Nalgonda: బొమ్మలిద్దామని ఎత్తుకుని తీసుకెళ్లిన తల్లి తనకు తెలియకుండానే చిన్నారిని మృత్యు ఒడికి చేర్చింది, ఏం జరిగిందంటే

ఆడుకునేందుకు బొమ్మలిద్దామని తీసికెళ్లిన ఆతల్లి తనకు తెలియకుండానే చిన్నారి మరణానికి కారణమైంది.నల్గొండ జిల్లా నాంపల్లి మండలం ముంపు గ్రామం లక్ష్మణాపురంలో జరిగిందీ ఘటన.

పాముకాటుతో చిన్నారి మృతి

ఈ లోకంలోకి అడుగుపెట్టిన పది నెలలకే ఆ చిన్నారికి ఆయువు తీరిపోయింది. అమ్మ,నాన్న, అక్క, ఆటబొమ్మలు తప్ప ఇంకా మరో ప్రపంచం తెలియదు. కానీ ఆ ఆటబొమ్మలే తన మృత్యువుకి కారణం అవుతాయనుకోలేదు. నల్గొండ జిల్లా నాంపల్లి మండలం ముంపు గ్రామం లక్ష్మణాపురానికి చెందిన బాణావత్‌ గణేశ్‌-దివ్య దంపతులకు కుమార్తె, కుమారుడు ఉన్నారు. ఆదివారం సాయంత్రం తమ పది నెలల కుమారుడు భవిత్‌ను ఆడిస్తోన్న తల్లి బొమ్మలిచ్చేందుకు ఎత్తుకుని కిటికీ దగ్గరకు తీసుకెళ్లింది. అయితే ఇంటిగోడలకు ప్లాస్టింగ్ లేకపోవడంతో వాటి మధ్యలో పాము దూరిఉన్న విషయం ఎవ్వరూ గమనించలేదు. కిటీకీ వైపు తిరిగి ఆమె బొమ్మలు తీస్తోంది. ఇంతలోనే తల్లి ఎత్తుకుని ఉన్న చిన్నారి కాలుపై తాచుపాము కాటేసింది. బాబు ఉలికిపాటు గమనించి ఏమైందంటూ అటు తిరిగేసరికి మరోసారి కాటేసింది పాము.

ఏం జరిగిందో అర్థమయ్యేలోగా పదినెలల చిన్నారి పరిస్థితి విషమంగా మారింది. ఆ తల్లి కేకలు విన్న చుట్టుపక్కల వారు అక్కడకు చేరుకుని వెంటనే ఆసుపత్రికి తరలించే ఏర్పాట్లు చేశారు. అయినప్పటికీ ఎలాంటి ఫలితం లేకపోయింది. మార్గమధ్యలోనే భవిత్  చనిపోయాడు. ఆదివారం సాయంత్రం జరిగిందీ ఘటన. అప్పటికే చీకటి పడడంతో పాము బయటకు రాకుండా కాపలాకాసిన గ్రామస్తులు సోమవారం చౌటుప్పల్‌ నుంచి పాములు పట్టే వ్యక్తిని తీసుకొచ్చి దాన్ని పట్టుకున్నారు. అప్పటి వరకూ కేరింతల కొట్టిన చిన్నారి కొద్ది క్షణాల్లో కన్ను మూశాడంటే ఆ ఘటన నుంచి తల్లి ఇప్పట్లో తేరుకోగలదా. ఆమె కన్నీళ్లను ఆపడం ఎవ్వరివల్లా కావడం లేదు.

సాధారణంగా వానాకాలంలో పాములు సంచారం ఎక్కువగా ఉంటుంది. ఎక్కడ చూసినా గడ్డి, పొదలు పేరుకుపోవడంతో అవి  స్వేచ్ఛగా తిరుగుతాయి. ఏటా వానాకాలంలోనే పాముకాటుకి గురయ్యే వారి సంఖ్య ఎక్కువే. వానలు పడినప్పుడు పుట్టలు, కలుగులు నీటితో నిండడంతో పాములు నీళ్లులేని పొడి ప్రదేశం కోసం వెతుకుతాయి. చిన్న కలుగు కనిపించినా ఆవాసంగా చేసుకోవాలని అనుకుంటాయి. అలాంటి సమయంలో మనుషులు ఎదురయ్యే సరికి కాటేస్తాయి. ఇలా పాము కాటుతో మరణిస్తున్నవారి సంఖ్య ఇండియాలోనే అత్యధికంగా ఉంటోందని ప్రపంచ ఆరోగ్య సంస్థ గణాంకాలు గతంలోనే వెల్లడించాయి.  ప్రధానంగా గ్రామీణప్రాంతాల్లో విషపురుగులు, పాములు అధికంగా సంచరిస్తుంటాయి. ఏమాత్రం అజాగ్రత్తగా ఉన్నా వాటికి బలైపోవాల్సిందే.