తక్కువ పెట్రోల్తో ఎక్కువ మైలేజ్ - టాప్-5 లిస్ట్లో 4 మారుతి కార్లు
పెట్రోల్ ధరలు కొండెక్కి కూర్చున్న తరుణంలో ఎక్కువ మైలేజ్ ఇచ్చే కార్లు అందరికీ అవసరమే. 28.65 kmpl ఇచ్చే మారుతి కారు నుంచి హోండా సిటీ హైబ్రిడ్ వరకు టాప్ 5 కార్ల పూర్తి వివరాలు తెలుసుకోండి.
Most Fuel Efficient Cars India 2026: ఇప్పటి పరిస్థితుల్లో, కారు కొనేటప్పుడు చాలామంది ముందుగా చూసేది మైలేజ్. పెట్రోల్, డీజిల్ ధరలు ఇప్పటికే పీక్ స్టేజ్లో ఉన్నాయి, ఇంకా ఎంత పెరుగుతాయో చెప్పలేం. రోజూ ఆఫీస్ వెళ్లే వాళ్లు, ఫ్యామిలీ ట్రిప్స్ చేసే వాళ్లు, హైవే ప్రయాణాలు చేసే వాళ్లు - అందరికీ తక్కువ ఇంధన ఖర్చు చాలా ముఖ్యం. అందుకే ఎక్కువ మైలేజ్ ఇచ్చే కార్లు ఎప్పుడూ డిమాండ్లో ఉంటాయి. ప్రస్తుతం, మన మార్కెట్లో అత్యధిక మైలేజ్ ఇస్తున్న టాప్ 5 కార్లు ఇవే:
1) మారుతి సుజుకి విక్టోరిస్ హైబ్రిడ్ - 28.65 kmpl
ఈ జాబితాలో ఫస్ట్ ప్లేస్లో ఉన్నది మారుతి సుజుకి విక్టోరిస్ హైబ్రిడ్. కంపెనీ డేటా ప్రకారం ఇది లీటరుకు 28.65 కిలోమీటర్ల మైలేజ్ ఇస్తుంది. ఇందులో 1.5 లీటర్ స్ట్రాంగ్ హైబ్రిడ్ పెట్రోల్ ఇంజిన్ ఉంటుంది. 116 hp పవర్, 144 Nm టార్క్ ఇస్తుంది. e-CVT గేర్బాక్స్తో వస్తుంది. అదనంగా 1.5 లీటర్ నేచురల్లి ఆస్పిరేటెడ్ పెట్రోల్, AWD, CNG ఆప్షన్లు కూడా ఉన్నాయి.
ఫీచర్లలో వెంటిలేటెడ్ ఫ్రంట్ సీట్లు, సన్రూఫ్, 10.25 అంగుళాల డిజిటల్ క్లస్టర్, 10.1 అంగుళాల టచ్స్క్రీన్, 360 డిగ్రీ కెమెరా, లెవల్ 2 ADAS వంటి సేఫ్టీ ఫీచర్లు ఉన్నాయి.
2) మారుతి సుజుకి గ్రాండ్ విటారా / టయోటా హైరైడర్ - 27.97 kmpl
మారుతి సుజుకి గ్రాండ్ విటారా, టయోటా హైరైడర్ రెండూ ఒకే ప్లాట్ఫామ్పై తయారైనవే. స్ట్రాంగ్ హైబ్రిడ్ వేరియంట్ మైలేజ్ 27.97 kmpl. 1.5 లీటర్ హైబ్రిడ్ ఇంజిన్ 116 hp పవర్ ఇస్తుంది. e-CVT గేర్బాక్స్తో అందుబాటులో ఉంటుంది. అలాగే మాన్యువల్, AWD, CNG ఆప్షన్లు కూడా ఉన్నాయి.
3) హోండా సిటీ e HEV - 27.26 kmpl
ఈ జాబితాలో ఉన్న ఏకైక సెడాన్ హోండా సిటీ e HEV. ఇది లీటరుకు 27.26 km మైలేజ్ ఇస్తుంది. 1.5 లీటర్ అట్కిన్సన్ సైకిల్ ఇంజిన్కు రెండు ఎలక్ట్రిక్ మోటార్లు జత చేశారు. మొత్తం 125 hp పవర్, 253 Nm టార్క్ ఇస్తుంది. e-CVT గేర్బాక్స్తో వస్తుంది. 8 అంగుళాల టచ్స్క్రీన్, కనెక్టెడ్ కార్ టెక్నాలజీ, సన్రూఫ్, TFT క్లస్టర్ వంటి ఫీచర్లు ఉన్నాయి.
4) మారుతి సుజుకి సెలేరియో - 26 kmpl
తక్కువ ధరలో ఎక్కువ మైలేజ్ కోరుకునే వారికి సెలేరియో మంచి ఎంపిక. 1.0 లీటర్, 3 సిలిండర్ పెట్రోల్ ఇంజిన్ 69 hp పవర్ ఇస్తుంది. 5 స్పీడ్ మాన్యువల్ లేదా AMT గేర్బాక్స్ ఆప్షన్ ఉంటుంది. 7 అంగుళాల టచ్స్క్రీన్, ఆండ్రాయిడ్ ఆటో, ఆపిల్ కార్ప్లే సపోర్ట్ వంటి ఫీచర్లు ఉన్నాయి.
5) మారుతి సుజుకి స్విఫ్ట్ - 25.75 kmpl
స్విఫ్ట్ కూడా మంచి మైలేజ్ ఇస్తుంది. 1.2 లీటర్ Z సిరీస్ పెట్రోల్ ఇంజిన్ 82 hp పవర్, 112 Nm టార్క్ ఇస్తుంది. 9 అంగుళాల టచ్స్క్రీన్, వైర్లెస్ కార్ప్లే, కనెక్టెడ్ కార్ టెక్, రియర్ పార్కింగ్ కెమెరా వంటి ఫీచర్లు ఉన్నాయి.
మైలేజ్ విషయంలో హైబ్రిడ్ టెక్నాలజీ ఉన్న కార్లు ముందంజలో ఉన్నాయి. అయితే మీ బడ్జెట్, వాడకం ఆధారంగా సరైన ఎంపిక చేసుకోవాలి. రోజూ ఎక్కువ ప్రయాణం చేసేవాళ్లకు ఎక్కువ మైలేజ్ కారు తీసుకోవడం వల్ల దీర్ఘకాలంలో మంచి ఆదా అవుతుంది.
గమనిక: ఈ కథనంలో చెప్పిన మైలేజ్ వివరాలు ఆయా కంపెనీల అధికారిక డేటా నుంచి తీసుకున్నవి. నిజ జీవిత వాడకంలో ఈ మైలేజ్ తగ్గవచ్చు.
ఇంకా ఇలాంటి ఆటోమొబైల్ వార్తలు & అప్డేట్స్ - "ABP దేశం" 'ఆటో' సెక్షన్ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
