మణిపూర్‌ జంటపై దుండగులు దాడి, అర్ధరాత్రి నడివీధిలోకి లాక్కొచ్చి దారుణం

Delhi Crime: ఢిల్లీలో మణిపూర్‌ జంటపై కొందరు దుండగులు దారుణంగా దాడి చేశారు.

ఢిల్లీలో మణిపూర్‌ జంటపై కొందరు దుండగులు దారుణంగా దాడి చేశారు.

Manipur Couple Beaten: 

ఢిల్లీలో ఘటన..

మణిపూర్‌కి చెందిన నలుగురు పౌరులపై ఢిల్లీలో అర్ధరాత్రి నడివీధిలో దాడి జరిగింది. 8-9 మంది గుంపుగా వచ్చి వాళ్లపై దాడి చేశారు. నవంబర్ 30 న రాత్రి ఈ ఘటన జరిగినట్టు పోలీసులు వెల్లడించారు. ఈ దాడికి సంబంధించిన వీడియో వైరల్ అయింది. దాడి జరుగుతుండగా పై నుంచి ఓ వ్యక్తి మొబైల్‌లో అదంతా రికార్డ్ చేశాడు. ఈ వీడియో ఆధారంగా కేసు నమోదు చేసిన పోలీసులు విచారణ చేపడుతున్నారు. లైంగిక వేధింపుల కేసు కూడా పెట్టారు. అక్కడి సీసీ కెమెరాలోనూ ఈ ఘటనకు సంబంధించి దృశ్యాలు రికార్డ్ అయ్యాయి. ఇద్దరి ముఖం చాలా స్పష్టంగా కనిపించింది. మిగతా వాళ్లు ఎవరని కనుగొనే పనిలో పడ్డారు పోలీసులు. బాధితుల్లో మణిపూర్‌కి చెందిన ఓ జంటతో పాటు ఓ మహిళ, ఫ్యామిలీ ఫ్రెండ్ ఉన్నారు. ఆ గుర్తు తెలియని దుండగులు వాళ్లను ఇష్టమొచ్చినట్టు కొట్టారు. రోడ్డుమీదకు లాక్కొచ్చారు. 

"నేను, నా భార్య, నా చెల్లి అందరం కలిసి మా ఫ్యామిలీ ఫ్రెండ్‌ని ఇంటి దగ్గర దిగబెట్టేందుకు రాత్రి 11 గంటలకు వచ్చాం. ఆ సమయంలోనే ముగ్గురు వ్యక్తులు మా దగ్గరికి వచ్చారు. మొబైల్ బ్యాటరీ అయిపోయిందని చెప్పారు. క్యాబ్ బుక్ చేసుకోడానికి సాయం చేయాలని అడిగారు. సరే అని క్యాబ్ బుక్ చేస్తుంటే ఉన్నట్టుండి వాళ్లు నా భార్య, నా చెల్లిపై అసభ్యకరమైన కామెంట్స్ చేయడం మొదలు పెట్టారు. వెంటనే మేం రియాక్ట్ అయ్యాం. ఆ కోపంతో మాపై వాళ్లు దాడికి దిగారు. మరి కొంత మందికి కాల్ చేశారు. వాళ్లూ వచ్చి మమ్మల్ని దారుణంగా కొట్టారు"

- బాధితుడు

నిందితుల కోసం గాలింపు..

తన జుట్టు పట్టుకుని రోడ్డుపైకి ఈడ్చుకుంటూ వెళ్లారని బాధిత మహిళ చెప్పింది. చంపేస్తారేమో అన్నంత భయం వేసిందని, అంతగా కొట్టారని ఆవేదన వ్యక్తం చేసింది. ఈ ఘటనలో నలుగురు బాధితులకీ తీవ్ర గాయాలయ్యాయి. నిందితులందరినీ పట్టుకునేందుకు గాలింపు మొదలు పెట్టినట్టు పోలీసులు వెల్లడించారు.