Nizam College Students Protest: కొనసాగుతున్న నిజాం విద్యార్థుల ఆందోళన - మంత్రి కార్యాలయం ముట్టడి

Nizam College Students Protest: నిజాం కళాశాల విద్యార్థుల సమస్యను పరిష్కరించాలని డిమాండ్ చేస్తూ బషీర్ బాగ్ లోని మంత్రి సబితా ఇంద్రారెడ్డి కార్యాలయాన్ని ఏబీవీపీ నాయకులు ముట్టడించారు. 

నిజాం విద్యార్థుల ఆందోళన,

Nizam College Students Protest: నిజాం కళాశాల విద్యార్థులు చేస్తున్న నిరసన నేటికీ కొనసాగుతూనే ఉంది. వీరికి మద్దతుగా ఏబీవీపీ నాయకులు బషీర్ బాగ్ లోని మంత్రి కార్యాలయాన్ని ఏబీవీపీ నాయకులు ముట్టడించారు. కళాశాల ప్రిన్సిపాల్, ఉస్మానియా వీసీ విద్యార్థుల జీవితాలతో చెలగాటం ఆడుతున్నారని మండిపడుతున్నారు. గత 10 రోజులుగా విద్యార్థులు ఆందోళన చేస్తున్నా అధికారులు పట్టించుకోవడం లేదని ఆగ్రహం వ్యక్తం చేశారు. మంత్రి కేటీఆర్ స్పందించి సమస్య పరిష్కరించాలని చెప్పినా పట్టించుకోలేదని అన్నారు. అందుకే ఈరోజు మంత్రి కార్యాలయాన్ని ముట్టిడించినట్లు వివరించారు. లోపలికి వెళ్లేందుకు ప్రయత్నించగా... పోలీసులు అడ్డుకున్నారు. దీంతో ఇరువురి మధ్య తోపులాట జరిగింది. ఆందోళన చేస్తున్న ఏబీవీపీ నాయకులను పోలీసులు అరెస్ట్ చేశారు. ఈ ఘటనలో పలువురికి గాయాలు అయ్యాయి. 

నిజాం కాలేజీ హాస్టల్‌ సీట్లకు దరఖాస్తులు చేసుకోవాలని ఉస్మానియా యూనివర్సిటీ నోటిఫికేషన్‌ విడుదల చేసింది. నవంబరు 17 వరకు దరఖాస్తులు చేసుకోవాలని తెలిపింది. 50 శాతం చొప్పున యూజీ, పీజీ విద్యార్థినులకు సీట్లను కేటాయిస్తామని వర్సిటీ అధికారులు పేర్కొన్నారు. నవంబరు 17 వరకు వచ్చిన దరఖాస్తులను పరిశీలించి నవంబరు 19న తుది జాబితాను విడుదల చేస్తామని తెలిపారు. సీట్లు కోరే విద్యార్థులు కళాశాల కార్యాలయంలో దరఖాస్తులు పొందవచ్చు. ఇదిలా ఉంటే హాస్టల్‌లోని సీట్లను తమకే కావాలని గత కొన్ని రోజులుగా నిజాం కాలేజీల విద్యార్థినులు ఆందోళన చేసిన విషయం తెలిసిందే. 

మరోవైపు  హైదరాబాద్ నిజాం కళాశాలలో హాస్టల్ సౌకర్యం కోసం యూజీ విద్యార్థులు చేస్తున్న పోరాటం కొనసాగుతోంది. మంత్రి కేటీఆర్ నిజాం కాలేజీకి వచ్చినప్పుడు తమ సమస్యను గుర్తించి రూ.5 కోట్లు కేటాయించారని.. కానీ విద్యాశాఖ అధికారులు మాత్రం 50 శాతం మాత్రమే సీట్లను యూజీ విద్యార్థులకు కేటాయిస్తున్నారని మండిపడ్డారు. తమకు హాస్టల్​లో  100 శాతం గదులు కేటాయించే వరకు పోరాటం కొనసాగిస్తామని స్పష్టం చేశారు. రాష్ట్ర ప్రభుత్వం 50 శాతం యూజీ, 50 శాతం పీజీ విద్యార్థులకు హాస్టల్ సీట్లు కేటాయిస్తూ.. విద్యాశాఖ జీవో జారీ చేసిన విషయం తెలిసిందే. రాష్ట్ర ప్రభుత్వ ఆదేశాల మేరకు కళాశాల వైస్ ప్రిన్సిపాల్ రంజిని, వార్డెన్​లు.. ఆందోళన చేస్తున్న విద్యార్థుల దగ్గరకు వచ్చి అర్హత కలిగిన విద్యార్థులు వసతి గృహంలో ప్రవేశానికి రావాలని సూచించారు.

వసతి గృహంలో గదులు కావాల్సిన వారు నవంబరు 17లోపు దరఖాస్తు పెట్టుకోవాలని.. 19లోపు అర్హత ఉన్న విద్యార్థుల లిస్ట్ ప్రకటిస్తామని వైస్ ప్రిన్సిపాల్ తెలిపారు. 2017లో మంత్రి కేటీఆర్ నిజాం కాలేజీకి వచ్చినప్పుడు బాలికల వసతి గృహం కోసం వినతిపత్రం ఇచ్చామని విద్యార్థులు తెలిపారు. తమ సమస్యను చూసి కేటీఆర్ రూ.5 కోట్లు కేటాయించారని పేర్కొన్నారు. తమ వల్లనే నూతన వసతి గృహం నిర్మాణం అయ్యిందన్నారు. తమకు హాస్టల్​లో 100 శాతం గదులు కేటాయించే వరకు పోరాటం కొనసాగిస్తామని యూజీ విద్యార్థులు స్పష్టం చేశారు. గత ఎనిమిది రోజులుగా ఆందోళన చేస్తున్నామని.. తమ న్యాయమైన డిమాండ్​పై ప్రభుత్వం దిగి వచ్చే వరకు పోరాటం కొనసాగిస్తామని విద్యార్థులు స్పష్టం చేశారు.