Heart Disease : గుండె ప్రమాద హెచ్చరికలు.. ఇంట్లోనే ఈ 4 సంకేతాలను గుర్తిస్తే, ప్రాణాపాయం నుంచి తప్పించుకోవచ్చు
Silent Signs of Heart : గుండె ప్రమాదంలో ఉందని తెలిపే నాలుగు ప్రమాదకరమైన సంకేతాలు శరీరం ఇస్తుందని.. వాటిని ఎప్పుడూ విస్మరించవద్దని చెప్తున్నారు నిపుణులు. అవేంటంటే..
Heart Disease Warning Signs : మీ శరీరం గుండె ప్రమాదంలో ఉందని చెప్పేలా సైలెంట్గా సంకేతాలు ఇస్తుందని చెప్తున్నారు నిపుణులు. చాలామంది ఈ విషయం తెలియక ప్రాణాల మీదకి తెచ్చుకుంటారు. ధమనులు మూసుకుపోవడం లేదా గుండె జబ్బుల గురించి ఆందోళన చెందుతారు. అంతేకాకుండా అధునాతన ఆసుపత్రి స్కాన్లు మాత్రమే సమస్యను గుర్తించగలవని అనుకుంటారు. కానీ నిజం ఏమిటంటే.. మీరు ఇంట్లోనే ఈ ప్రమాదాలను ముందుగా గుర్తించవచ్చు. నేరుగా చూడలేకపోయినా.. మీరు ఏమి అబ్జర్వ్ చేస్తే వాటిని గుర్తించవచ్చో తెలుసుకుందాం.
గుండె జబ్బుల హెచ్చరిక సంకేతాలు ఇంట్లోనే తనిఖీ చేయవచ్చని చెప్తున్నారు. రక్తపోటు నుంచి మెట్లు ఎక్కడం వరకు ఎన్నో విషయాలను సరిగ్గా అర్థం చేసుకుంటే మీ గుండె ఆరోగ్యంగా ఉందో లేదో తెలిసిపోతుందని చెప్తున్నారు. అలా మనం విస్మరించకూడని 4 ముందస్తు సంకేతాలు ఏంటో.. నిపుణులు ఇస్తోన్న హెచ్చరికలు ఏంటో చూసేద్దాం.
రక్తపోటు..
మీ రక్తపోటును క్రమం తప్పకుండా చెక్ చేసుకోవాలి. ఇంట్లోనే గుండె ఆరోగ్యాన్ని అంచనా వేయడానికి సులభమైన, అత్యంత ప్రభావవంతమైన మార్గాలలో ఇది ఒకటి. ఆటోమేటిక్ డిజిటల్ బ్లడ్ ప్రెజర్ మానిటర్ సాధారణంగా అత్యంత నమ్మదగిన ఎంపిక. మీ బీపీ చెక్ చేసే ముందు.. కనీసం ఐదు నిమిషాలు నిశ్శబ్దంగా కూర్చోండి. మీ పాదాలను నేలపై చదునుగా ఉంచండి. మీ వీపునకు సపోర్ట్ ఇవ్వండి. రీడింగ్ సమయంలో మాట్లాడకుండా ఉండండి. వరుసగా ఏడు రోజులు ఉదయం రెండు, రాత్రి రెండు రీడింగ్లు తీసుకోండి. తర్వాత సగటును లెక్కించండి.
సాధారణ పరిధి కంటే ఎక్కువ స్థిరంగా ఉంటే.. మీ ధమనులపై ఒత్తిడి పెరిగినట్లు సూచిస్తుంది. సాధారణంగా 120/80 mmHg కి దగ్గరగా ఉంటే మంచిది. దానిని ఆరోగ్యకరమైనదిగా పరిగణిస్తారు. నిరంతరం బీపీ పెరుగుతుంటే.. రక్త నాళాలు ఒత్తిడికి గురి అవుతాయి. గుండె జబ్బులు, స్ట్రోక్ ప్రమాదం గణనీయంగా పెరుగుతుంది. మీ రీడింగ్లు ఎక్కువగా ఉంటే వెంటనే వైద్య సహాయం తీసుకోవాలి.
యాంకిల్-బ్రాచియల్ ఇండెక్స్ (ABI)
మరో ముఖ్యమైన స్క్రీనింగ్ సాధనం యాంకిల్-బ్రాచియల్ ఇండెక్స్ (ABI). మాయో క్లినిక్ ప్రకారం.. ఈ పరీక్ష మీ చీలమండలలోని రక్తపోటును మీ చేతులలోని రక్తపోటుతో పోలుస్తుంది. ఇది పరిధీయ ధమని వ్యాధి ప్రమాదాన్ని గుర్తించడంలో సహాయపడుతుంది. ధమనులు, హృదయనాళ ప్రమాదంతో ముడిపడి ఉన్న పరిస్థితిని చెప్తుంది.
ఈ పరీక్షకు రెండు బీపీ కఫ్లు లేదా చేయి, చీలమండపై వరుసగా ఉపయోగించే ఒక పరికరం అవసరం. కొలిచిన తర్వాత.. చీలమండ ఒత్తిడిని చేయి ఒత్తిడితో భాగిస్తారు. నిష్పత్తి 0.90 కంటే తక్కువగా ఉంటే.. అది కాళ్ల ధమనులు ఇరుకైనట్లు, గుండె సంబంధిత సమస్యల సంభావ్యతను ఎక్కువగా సూచిస్తుంది. లక్షణాలు తీవ్రమయ్యే ముందు ప్రసరణ సమస్యలను గుర్తించడానికి ABI నమ్మకమైన ప్రారంభ స్క్రీనింగ్ పద్ధతిగా చెప్తారు.
లిపిడ్ ప్రొఫైల్ టెస్ట్..
ధమనుల ఆరోగ్యంలో కొలెస్ట్రాల్ స్థాయిలు కీలక పాత్ర పోషిస్తాయి. లిపిడ్ ప్రొఫైల్ పరీక్ష మొత్తం కొలెస్ట్రాల్, LDL (తరచుగా "చెడు" కొలెస్ట్రాల్ అని పిలుస్తారు). HDL ("మంచి" కొలెస్ట్రాల్), ట్రైగ్లిజరైడ్లను కొలుస్తుంది. ఇంటి వద్దే ఈ టెస్ట్ చేయించుకోవచ్చు. ఇంటి దగ్గరే ఉంటూ మీరు ల్యాబ్ టెక్నీషియన్తో టెస్ట్ చేయించుకోవాలి. అయితే మీ వైద్యుడు వేరే విధంగా సలహా ఇస్తే తప్పా.. పరీక్షకు ముందు 12 గంటల ఉపవాసం ఉండాలని గుర్తించుకోండి.
అధిక LDL కొలెస్ట్రాల్ స్థాయిలు ధమనులలో ఫలకం ఏర్పడే ప్రమాదాన్ని పెంచుతాయి. ఇది చివరికి గుండెకు రక్త ప్రవాహాన్ని పరిమితం చేస్తుంది. కాలక్రమేణా ఇది కరోనరీ ఆర్టరీ వ్యాధి, గుండెపోటు లేదా స్ట్రోక్కు దారితీస్తుంది. మీ లిపిడ్ ప్రొఫైల్ను క్రమం తప్పకుండా ట్రాక్ చేయడం వల్ల మీరు ప్రమాదాన్ని ముందుగానే గుర్తించి.. అవసరమైతే ఆహారం, వ్యాయామం లేదా వైద్య సలహా ద్వారా నివారణ చర్యలు తీసుకోవచ్చు.
మెట్లు ఎక్కేటప్పుడు
కొన్నిసార్లు మీ శరీరమే.. మెషిన్లు కంటే ఎక్కువ విషయాలు చెప్తుంది. నాలుగు అంతస్తుల మెట్లు స్థిరమైన వేగంతో ఎక్కడానికి ప్రయత్నించండి. మీకు ఎలా అనిపిస్తుందో జాగ్రత్తగా గమనించండి. మీకు ఛాతీ బిగుతుగా అనిపించడం, ఊపిరి ఆడకపోవడం, దవడ లేదా చేతికి నొప్పి వ్యాపించడం, తల తిరగడం లేదా తీవ్ర అలసట అనిపిస్తే.. వెంటనే ఆపండి.
ఈ లక్షణాలు శారీరక శ్రమ సమయంలో సంభవిస్తే ధమనులు ఇరుకుగా ఉండటం వల్ల గుండెకు రక్త ప్రవాహం తగ్గుతుందని సూచిస్తుంది. అలాగే లక్షణాలు ఎంత త్వరగా కనిపిస్తాయో, అవి వ్యాయామంతో తీవ్రమవుతాయో లేదో గమనించండి. ఇవి రెగ్యులర్గా వస్తుంటే విస్మరించకండి.
ఈ సంకేతాలను ఎప్పుడు తీవ్రంగా తీసుకోవాలి
ఇవి గుండె ప్రమాదంలో ఉందని తెలిపే ముందస్తు హెచ్చరిక సంకేతాలు. గుండె జబ్బులు తరచుగా సంవత్సరాలుగా సైలెంట్గా అభివృద్ధి చెందుతాయి. స్పష్టమైన లక్షణాలు కనిపించే సమయానికి పరిస్థితి ఇప్పటికే ముదిరి ఉండవచ్చు. కాబట్టి రెగ్యులర్గా చెక్ చేస్తూ.. భౌతిక సంకేతాలపై అవగాహన ఉంటే దానిని బట్టి వైద్య సేవ తీసుకోండి. ఏ మాత్రం నిర్లక్ష్యం చేసినా.. ప్రమాదం ఖరీదు ఎక్కువగా ఉంటుంది.
గమనిక: ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.
టాప్ హెడ్ లైన్స్
ట్రెండింగ్ వార్తలు
