైన లక్షణాలుంటే వెంటనే వైద్యుడిని సంప్రదించడం చాలా అవసరం.
Natural Foods That Help Reduce Gas and Bloating : కడుపులో గ్యాస్, ఉబ్బరం సమస్యలు చాలా మందిని తరచూ ఇబ్బంది పెడుతుంటాయి. ఎక్కువగా తినడం, ఫైబర్ అధికంగా ఉండే ఆహారాలను ఒక్కసారిగా తీసుకోవడం, కార్బోనేటెడ్ డ్రింక్స్ తాగడం, ఒత్తిడి వంటి కారణాల వల్ల అజీర్ణ సమస్యలు వస్తాయి. బ్లోటింగ్ కారణంగా కడుపు బరువుగా అనిపించడం, అసౌకర్యం, నొప్పి వంటి ఇబ్బందులు ఎదురవుతాయి. ఈ సమస్యతో ఇబ్బంది పడుతున్నప్పుడు కొన్ని ఫుడ్స్ డైట్లో చేర్చుకుంటే మంచిదని చెప్తున్నారు నిపుణులు.
గ్యాస్, బ్లోటింగ్ వల్ల కలిగే ఇబ్బందులు
గ్యాస్ ఎక్కువగా పేరుకుపోతే కడుపు బిగుసుకుపోయినట్లు, ఉబ్బినట్లు అనిపిస్తుంది. పేగుల్లో గ్యాస్ చిక్కుకుపోవడం వల్ల తిమ్మిరి, మెలికలు తిరిగినట్లు నొప్పి రావచ్చు. కడుపు నిండిన భావన వల్ల తినాలనే ఆసక్తి తగ్గిపోవచ్చు. ఎప్పుడూ కడుపు బరువుగా ఉండటం వల్ల రోజువారీ పనులపై ప్రభావం పడుతుంది. కొన్నిసార్లు గ్యాస్ వల్ల ఛాతీలో బరువుగా అనిపించి గుండె సమస్యలా భావించే అవకాశం ఉంటుంది. ఈ సమయంలో కొన్ని సహజమైన ఫుడ్స్ తీసుకోవడం వల్ల గ్యాస్, బ్లోటింగ్ తగ్గే అవకాశం ఉంది. అవేంటంటే..
అల్లం
అల్లంలో ఉండే జింజరాల్ అనే సమ్మేళనం జీర్ణక్రియను మెరుగుపరుస్తుంది. గ్యాస్ ఏర్పడటాన్ని తగ్గించి కడుపునకు ఉపశమనం ఇస్తుంది. ఉబ్బరం, గ్యాస్ ఫీలింగ్ ఉన్నప్పుడు అల్లాన్ని దంచి నీటిలో వేసి మరిగించి తీసుకోవచ్చు. లేదా ఇతర వంటల్లో కలిపి తీసుకోవచ్చు.
పెరుగు
పెరుగులో ఉండే ప్రోబయోటిక్స్ మంచి బ్యాక్టీరియాను పెంచి జీర్ణవ్యవస్థ పనితీరును మెరుగుపరుస్తాయి. దీంతో గ్యాస్, ఉబ్బరం తగ్గవచ్చు. కాబట్టి పెరుగును నేరుగా లేదా అన్నంతో కలిపి తీసుకోండి.
సోంపు, జీలకర్ర
సోంపు గింజలు జీర్ణక్రియకు సహాయపడతాయి. కాబట్టి భోజనం తర్వాత కొద్దిగా సోంపు నమలడం వల్ల గ్యాస్ సమస్య తగ్గుతుంది. అలాగే జీలకర్ర కూడా జీర్ణరసాల ఉత్పత్తిని పెంచి అజీర్ణం, గ్యాస్ సమస్యలను తగ్గించడంలో సహాయపడుతుంది.
అరటిపండ్లు
అరటిపండ్లలో పొటాషియం అధికంగా ఉంటుంది. ఇది శరీరంలో ద్రవాల సమతుల్యతను కాపాడి బ్లోటింగ్ను తగ్గించడంలో సహాయపడుతుంది. రోజుకు ఒకటి తింటే మంచి ఫలితాలు ఉంటాయి.
పుదీనా
పుదీనా ఆకులు పేగుల కండరాలను సడలించి గ్యాస్, అజీర్ణం వల్ల కలిగే అసౌకర్యాన్ని తగ్గిస్తాయి. తాగే నీటిలో వీటిని వేసుకుని రోజంతా తాగితే మంచిది.
కీరదోస
కీరదోసలో నీటి శాతం ఎక్కువగా ఉంటుంది. ఇది శరీరాన్ని హైడ్రేట్గా ఉంచి కడుపు ఉబ్బరాన్ని తగ్గించడంలో సహాయపడుతుంది. భోజనం తర్వాత లేదా స్నాక్స్ రూపంలో దీనిని తీసుకోవచ్చు.
మరిన్ని ఫుడ్స్
బొప్పాయిలో ఉండే పపైన్ ఎంజైమ్ ఆహారం త్వరగా జీర్ణమయ్యేలా చేస్తుంది. దీంతో గ్యాస్ సమస్య తగ్గుతుంది. స్నాక్ టైమ్లో, లంచ్ తర్వాత తీసుకునేందుకు అనువైనది. ఓట్స్లో ఉండే కరిగే ఫైబర్ పేగుల ఆరోగ్యాన్ని మెరుగుపరుస్తుంది. అయితే మితంగా తీసుకుంటేనే ప్రయోజనం ఉంటుంది. కొబ్బరి నీరు శరీరాన్ని హైడ్రేట్గా ఉంచి జీర్ణక్రియకు మద్దతు ఇస్తుంది. బ్లోటింగ్ను తగ్గించడంలో ఉపయోగపడుతుంది.
గ్యాస్, బ్లోటింగ్ సాధారణ సమస్యలే అయినప్పటికీ.. తరచూ వస్తుంటే జీవనశైలిలో మార్పులు చేసుకోవడం అవసరం. అల్లం, పెరుగు, సోంపు, బొప్పాయి వంటి సహజ ఆహారాలు జీర్ణక్రియను మెరుగుపరచి ఉపశమనం ఇవ్వగలవు. అయితే గ్యాస్, బ్లోటింగ్తో పాటు తీవ్రమైన కడుపు నొప్పి, బరువు తగ్గడం లేదా ఇతర లక్షణాలు ఉంటే వెంటనే వైద్యుడిని సంప్రదించడం మంచిదని చెప్తున్నారు నిపుణులు.
మరిన్ని ఇంట్రెస్టింగ్ హెల్త్ ఆర్టికల్స్, ఇంటి చిట్కాల కోసం దీనిని క్లిక్ చేయండి.
గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.
టాప్ హెడ్ లైన్స్
ట్రెండింగ్ వార్తలు
