Iran New Supreme Leader: ఖమేనీ మృతి తర్వాత ఇరాన్ సుప్రీం లీడర్ ఎవరు? ఈ కీలక బాధ్యతలు ముళ్ల కిరీటమే!
Iran New Supreme Leader: ఇజ్రాయెల్, అమెరికా సంయుక్తంగా చేపట్టిన ఆపరేషన్లో ఇరాన్ సుప్రీం లీడర్ అయతుల్లా అలీ ఖమేనీ మరణంతో కుమారుడు మోజ్తబా ఖమేనీ బాధ్యతలు చేపడతాడని ప్రచారం జరుగుతోంది.
Iran New Supreme Leader: టెహ్రాన్: మిడిల్ ఈస్ట్లో ఇజ్రాయెల్, అమెరికా చేపట్టిన జాయింట్ ఆపరేషన్లో ఇరాన్ సుప్రీం లీడర్ అయతుల్లా అలీ ఖమేనీ హతమయ్యారు. మరోవైపు ఇరాన్ సైతం అందుకు ప్రతీకారం తీర్చుకునేందుకు అమెరికా సైనిక స్థావరాలు, బేస్ క్యాంపులను టార్గెట్ చేసుకుని ఎయిర్ స్ట్రైక్స్తో బదులిస్తోంది. అమెరికా, ఇజ్రాయెల్ దాడుల్లో ఖమేనీతో పాటు కుమార్తె, అల్లుడు, మనవరాలు కూడా మరణించినట్లు నివేదికలు చెబుతున్నాయి. అయితే నియంతగా పేరున్న ఖమేనీ మరణం తర్వాత ఇరాన్ సుప్రీం లీడర్ పదవిని ఎవరు చేపట్టబోతున్నారు అనేది ఉత్కంఠ రేపుతోంది.
ఇరాన్లో సుప్రీం లీడర్ పదవి ఎంత ముఖ్యమైనది?
ఇరాన్లో సుప్రీం లీడర్ అనేది దేశంలోనే అత్యంత శక్తివంతమైన పదవి. సైన్యం, న్యాయవ్యవస్థ, మీడియా, విదేశీ విధానంతో పాటు ప్రధాన వ్యూహాత్మక నిర్ణయాలపై తుది అధికారం సుప్రీం లీడర్కు ఉంటుంది. అధ్యక్షుడు ప్రభుత్వాన్ని నడిపిస్తారు, కానీ తుది నియంత్రణ సుప్రీం లీడర్ వద్దే ఉంటుంది. కనుక సుప్రీం లీడర్ మరణిస్తే, అధికార మార్పిడి ప్రశ్న వెంటనే తలెత్తుతుంది. ఇరాన్ రాజ్యాంగం ఈ పరిస్థితికి సంబంధించి స్పష్టమైన ప్రక్రియను నిర్ణయించింది.
ఖమేనీ మరణం తర్వాత ఇరాన్ అధికారాన్ని ఎవరు చేపట్టారు?
ఖమేనీ మృతి తరువాత ముగ్గురు సభ్యుల కౌన్సిల్ చేతికి దేశ పాలనా పగ్గాలు చేరినట్లు ఇరాన్ అధికారిక మీడియా ఐఆర్ఎన్ఏ ప్రకటించింది. ఈ కౌన్సిల్లో అధ్యక్షుడు మసూద్ పెజెష్కియాన్తో పాటు న్యాయ వ్యవస్థ చీఫ్, గార్డియన్ కౌన్సిల్లోని ఒక జ్యూరీ సభ్యుడితో దీనిని ఏర్పాటు చేశారు. ఈ కౌన్సిల్ తాత్కాలికంగా ఇరాన్ పాలనా బాధ్యతలు చూసుకుంటుంది. ఇరాన్ రాజ్యాంగం ప్రకారం 88 మంది సభ్యులతో కూడిన 'అసెంబ్లీ ఆఫ్ ఎక్స్పర్ట్స్' (Assembly of Experts) కొత్త సుప్రీం లీడర్ను ఎన్నుకుంటుంది. ఈ సంస్థ మతపరమైన వ్యక్తులతో నిండి ఉంటుంది. సుప్రీం లీడర్ మరణం తర్వాత, ఈ సంస్థ సమావేశమై కొత్త నాయకుడి పేరును ఖరారు చేస్తుంది. ఖమేనీ మరణం తర్వాత ఆయన కుమారుడు మోజ్తబా ఖమేనీని కొత్త సుప్రీం లీడర్గా ఎన్నుకునే అవకాశం ఉన్నట్లు సమాచారం. మరోవైపు దేశంలో 40 రోజుల సంతాప దినాలను కూడా ప్రకటించారు.
మోజ్తబా ఖమేనీ ఎవరు?
అయతుల్లా అలీ ఖమేనీ కుమారుడు మోజ్తబా ఖమేనీ 1969లో మషహద్లో జన్మించారు. ఆయన మతపరమైన వాతావరణంలో విద్యనభ్యసించారు. ఇరాన్-ఇరాక్ యుద్ధం చివరి దశలో ఆయన రివల్యూషనరీ గార్డ్స్తో కలిసి పనిచేశారు.
ఆయన చాలా కాలం నుంచి తన తండ్రికి పరిపాలనలో సలహాలు ఇస్తున్నారు. తెర వెనుక ఉండి అనేక ముఖ్యమైన నిర్ణయాలలో ఆయన కీలక పాత్ర పోషించారని నివేదికలు చెబుతున్నాయి. ఇప్పటివరకూ ఎటువంటి పెద్ద ప్రభుత్వ పదవిని చేపట్టనప్పటికీ, సైన్యంతో పాటు పారా మిలిటరీ బలగాలతో మోజ్తబా ఖమేనీకి మంచి సంబంధాలు ఉన్నాయి.
2009 నిరసనల సమయంలో తెరపైకి మోజ్తబా పేరు
2006లో ఇరాన్లో పెద్ద ఎత్తున నిరసనలు జరిగాయి. ఆ సమయంలో సుప్రీం లీడర్ అయతుల్లా ఖమేనీ కుమారుడు మోజ్తబా ఖమేనీ పేరు చర్చలోకి వచ్చింది. నిరసనలను కఠినంగా అణచివేయడంలో ఆయన పాత్ర ఉందని ఆరోపణలు సైతం వచ్చాయి. ఇప్పుడు ఆయన ఇరాన్ సుప్రీం లీడర్ బాధ్యతలు స్వీకరిస్తారని దేశంలో రాజకీయ చర్చ మొదలైంది. 1979 నాటి ఇస్లామిక్ విప్లవం సమయంలో వంశపారంపర్యంగా అధికారాన్ని ఇవ్వడాన్ని వ్యతిరేకించారు. అందువల్ల, ఆయన ఎంపికపై కొందరు ప్రశ్నలు లేవనెత్తుతున్నారు.
ఇతర అభ్యర్థులు ఎవరు?
సుప్రీం లీడర్ పదవి కోసం అనేక పేర్లు తెరమీదకు వస్తున్నాయి.
హుజ్జత్-ఉల్-ఇస్లాం మొహ్సిన్ కౌమీ: ఈయనను ఖమేనీకి సన్నిహిత సలహాదారుగా భావిస్తారు.
అయతుల్లా అలీరెజా అరాఫీ: ఈయన ఇరాన్ మదర్సా వ్యవస్థకు అధిపతి మరియు గార్డియన్ కౌన్సిల్ సభ్యుడు.
అయతుల్లా మొహ్సిన్ అరాకీ: ఈయన అసెంబ్లీ ఆఫ్ ఎక్స్పర్ట్స్లో పాత సభ్యుడు.
జి.హెచ్. మొహ్సేనీ ఎజేయీ: ఈయన ప్రస్తుతం న్యాయవ్యవస్థ అధిపతిగా ఉన్నారు.
అయినప్పటికీ, తాజా నివేదికల ప్రకారం అయతుల్లా అలీ ఖమేనీ కుమారుడు మోజ్తబా ఖమేనీ ఇరాన్ తదుపరి సుప్రీం లీడర్గా ఎంపికైనట్లు స్థానిక మీడియాలో కథనాలు వస్తున్నాయి. అయితే అధికారిక ప్రకటన రావాల్సి ఉంది.
టాప్ హెడ్ లైన్స్
ట్రెండింగ్ వార్తలు
