Varla On AP CID : హత్య చేసిన అనంతబాబునూ అంత సేపు ప్రశ్నించలేదే ? సీఐడీపై టీడీపీ తీవ్ర విమర్శలు !

ఏపీ సీఐడీ తీరుపై వర్ల రామయ్య విమర్శలు చేశారు. హత్య కేసులో ఉన్న అనంతబాబును కూడా ప్రశ్నించనంత సేపు గౌతు శిరీషను ప్రశ్నించారని మండిపడ్డారు.

ఏపీసీఐడీ తీరుపై వర్ల రామయ్య విమర్శలు

Varla On AP CID  :   సోషల్ మీడియాలో పోస్ట్ షేర్ చేశారని టీడీపీ నేత గౌత శిరీషను ఏడు గంటల పాటు ప్రశ్నించిన సీఐడీ అధికారుల తీరుపై టీడీపీ తీవ్ర ఆగ్రహం వ్యక్తం చేస్తోంది. ఏపీ సీఐడీ దారి తప్పిందని టీడీపీ నేత వర్ల రామయ్య మండిపడ్డారు.  ప్రతిపక్ష పార్టీల మీద కక్ష తీర్చుకునే విషయంలో అధికార పార్టీకి సీఐడీ పావుగా ఉపయోగపడుతోందని.. సీఐడీ చీఫ్ సునీల్ కుమారును సీఎం జగన్, సజ్జల బ్లాక్ మెయిల్ చేస్తున్నారని ఆరోపించారు.  సునీల్ కుమార్ వ్యక్తిగత జీవితానికి సంబంధించిన విషయాల్లో సునీల్ కుమారుని బ్లాక్ మెయిల్ చేస్తున్నట్టు కన్పిస్తోందని వర్ల రామయ్య వ్యాఖ్యానించారు.  సునీల్ కుమార్ మీద ఒత్తిడి తెచ్చి.. సీఐడీ ద్వారా వేధింపులకు గురిచేస్తున్నారని..  సీఎం జగన్, సజ్జల చేతులో తాను ఎందుకు పావుగా మారారో సీఐడీ చీఫ్ చెప్పాలని డిమాండ్ చేశారు.

లుక్‌ఔట్ నోటీసులో ఉన్న పంచ్‌ ప్రభాకర్‌ను ఎలా కలిశారు ?

పంచ్ ప్రభాకర్ మీద సీబీఐ లుక్ అవుట్ నోటీసిస్తే.. ఆయన్ను విదేశాల్లో ఎంపీ మిధున్ రెడ్డి కలిశారన్నారు.  సీఎం జగన్‌ను కూడా  పంచ్ ప్రభాకర్ కలిశారని వర్ల రామయ్య ఆరోపించారు. లుక్ అవుట్ నోటీసు పరిధిలో ఉన్న పంచ్ ప్రభాకరును ఎంపీ మిధున్ రెడ్డి స్థానిక పోలీసులకు ఎందుకు అప్పగించలేదని ప్రశ్నించారు. పంచ్ ప్రభాకర్-మిధున్ రెడ్డి భేటీ విషయాన్ని హైకోర్టు కూడా సీరియస్సుగా తీసుకోవాలని వర్ల రామయ్య విజ్ఞప్తి చేశారు. ఎవరికి అంతు చిక్కని కేసులను విచారణ చేయాల్సిన సీఐడీ విభాగాన్ని  సోషల్ మీడియా కేసులకు ఉపయోగించుకోవడం ఏమిటని ప్రశ్నించారు.  

హత్య చేసిన అనంతబాబు ను అంత సేపు ప్రశ్నించలేదేం?

టీడీపీ నేత  గౌతు శిరీషను ఏడు గంటల పాటు విచారణ చేయడం ఏమిటని ... భోజనానికి కూడా వెళ్లనివ్వకుండా శిరీషను విచారించడం ఏమిటని ప్రశ్నించారు. గౌతు శిరీష ఏం తప్పు చేశారు..?గౌతు లచ్చన్న మనవరాలను అవమానిస్తారా..? డ్రైవరుని హత్య చేసిన కేసులో ఎమ్మెల్సీ అనంతబాబును కూడా ఇన్ని గంటలపాటు విచారణ చేయలేదని గుర్తు చేశారు.  లోకేష్ పేరు చెప్పమని విచారణకు పిలిచిన వారిని ఒత్తిడి తెస్తున్నారు. లోకేష్ మీద ఎందుకు పడుతున్నారో అర్థం కావడం లేదన్నారు. 

అధికారంలోకి వచ్చాక సోషల్ మీడియా కేసులపై కమిషన్

సీఐడీ అధికార పార్టీకి తొత్తుగా వ్యవహరించడం సరికాదని..  సోషల్ మీడియాలో జరుగుతున్న దుష్ప్రచారం చేస్తున్నారంటూ 26 ఫిర్యాదులు చేశాను.. ఏం చర్యలు తీసుకున్నారని వర్ల రామయ్య ప్రశ్నించారు. తాము అధికారంలోకి రాగానే సోషల్ మీడియా కేసులైప ఓ కమిషన్ వేస్తామన్నారు.  మేం ఇచ్చిన ఫిర్యాదులపై ఏం చర్యలు తీసుకున్నారో సీఐడీ శ్వేతపత్రం విడుదల వర్ల రామయ్య డిమాండ్ చేశారు.