India vs West Indies T20 World Cup Team India Batting Lineup | భార‌త అసిస్టెంట్ కోచ్ కీల‌క వ్యాఖ్య‌లు

టీ20 ప్రపంచకప్ 2026లో ( T20 World Cup ) కోల్‌కతాలోని చారిత్రాత్మక ఈడెన్ గార్డెన్స్ వేదికగా భారత్, వెస్టిండీస్ జట్లు సెమీస్ బెర్తు కోసం తలపడనున్నాయి. జింబాబ్వేపై భారత్ ఘనవిజయం సాధించడం, సౌతాఫ్రికా చేతిలో విండీస్ ఓడిపోవడంతో ఈ మ్యాచ్ ఇప్పుడు 'క్వార్టర్ ఫైనల్'గా మారింది. ఈ కీలక పోరుకు ముందు భారత అసిస్టెంట్ కోచ్ ర్యాన్ టెన్ డస్కాటే చేసిన వ్యాఖ్యలు ఇప్పుడు నెట్టింట వైరల్ అవుతున్నాయి.

టెన్ డస్కాటే మాట్లడుతూ .. జట్టులో ఎలాంటి ఒత్తిడి లేదని స్పష్టం చేశాడు. వెస్టిండీస్ బ్యాటింగ్ బలం గురించి తమకు పూర్తి అవగాహన ఉందని, వారిని ఎలా అడ్డుకోవాలో ప్రణాళికలు సిద్ధం చేశామని ధీమా వ్యక్తం చేశాడు. దేశం తరఫున ఆడటం ఎంత గౌరవమో, ఈడెన్ గార్డెన్స్‌లో విజయం సాధించడం ఎంత ముఖ్యమో ప్లేయర్స్ కు గుర్తు చేస్తున్నామని ఆయన పేర్కొన్నాడు.

వెస్టిండీస్ జట్టుకు లోతైన బ్యాటింగ్ లైనప్ ఉందని టెన్ డస్కాటే హెచ్చరించాడు. అయితే భారత బ్యాటింగ్ డెప్త్ కూడా తక్కువ కాదని ఆయన గుర్తు చేశాడు. గత మ్యాచ్‌లో ఐదో స్థానంలో ఆడిన తిలక్ వర్మపై కోచ్ ప్రశంసలు కురిపించాడు. తిలక్ ఏ స్థానంలోనైనా సౌకర్యవంతంగా ఆడగలడని, పరిస్థితులను బట్టి తనను ఎక్కడైనా పంపే అవకాశం ఉందని హింట్ ఇచ్చాడు. టాప్ ఆర్డర్‌లో సంజూ శాంసన్ ప్రయోగం ఫలించడం తమకు కలిసొచ్చే అంశమని చెప్పాడు. మ్యాచ్ పరిస్థితులను బట్టి చివరి నిమిషంలో కాంబినేషన్‌ను మార్చుకోవడానికి కూడా సిద్ధంగా ఉన్నామని కోచ్ వెల్లడించాడు.