Nellore News: నెల్లూరు కార్పేరేషన్ ఎన్నికల్లో టీడీపీకి షాక్..

నెల్లూరు కార్పొరైషన్ ఎన్నికల్లో ఓట్లు గల్లంతు కొత్త దుమారం రేపుతోంది. ఏకంగా అభ్యర్థులు అనుకున్న వారి ఓటే లేకపోవడం సంచలనంగా మారింది.

అధికారుల ఎదుట టీడీపీ నేతల ధర్నా

నెల్లూరు కార్పొరేషన్ ఎన్నికల్లో నామినేషన్లకు ముందే టీడీపీకి పెద్ద షాక్ తగిలింది. టీడీపీ అభ్యర్థులుగా నామినేషన్లు వేసే వారి పేర్లు ఓటర్ల లిస్ట్‌లో లేవు. దీంతో ఆయా అభ్యర్థులు నెల్లూరు కార్పొరేషన్ కార్యాలయం ముందు ఆందోళనకు దిగారు. ఓటర్ల లిస్ట్ లో తమ పేర్లు లేకుండా చేసి, నామినేషన్ల వేళ వైసీపీ నీచ రాజకీయాలకు పాల్పడుతోందని మండిపడ్డారు. అధికార పార్టీ నేతల ఒత్తిడి వల్లే కార్పొరేషన్ అధికారులు ఇలా చేశారని ఆరోపిస్తున్నారు. ఓటర్ల లిస్ట్ లో తమ పేర్లు చేర్చే వరకు ఆందోళన విరమించేది లేదన్నారు. 

వాస్తవానికి నెల్లూరు కార్పొరేషన్ ఎన్నికల వాయిదా కోసం టీడీపీ ప్రయత్నాలు చేసింది. డివిజన్ల విభజనలో అధికార పార్టీ తమకు అనుకూలంగా వ్యవహరించిందంటూ కోర్టుకెక్కింది. అయితే కోర్టు ఎన్నికలు జరిపేందుకు అనుకూలంగా తీర్పునివ్వడంతో నోటిఫికేషన్ విడుదలైంది. ఎన్నికలకోసం ఇప్పటికే వైసీపీ అభ్యర్థులు ప్రచారం మొదలు పెట్టారు. ఇటీవలే టీడీపీ కూడా అభ్యర్థుల ఎంపిక మొదలు పెట్టింది. తీరా నామినేషన్ల వేళ ఓటర్ల లిస్ట్ లో అభ్యర్థుల పేర్లు గల్లంతు కావడంతో గొడవ మొదలైంది. 

నెల్లూరు కార్పొరేషన్‌ సహా 12 మున్సిపాలిటీలకు గతవారంలో షెడ్యూల్ రిలీజ్ అయింది. వచ్చే వారం ఎన్నికలు జరగనున్నాయి. ఈ వారంలోనే నామినేషన్ దాఖలు చేయాలి. ఇంతలో ఓట్లు గల్లంతు అవ్వడంతో అది కూడా ఏకంగా అభ్యర్థులు అనుకున్న వారికే ఇలాంటి పరిస్థితి రావడం టీడీపీ మండిపడుతోంది. ఇంకా ఎంతమంది ఓట్లు గల్లంతు అయ్యాయో అన్న రీసెర్చ్ మొదలు పెట్టిందా పార్టీ.