తరచూ ముక్కు నుండి రక్తం కారుతుందా? అది ఆ తీవ్రమైన వ్యాధిని సూచిస్తుంది

ముక్కు నుంచి రక్తం కారడం అనేది సర్వసాధారణంగా పరిగణిస్తారు. కానీ కొన్నిసార్లు అది తీవ్రమైన వ్యాధికి లక్షణంగా చెప్పుకోవచ్చు.

(Image credit: Pixabay)

వేడి చేసినప్పుడు లేక ముక్కుకి దెబ్బ తగిలినప్పుడు ముక్కు నుండి రక్తం కారడం సర్వసాధారణం. కానీ ఎలాంటి కారణాలు లేకుండా ముక్కు నుంచి తరచూ రక్తం కనిపిస్తూ ఉంటే మాత్రం తేలిగ్గా తీసుకోకూడదు. ఇది నాన్ ఆల్కహాలిక్ ఫ్యాటీ లివర్ డిసీజ్‌కు సంకేతంగా భావించవచ్చు. అందులోనూ ఈ వ్యాధి తీవ్రమైన దశకు చేరుకున్నప్పుడే ఇలా తరచూ ముక్కు నుండి రక్తం కారుతుంది. ఆల్కహాల్ అతిగా తాగే వారిలో ఆల్కహాలిక్ ఫ్యాటీ లివర్ డిసీజ్ వస్తుంది. ఆల్కహాల్ అలవాటు లేకపోయినా వచ్చేది నాన్ ఆల్కహాలిక్ ఫ్యాటీ లివర్ డిసీజ్. అధిక కేలరీలు ఉండే ఆహారాన్ని తినడం వల్ల కాలేయంలో కొవ్వు పేరుకు పోతుంది. ఇదే నాన్ ఆల్కహాలిక్ ఫ్యాటీ లివర్ వ్యాధి. ఇది చాలా ప్రమాదకరమైన వ్యాధిగా చెప్పుకోవచ్చు.

ముందస్తు హెచ్చరికలు లేకుండా
ఈ వ్యాధి వచ్చినప్పుడు ప్రారంభంలో ఎటువంటి హెచ్చరిక సంకేతాలు కనిపించవు. కాలేయంలో  కొవ్వు పేరుకుపోతూ ఉంటుంది. కాలేయంలో ఇన్ఫ్లమేషన్ కలుగుతుంది. దీన్నే నాన్ ఆల్కహాలిక్ స్టీటోహెపటైటిస్ అంటారు. కాలేయంపై మచ్చలు ఏర్పడతాయి. దీర్ఘకాలంగా చికిత్స అందకపోతే అది సిర్రోసిస్ వ్యాధిగా మారిపోతుంది. సిర్రోసిస్ అనేది ఫ్యాటీ లివర్ వ్యాధిలో తీవ్రమైన దశగా చెప్పుకుంటారు. ఈ దశలో కాలేయం కుచించుకుపోతుంది. కాలేయంపై మచ్చలు, చిన్న చిన్న గడ్డలు ఏర్పడతాయి. 

ముక్కు నుండి రక్తం రావడం
తరచూ ఇలాంటి దెబ్బలు తగలకపోయినా, ముక్కు నుండి రక్తం కారడం అనేది సిర్రోసిస్ వ్యాధి లక్షణంగా చెబుతారు. దీన్ని ఎపిస్టాక్సెస్ అని కూడా పిలుస్తారు. నోట్లోని చిగుళ్లలో కూడా రక్తస్రావం కనిపిస్తుంది.

ఇతర లక్షణాలు 
ఫ్యాటీ లివర్ వ్యాధి సిర్రోసిస్ గా మారాక కొన్ని లక్షణాలు కనిపిస్తాయి. ముక్కు నుండి రక్తస్రావం అవడంతో పాటు అలసట, బలహీనత, ఆకలి వేయకపోవడం, బరువు తగ్గడం, కండరాలు క్షీణించడం, వికారంగా ఉండడం, వాంతులు, కాలేయం ఉన్న ప్రదేశంలో నొప్పి రావడం, చర్మం, కళ్ళు పసుపు రంగులోకి మారడం, జుట్టు రాలిపోవడం, కాళ్లు పాదాలలో నీరు చేరడం, పొత్తికడుపులో వాపు రావడం వంటివి కనిపిస్తాయి.

ఈ లివర్ సిర్రోసిస్ వ్యాధితో బాధపడుతున్న వ్యక్తుల్లో ఇతక మార్పులు కూడా కనిపిస్తాయి. నిద్ర పట్టక ఇబ్బంది పడతారు. జ్ఞాపకశక్తి కోల్పోతారు. గందరగోళంగా ఉంటుంది. ఏ విషయం పైనా ఏకాగ్రత పెట్టలేరు. టాక్సిన్స్ మీ మెదడును ప్రభావితం చేస్తున్నప్పుడు, కాలేయం వాటిని శరీరం నుంచి బయటికి పంపిస్తుంది. కానీ ఎప్పుడైతే కాలేయం సిర్రోసిస్ వ్యాధి బారిన పడుతుందో, మెదడులోని టాక్సిన్లను బయటికి పంపలేదు. దీనివల్ల పైన చెప్పిన ఇబ్బందులు కలుగుతాయి. 

కాలేయంలో కొవ్వు చేరే ప్రమాదాన్ని పెంచే అనేక అంశాలు ఉన్నాయి. వీటిలో ముఖ్యమైనవి ఊబకాయం లేదా అధిక బరువు. ఊబకాయం బారిన పడిన వారిలో కాలేయంలో కొవ్వు పేరుకుపోతుంది. అలాగే టైప్ 2 డయాబెటిస్ ఉన్న వారిలో కూడా ఈ వ్యాధి వచ్చే అవకాశం ఉంది.  థైరాయిడ్, అధిక రక్తపోటు, అధిక కొలెస్ట్రాల్ ఉన్నవారికి కూడా ఈ నాన్ ఆల్కహాలిక్ ఫ్యాటీ లివర్ డిసీజ్ వచ్చే ఛాన్సులు ఉన్నాయి. 

గమనిక: పలు అధ్యయనాలు, పరిశోధనలు, హెల్త్ జర్నల్స్ నుంచి సేకరించిన సమాచారాన్ని మీ అవగాహన కోసం ఇక్కడ యథావిధిగా అందించాం. ఈ సమాచారం వైద్యానికి లేదా చికిత్సకు ప్రత్యామ్నాయం కాదు. ఆరోగ్యానికి సంబంధించి.. ఎలాంటి సందేహాలున్నా మీరు తప్పకుండా డాక్టర్‌ను సంప్రదించాలి. ఈ ఆర్టికల్‌లో పేర్కొన్న అంశాలకు ‘ఏబీపీ దేశం’, ‘ఏబీపీ నెట్‌వర్క్’ ఎటువంటి బాధ్యత వహించవని గమనించగలరు.