Chiranjeevi's Vishwambhara: 'విశ్వంభర'లో సిస్టర్ సెంటిమెంట్.. చిరుకి ఐదుగురు చెల్లెళ్లు? హిట్లర్ మ్యాజిక్ ను రిపీట్ చేస్తారా?

Chiranjeevi's Vishwambhara: చిరంజీవి - వశిష్ట కాంబినేషన్ లో రూపొందుతున్న సోషియో ఫాంటసీ మూవీ 'విశ్వంభర'. ఈ చిత్రానికి సంబంధించిన ఓ ఆసక్తికరమైన న్యూస్ చక్కర్లు కొడుతోంది.

'విశ్వంభర' - చిరంజీవి (Image Credit: X)

Chiranjeevi's Vishwambhara: మెగాస్టార్ చిరంజీవి హీరోగా మల్లిడి వశిష్ట దర్శకత్వంలో తెరకెక్కుతోన్న తాజా చిత్రం 'విశ్వంభర'. ఇందులో త్రిష కృష్ణన్ హీరోయిన్ గా నటిస్తోంది. ఇప్పటికే రిలీజైన టైటిల్ అండ్ కాన్సెప్ట్ వీడియో విశేషంగా ఆకట్టుకున్నాయి. ప్రస్తుతం ఈ సినిమా షూటింగ్ శరవేగంగా జరుగుతోంది. అయితే ఇప్పుడు ఈ మూవీకి సంబంధించిన ఓ న్యూస్ సోషల్ మీడియాలో చక్కర్లు కొడుతోంది. అదేంటంటే.. ఈ చిత్రంలో సిస్టర్ సెంటిమెంట్ కూడా ప్రధానంగా ఉంటుందని, ఇందులో చిరుకి ఐదుగురు చెల్లెల్లు ఉంటారనే ఊహాగానాలు వినిపిస్తున్నాయి. 

'విశ్వంభర' అనేది పంచభూతాల కాన్సెప్ట్ తో రూపొందిస్తున్న సోషియో ఫాంటసీ అడ్వెంచర్ మూవీ. టైటిల్ పోస్టర్ తో ఈ విషయంపై క్లారిటీ వచ్చేసింది. అయితే ఇందులో అన్నా చెల్లెళ్ళ సెంటిమెంట్ కూడా మిళితమై ఉంటుందట. ఈ సినిమాలో పూలరంగడు ఫేమ్ ఈషా చావ్లా, ఎక్స్ ప్రెస్ రాజా ఫేమ్ సురభి కీలక పాత్రలు పోషిస్తున్నట్లు వార్తలు వచ్చాయి. అయితే ఈ హీరోయిన్లను తీసుకుందని చిరంజీవి చెల్లెళ్ళ పాత్రల కోసమే అని అంటున్నారు. వీరితో పాటుగా మరో ముగ్గురు కథానాయికలు కూడా సిస్టర్ రోల్స్ కనిపిస్తారని రూమర్స్ ప్రచారంలో ఉన్నాయి. 

గతంలో ముత్యాల సుబ్బయ్య దర్శకత్వంలో చిరంజీవి నటించిన 'హిట్లర్' సినిమాలో ఐదుగురు చెల్లెల్లు ఉంటారనే సంగతి తెలిసిందే. 1997లో వచ్చిన ఈ చిత్రం బాక్సాఫీస్ వద్ద హిట్టయింది. మళ్ళీ ఇన్నాళ్లకు ఇప్పుడు 'విశ్వంభ‌ర‌' మూవీలో మెగాస్టార్ కు 5గురు సిస్టర్స్ ఉంటారని అంటున్నారు. ఇందులో నిజమెంతనేది తెలియాల్సి ఉంది. ఇక ఈ సినిమాలో 'గుంటూరు కారం' ఫేమ్ మీనాక్షి చౌదరి ఓ కీలక పాత్ర పోషించనుందని సమాచారం. అలానే మాంత్రికుడి రోల్ లో రావు రమేశ్ కనిపిస్తారని టాక్ వచ్చింది. 

'భోళా శంకర్' డిజాస్టర్ తర్వాత రాబోతున్న 'విశ్వంభ‌ర‌' సినిమాతో చిరంజీవి సాలిడ్ హిట్ కొట్టి స్ట్రాంగ్ కంబ్యాక్ ఇవ్వాలని మెగా ఫ్యాన్స్ కోరుకుంటున్నారు. 'బింబిసార' తర్వాత వసిష్ఠ నుంచి వస్తోన్న చిత్రం కావడంతో అందరిలో మంచి అంచనాలే ఉన్నాయి. దీనికి తగ్గట్టుగానే ప్రీ రిలీజ్ బిజినెస్ జరుగుతోంది. చిరు సెట్స్ లో అడుగుపెట్టకముందే ఈ మూవీ ఓవర్ సీస్ హక్కులు భారీ రేటుకి అమ్ముడయ్యాయి. సరిగమ సంస్థ దాదాపు 18 కోట్లకు రైట్స్ కొనుగోలు చేసినట్లు తెలుస్తోంది. 

'విశ్వంభ‌ర‌' సోషియో ఫాంటసీ కథ కాబట్టి సినిమాలో వీఎఫ్ఎక్స్ స్పెషల్ గా ఉండేలా చూసుకుంటున్నారు. ఇప్పటికే భారీగా ఖర్చు చేసి హైదరాబాద్ లో పెద్ద పెద్ద సెట్లు నిర్మించారు. నిర్మాతలు ఖర్చుకు ఏమాత్రం వెనకాడకుండా భారీ బడ్జెట్ పెడుతున్నట్లుగా టాక్. యూవీ క్రియేషన్స్ బ్యానర్ లో వంశీ కృష్ణ, ప్రమోద్ ఉప్పలపాటి, విక్రమ్ రెడ్డి ఈ చిత్రాన్ని ప్రతిష్టాత్మకంగా నిర్మిస్తున్నారు. ఆస్కార్ విన్నర్ ఎంఎం కీరవాణి సంగీతం సమకూరుస్తుండగా.. చోటా కె నాయుడు సినిమాటోగ్రఫీ నిర్వహిస్తున్నారు. కోటగిరి వెంకటేశ్వరరావు ఎడిటింగ్ చేస్తున్నారు. 

సంక్రాంతి కానుకగా 2025 జనవరి 10న 'విశ్వంభ‌ర‌' సినిమాని ప్రపంచ వ్యాప్తంగా విడుదల చేయడానికి మేకర్స్ సన్నాహాలు చేస్తున్నారు. దీనికి తగ్గట్టుగానే షూటింగ్ జరుపుతున్నారు. రానున్న రోజుల్లో ఈ క్రేజీ చిత్రానికి సంబంధించిన ఆసక్తికరమైన అప్డేట్లు రాబోతున్నాయి.