Pawan Kalyan: కొవిడ్ పరీక్ష కేంద్రాలి పెంచాలి.. పాఠశాలల్లో తరగతుల కొనసాగింపు సరికాదు

తెలుగు రాష్ట్రాల్లో కరోనా కేసుల నమోదుపై జనసేన అధినేత పవన్ కల్యాణ్ ఆందోళన వ్యక్తం చేశారు. ప్రజలకు ప్రత్యక్షంగా సేవలు అందించేవారు కొవిడ్ బారిన పడుతున్నారన్నారు.

పవన్ కల్యాణ్(ఫైల్ ఫొటో)

దేశంలో, తెలుగు రాష్ట్రాల్లో నమోదవుతున్న కేసులు ఆందోళనకరమని పవన్ కల్యాణ్ అన్నారు. ప్రజలకు సేవలందించే ఆరోగ్య సిబ్బంది, పోలీసులు, ఇతర క్షేత్రస్థాయి సిబ్బంది అధిక సంఖ్యలో కొవిడ్‌ బారిన పడున్నారని ఆవేదన వ్యక్తం చేశారు. టీడీపీ అధినేత చంద్రబాబు కరోనాతో అస్వస్థతకు గురికావడం విచారకరమన్నారు. చంద్రబాబు త్వరగా కోలుకోవాలని పవన్ ఆకాంక్షించారు.

కరోనా కేసులు పెరుగుతున్న దృష్ట్యా.. తెలుగు రాష్ట్రాల ప్రభుత్వాలు మరింత అప్రమత్తంగా ఉండాలని.. పవన్ కల్యాణ్ విజ్ఞప్తి చేశారు. కరోనా నివారణ చర్యలు తీసుకోవాలని కోరారు. కొవిడ్‌ పరీక్షలు, పరీక్షా కేంద్రాల సంఖ్య పెంచాలని, మొబైల్‌ పరీక్షా కేంద్రాలు ఏర్పాటు చేస్తే ప్రయోజనం ఉంటుందని అన్నారు. కరోనా మొదటి వేవ్‌లో పాటించిన ట్రాక్‌ అండ్‌ ట్రేస్‌ విధానాన్ని పటిష్టంగా అమలు చేయాలన్నారు. 

ఏపీ ప్రభుత్వ తీసుకున్న నిర్ణయాన్ని పవన్ కల్యాణ్ వ్యతిరేకించారు. ఏపీలో నైట్ కర్ఫ్యూ, సమావేశాలు, వేడుకలపై పాక్షిక నిషేధం ఉన్నా.. పాఠశాలల్లో తరగతుల కొనసాగింపు సరికాదని చెప్పారు. కొవిడ్‌ ఉద్ధృతి తగ్గే వరకు తరగతులు వాయిదా వేయాలని ప్రభుత్వాన్ని కోరారు. పిల్లలకు వ్యాక్సినేషన్‌ పూర్తికాకపోవటం, వారిలో రోగనిరోధకశక్తి  తక్కువగా ఉండటం వంటి అంశాలు దృష్టిలో ఉంచుకోవాలని ప్రభుత్వాన్ని విజ్ఞప్తి చేశారు. 

మద్యం దుకాణాలను మరో గంటపాటు అదనంగా తెరిచి ఉంచాలని ఆదేశాలు జారీ చేయడం రాష్ట్ర ప్రభుత్వ అనాలోచిత వైఖరి అని పవన్ కల్యాణ్ విమర్శించారు. ఈ సమయంలో ప్రజలకు నిత్యావసరాలు ఎలా ఇవ్వాలి, వైద్య సేవలు మెరుగుపరిచేందుకు కార్యాచరణ ప్రకటించాలని..., మద్యం అమ్మకాలపై దృష్టి పెట్టడం ఏంటని ప్రశ్నించారు. ప్రజలంతా కరోనా నిబంధనలు పాటించాలని విజ్ఞప్తి చేశారు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి