PCOS అంటే ఏమిటీ? హార్మోన్లు సమతుల్యత కోసం ఎలాంటి ఫుడ్ తీసుకోవాలి?

మహిళలు ఎదుర్కొంటున్న సాధారణ సమస్యల్లో పీసీఓఎస్ ఒకటి. దీని వల్ల గర్భం దాల్చడం చాలా కష్టం అవుతుంది.

Image Credit: Pixabay

ప్రతి పది మంది మహిళల్లో నలుగురు అనుభవించే సాధారణ ఆరోగ్య పరిస్థితి పాలిసిస్టిక్ ఓవరీ సిండ్రోమ్(PCOS). ఇది ఓ దీర్ఘకాలిక సమస్య. దీని వల్ల హార్మోన్ల సమతుల్యత లోపిస్తుంది. రుతుక్రమం సరిగా రాకపోవడం వల్ల గర్భం దాల్చడం కష్టం అవుతుంది. అందాలు విడుదల అవడం తగ్గిపోతుంది. ఒకవేళ గర్భం ధరించినా అది ఎంతో కాలం నిలవదు. ఈ సమస్యని సకాలంలో గుర్తించి చికిత్స తీసుకోకపోతే తీవ్ర సమస్యలు ఎదుర్కోవాల్సి వస్తుంది. కొంతమందికి శాశ్వతంగా పిల్లలు పుట్టే అవకాశాన్ని కోల్పోవాల్సి వస్తుంది. పీసీఓఎస్ ప్రభావాన్ని తగ్గించడానికి ఆహారం సహాయపడుతుంది పరిశోధనలో తేలింది. ఈ సమస్య ఉన్న రోగుల్లో ఇన్సులిన్ నిరోధకత తరచుగా సంభవిస్తుంది.

పీసీఓఎస్ సమస్య ఉన్న వాళ్ళులో 50 శాతం మందికి మధుమేహం లేదా ప్రీ డయాబెటిస్ వచ్చే అవకశాలు ఎక్కువగా ఉంటున్నాయి. టెస్టోస్టెరాన్, డైహైడ్రోటెస్టోస్టెరాన్, మొటిమలు, జుట్టు రాలడం, హిర్సుటిజం, క్రమరహిత పీరియడ్స్ ఈ సమస్య లక్షణాలు. ఈ సమస్య ఉన్న వాళ్ళు మందులతోనే కాదు ఆహారంతో కూడా దాని నుంచి బయట పడొచ్చు. ఆరోగ్యరకరమైన బరువు, ఇన్సులిన్ స్థాయిలని పెంచుకోవడానికి పోషకాహారం తీసుకోవాలి. కార్బోహైడ్రేట్లు అధికంగా ఉండే ఆహారాన్ని తీసుకోవడం తగ్గించాలి. ఈ ఆహార పదార్థాలని డైట్ లో భాగం చేసుకోవడం వల్ల మంచి ఫలితాలు పొందుతారు.

గుమ్మడి కాయ: టెస్టోస్టెరాన్‌ను DHTగా మార్చడాన్ని నిరోధించే ఎంజైమ్‌ను కలిగి ఉంటుంది. ఇది మొటిమలు, జుట్టు రాలడం సమస్యల్ని తగ్గించేందుకు సహాయపడుతుంది. హార్మోన్ల పనితీరుని నియంత్రించడంలో సహాయపడే ముఖ్యమైన కొవ్వు ఆమ్లాలని కలిగి ఉంటుంది.

పుదీనా టీ: ప్రతిరోజు 2 కప్పుల స్పియర్మింట్ టీ తాగడం వల్ల టెస్టోస్టెరాన్ వంటి ఆండ్రోజెన్ లని తగ్గించడంలో సహాయపడుతుంది. దీని మరిన్ని ప్రయోజనాలు పొందటం కోసం వేడి లేదా ఐస్ వేసుకుని తాగొచ్చు.

అవిసె గింజలు: హిర్సుటిజం, మొటిమలు సమస్యల్ని తగ్గించేందుకు ఇవి దోహదపడతాయి. వీటినో స్మూతిస్, సలాడ్ పైన చల్లుకుని తినొచ్చు. ఇవి టెస్టోస్టెరాన్ స్థాయిలని తగ్గిస్తాయి.

సాల్మన్: ఒమేగా 3 కొవ్వు ఆమ్లాలు పుష్కలంగా ఉన్నందున టెస్టోస్టెరాన్, వాపు, కొలెస్ట్రాల్ ని తగ్గించడంలో సహాయపడతాయి. ఇన్సులిన్ నిరోధకతని మెరుగుపరచడానికి దోహదపడతాయి.

వాల్ నట్స్: సెక్స్ హార్మోన్ బైండింగ్ గ్లోబులిన్ ని పెంచుతుంది. ఇది టెస్టోస్టెరాన్ తగ్గించేందుకు సహాయపడుతుంది. వీటిని నానబెట్టుకుని తినడం వల్ల శరీరానికి కావాల్సిన పోషకాలు అందుతాయి. ఇందులో ఒమేగా 3 కొవ్వు ఆమ్లాలు సమృద్ధిగా ఉంటాయి.

సార్డినెస్: ఒమేగా 3 కొవ్వు ఆమ్లాలు వీటిలో పుష్కలంగా లభిస్తాయి. ఇవి కూడా టెస్టోస్టెరాన్ ని తగ్గియించి పీరియడ్స్ సక్రమంగా వచ్చేలా మెరుగుపరుస్తాయి.

బాదంపప్పు: మోనోఅన్ శాచురేటెడ్ కొవ్వులు పుష్కలంగా ఉన్నాయి. ఇవి ఆండ్రోజెన్ ఇండెక్స్, టెస్టోస్టెరాన్ స్థాయిలని తగ్గించగలవు. మొటిమలు, మొహం మీద వెంట్రుకలు తగ్గిస్తాయి. ఆండ్రోజెన్ అనేది మగ హార్మోన్. దీని స్థాయిలు పెరగడం వల్ల చాలా సమస్యలు వస్తాయి. 

గమనిక: పలు అధ్యయనాలు, పరిశోధనలు, హెల్త్ జర్నల్స్ నుంచి సేకరించిన సమాచారాన్ని మీ అవగాహన కోసం ఇక్కడ యథావిధిగా అందించాం. ఈ సమాచారం వైద్యానికి లేదా చికిత్సకు ప్రత్యామ్నాయం కాదు. ఆరోగ్యానికి సంబంధించి.. ఎలాంటి సందేహాలున్నా మీరు తప్పకుండా డాక్టర్‌ను సంప్రదించాలి. ఈ ఆర్టికల్‌లో పేర్కొన్న అంశాలకు ‘ఏబీపీ దేశం’, ‘ఏబీపీ నెట్‌వర్క్’ ఎటువంటి బాధ్యత వహించవని గమనించగలరు.