India Post Payment Bank: లిమిట్‌ దాటి డబ్బు జమ చేసినా.. తీసినా.. పోస్టాఫీసులో రుసుము తప్పదు!

ఐపీపీబీలో ఇకపై పరిమితి దాటి జమ చేసినా, డబ్బులు తీసినా రుసుము చెల్లించాల్సి ఉంటుంది. ఏ ఖాతాపై ఎలాంటి మినహాయింపులు ఉన్నాయంటే..!

IPPB

లావాదేవీలపై ఆర్థిక సంస్థలన్నీ పరిమితులు విధిస్తున్నాయి. ఇంతకు ముందే బ్యాంకులు ఏటీఎం విత్‌డ్రావల్స్‌పై రుసుములు పెంచిన సంగతి తెలిసిందే. తాజాగా ఇండియా పోస్ట్‌ పేమెంట్స్‌ బ్యాంక్‌ (IPPB) సైతం ఇదే బాటలో నడిచింది. లావాదేవీలపై పరిమితులు విధించి రుసుములు పెంచింది. 2022, జనవరి 1 నుంచి ఇవి అమల్లోకి రానున్నాయి.

కొత్త ఏడాది నుంచి సాధారణ సేవింగ్స్‌ ఖాతాపై నెలకు కేవలం నాలుగు సార్లు మాత్రమే ఉచితంగా విత్‌డ్రా చేసుకొనేందుకు వీలుంది. అంతకు మించి లావాదేవీలు చేపడితే ఒక్కో లావాదేవీపై కనీసం రూ.25 లేదా విత్‌డ్రా చేసే మొత్తంలో విలువపై 0.50 శాతం రుసుము వసూలు చేస్తారు. పైగా జీఎస్‌టీ, సుంకాలు అదనంగా ఉంటాయి. నగదు డిపాజిట్లపై మాత్రం ఎలాంటి రుసుములు విధించరు.

సాధారణం కాకుండా మిగిలిన సేవింగ్స్‌, కరెంట్‌ ఖాతాల నుంచి నెలకు రూ.25,000 వరకు ఉచితంగా లావాదేవీలు చేయొచ్చు. పరిమితి దాటితే ఒక్కో లావాదేవీపై రూ.25 లేదా విత్‌డ్రా చేసే మొత్తం విలువపై 0.50 శాతం వరకు రుసుము తీసుకుంటారు. మరో విషయం ఏంటంటే ఈ ఖాతాల్లో నెలకు రూ.10,000 వరకు చేసే డిపాజిట్లపై ఫీజు తీసుకోరు. లిమిట్‌ దాటితే మాత్రం రూ.25 లేదా 0.50 శాతం రుసుము చెల్లించక తప్పదు.

పోస్టాఫీసు ఏటీఎం లావాదేవీలపై అక్టోబర్లోనే పరిమితులు విధించి రుసుములు పెంచిన సంగతి తెలిసిందే.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి