అన్వేషించండి

Chiranjeevi: 'సిరివెన్నెల' కోసం అయ్యప్పమాల తీసి మరీ వచ్చిన చిరంజీవి... ఆస్పత్రిలో చేరడానికి ముందు ఫోనులో మాట్లాడగా!

సిరివెన్నెల సీతారామశాస్త్రికి చివరి చూపు కోసం చిరంజీవి కిమ్స్ ఆస్పత్రికి వెళ్లారు. కొన్ని రోజులుగా ఆయన అయ్యప్ప మాలలో కనిపిస్తున్నారు. ఇప్పుడు మాల తీసేసి ఆస్పత్రికి వచ్చారు.

By : ABP Desam | Updated at : 30 Nov 2021 08:05 PM (IST)

I Spoke to Sirivennela before he admitted in the hospital, says Chiranjeevi and he remembers the association with late lyricist Chiranjeevi: 'సిరివెన్నెల' కోసం అయ్యప్పమాల తీసి మరీ వచ్చిన చిరంజీవి... ఆస్పత్రిలో చేరడానికి ముందు ఫోనులో మాట్లాడగా!

చిరంజీవి

'సిరివెన్నెల' సీతారామశాస్త్రి ఆస్పత్రిలో చేరడానికి ముందు ఆయనతో ఫోనులో మాట్లాడానని మెగాస్టార్ చిరంజీవి తెలిపారు. "ఆస్పత్రిలో చేరే ముందు నాతో సిరివెన్నెల 'నెలాఖరుకు వస్తాను. వచ్చిన తర్వాత మీరు చెప్పినట్టుగా చెన్నైలో అత్యాధునిక చికిత్స అందుబాటులో ఉన్న ఆస్పత్రికి వెళ్దాం. మీరు తీసుకువెళ్లండి' అన్నారు. ఈ రోజు ఆస్పత్రి నుంచి వస్తారని అనుకున్నాను. కానీ, జీవం లేకుండా వస్తారని అసలు ఊహించలేదు. చాలా బాధగా అనిపిస్తోంది" అని కిమ్స్ ఆస్పత్రి దగ్గర చిరంజీవి మాట్లాడారు.

'సిరివెన్నెల' మరణవార్త తెలిసిన వెంటనే... ఆయన్ను చివరి చూపు చూడటం కోసం చిరంజీవి కిమ్స్ ఆస్పత్రికి వెళ్లారు. ఈమధ్య చిరంజీవి అయ్యప్పమాల ధరించిన సంగతి తెలిసిందే. ఆయన కొత్త సినిమా ప్రారంభోత్సవానికి, ఇతర ఫంక్షన్స్ కు అయ్యప్పమాలలో హాజరయ్యారు. అయితే... కిమ్స్ ఆస్పత్రికి మాల తీసేసి వచ్చారు.

చిరంజీవి మాట్లాడుతూ "ఆస్పత్రిలో చేరే ముందు ఆయనతో అరగంట మాట్లాడాను. ఎప్పటిలా హుషారుగా, ఎనర్జీతో మాట్లాడారు. ఆయన తిరిగొస్తారని అనుకున్నాను. ఆయన నాకు ఎన్నో పాటలు రాశారు. అందులో కొన్ని పాటలు వింటుంటే తృప్తిగా ఉంటుంది. నన్ను ఎప్పుడూ మిత్రమా అని పిలిచేవారు. మేం ఒకే ఏడాది పుట్టాం. మాది ప్రత్యేక బంధం. ఆ రోజు నేను మాట్లాడినప్పుడు త్రివిక్రమ్ శ్రీనివాస్ పక్కన ఉన్నారట. ఆ విషయం ఇప్పుడు చెప్పారు. నేను సిరివెన్నెలగారి అమ్మాయితో కూడా మాట్లాడాను. 'నాన్నగారు వచ్చేస్తారండీ' అని చెప్పారు. ఈ రోజు ఒక గొప్ప కవి వృక్షం కోల్పోయిందని చెప్పాలి. ఆయనలో శ్రీశ్రీ లో ఉన్నంత ఆవేశం ఉంది. వేటూరిలో ఉన్నటువంటి అర్థవంతమైన సాహిత్యం ఉంది. ఆయనలో అన్ని రకాల కోణాలు ఉన్నాయి. శ్రీశ్రీని, వేటూరిని కలబోసిన మనిషి అని చెప్పవచ్చు. తెలుగు సాహిత్యానికి సంబంధించి లాస్ట్ లెజెండ్... సిరివెన్నెల. ఏ పూటకు ఆ పూట, ఏ పాటకు ఆ పాట లాంటి కవి ఉంటారేమో కానీ, ఆయన లాంటి మహా కవి ఇక రారు. ఆయన లోటు ఎవరూ తీర్చలేనిది" అని అన్నారు. ఆస్పత్రి దగ్గర చిరంజీవి వెంట త్రివిక్రమ్ ఉన్నారు.

చిరంజీవి హీరోగా నటించిన ఎన్నో చిత్రాలకు 'సిరివెన్నెల' సీతారామశాస్త్రి పాటలు రాశారు. 'రుద్రవీణ'లో ఆయన రాసిన పాటలను ఎవరూ అంత త్వరగా మరువలేరు. చిరంజీవి కుటుంబం నుంచి హీరోలుగా వచ్చిన పవన్ కల్యాణ్, రామ్ చరణ్, అల్లు అర్జున్, వరుణ్ తేజ్, సాయి ధరమ్ తేజ్ తదితరుల సినిమాల్లోనూ పాటలు రాశారు.