YSRCP Rayalaseema Movement: వైఎస్ఆర్సీపీ నేతల ప్రత్యేక రాయలసీమ వాదం - ఏపీ రాజకీయాల్లో విభజన ఉద్యమం ప్రారంభం కానుందా?
Rayalaseema State: వైఎస్ఆర్సీపీ రాయలసీమ నేతలు ప్రత్యేక రాష్ట్ర నినాదం అందుకోవడం ఏపీ రాజకీయాల్లో కీలకంగా మారింది. వైసీపీ అధికారిక విధానం అదే అయితే రాబోయే రోజుల్లో డిమాండ్ మరింత పెరగనుంది.
YSRCP Rayalaseema leaders separate state slogan: ఏపీ రాజకీయాల్లో మరోసారి విభజన సెగలు రేగుతున్నాయి. ఏపీలో అధికార మార్పిడి తర్వాత, వైఎస్సార్ కాంగ్రెస్ పార్టీ రాయలసీమ ప్రాంతంలో తన పట్టును నిలుపుకోవడానికి ప్రత్యేక రాయలసీమ కార్డును తెరపైకి తెస్తోంది. అమరావతి రాజధాని అభివృద్ధిని సీమ ప్రయోజనాలకు వ్యతిరేకంగా చూపిస్తూ, ఆ పార్టీ నేతలు చేస్తున్న వ్యాఖ్యలు ఇప్పుడు రాజకీయ వర్గాల్లో పెద్ద చర్చకు దారితీశాయి.
ప్రాంతీయ సెంటిమెంట్తో పట్టు కోసం ప్రయత్నం
వైసీపీ అధినేత వైఎస్ జగన్ మోహన్ రెడ్డి మొదటి నుంచి మూడు రాజధానుల నినాదంతో రాయలసీమలో న్యాయ రాజధాని కర్నూలు ఏర్పాటు చేస్తామని హామీ ఇచ్చారు. అయితే, ప్రస్తుత కూటమి ప్రభుత్వం అమరావతిని ఏకైక రాజధానిగా అభివృద్ధి చేస్తామని ప్రకటించడంతో, సీమకు అన్యాయం జరుగుతోందనే భావనను ప్రజల్లోకి తీసుకెళ్లడం ద్వారా వైసీపీ తన రాజకీయ ఉనికిని కాపాడుకోవాలని చూస్తోంది. అమరావతికి కేటాయించే వేల కోట్ల నిధులు సీమ సాగునీటి ప్రాజెక్టులకు మళ్లిస్తే ఆ ప్రాంతం సస్యశ్యామలం అవుతుందనే వాదనను ఆ పార్టీ నేతలు బలంగా వినిపిస్తున్నారు.
అమరావతిని బూచి గా చూపడం వెనుక వ్యూహం
అమరావతి అభివృద్ధిని కేవలం ఒక వర్గానికి లేదా ఒక ప్రాంతానికి పరిమితమైన ప్రాజెక్టుగా చిత్రీకరించడం ద్వారా, రాయలసీమ ఓటర్లలో అభద్రతా భావాన్ని పెంచడం వైసీపీ వ్యూహంగా కనిపిస్తోంది. అమరావతి కోసం సీమ ప్రయోజనాలను బలి ఇస్తారా అనే ప్రశ్నను సంధించడం ద్వారా ప్రాంతీయ విభేదాలను రెచ్చగొట్టి, తద్వారా అక్కడ బలమైన ఓటు బ్యాంకును సమీకరించుకోవాలని ఆ పార్టీ భావిస్తోంది. ప్రత్యేక రాష్ట్రం అనే డిమాండ్ ద్వారా భావోద్వేగాలను పతాక స్థాయికి తీసుకెళ్లడం వల్ల తటస్థ ఓటర్లను కూడా తమవైపు తిప్పుకోవచ్చనేది వారి అంచనా.
ఉద్యమం వల్ల కలిగే రాజకీయ లాభనష్టాలు
ఈ సీమ కార్డు వైసీపీకి స్వల్పకాలికంగా లాభం చేకూర్చవచ్చు కానీ, దీర్ఘకాలంలో కొన్ని చిక్కులు వచ్చే ప్రమాదం కనిపిస్తోంది. రాయలసీమలోని నాలుగు జిల్లాల్లో పట్టు పెంచుకోవడానికి ఇది ఉపయోగపడవచ్చు, కానీ ఉత్తరాంధ్ర , కోస్తా ప్రాంతాల్లో ఈ వ్యూహం వికటించే అవకాశం ఉంది. రాష్ట్రాన్ని ముక్కలు చేయాలని చూస్తున్న పార్టీ అనే ముద్ర పడితే, ఇతర ప్రాంతాల్లో వైసీపీకి తీవ్ర నష్టం వాటిల్లే అవకాశం ఉంటుంది. గతంలో కూడా ఇటువంటి ప్రాంతీయ ఉద్యమాలు సాగినప్పుడు, ఆయా పార్టీలు ఒక ప్రాంతానికే పరిమితమైన చరిత్ర ఉంది. ప్రజలు అభివృద్ధిని కోరుకుంటున్నారే తప్ప, మరో విభజన వల్ల వచ్చే తలనొప్పులను భరించే స్థితిలో లేరని కొందరు విశ్లేషకులు భావిస్తున్నారు.
కత్తి మీద సాము లాంటి వ్యూహం
వైసీపీ చేపడుతున్న ఈ ప్రత్యేక రాయలసీమ ఉద్యమం ఆ పార్టీకి ఒక కత్తి మీద సాము వంటిది. సీమలో సెంటిమెంట్ను రగిల్చి పట్టు సాధించాలని చూస్తున్న తరుణంలో, రాష్ట్ర సమగ్రతను కోరుకునే ఓటర్ల నుండి వ్యతిరేకత వచ్చే ప్రమాదం ఉంది. అమరావతిని వ్యతిరేకించడం ద్వారా వచ్చే రాజకీయ మైలేజీ కంటే, రాష్ట్ర విభజన వాది అనే ముద్ర పడకుండా జాగ్రత్త పడటం వైసీపీకి ఇప్పుడు అత్యంత అవసరమన్న అభిప్రాయం వినిపిస్తోంది. ప్రభుత్వ వైఫల్యాలను ఎండగట్టడం కంటే ప్రాంతీయ విద్వేషాలను నమ్ముకోవడం రాజకీయంగా ఎంతవరకు సఫలీకృతం అవుతుందో చెప్పలేమన్న అభిప్రాయం వినిపిస్తోంది.
టాప్ హెడ్ లైన్స్
ట్రెండింగ్ వార్తలు
