CM Revanth Reddy: రేవంత్ అందరి వాడు - ప్రధాని మోదీకి కూడా - రేవంత్ రెడ్డి చాణక్యం నెక్ట్స్ లెవల్ !
CM Revanth Reddy: సీఎం రేవంత్ రెడ్డి రాజకీయ ప్రత్యర్థులు అయినా వ్యక్తిగత స్నేహం కాపాడుకుంటున్నారు. ప్రధాని మోదీతో ఆయన వ్యవహరిస్తున్న తీరు అందర్నీ అబ్బురపరుస్తోంది.
CM Revanth Reddy Chanakya Strategies: తెలంగాణ రాజకీయాల్లో ముఖ్యమంత్రి రేవంత్ రెడ్డి శైలి అత్యంత విలక్షణమైనది. ఒకవైపు పదునైన విమర్శలతో ప్రత్యర్థులను ఉక్కిరిబిక్కిరి చేస్తూనే, మరోవైపు పాలనాపరమైన అవసరాల కోసం అదే ప్రత్యర్థులతో సమన్వయం చేసుకునే ఆయన పొలిటికల్ బ్యాలెన్సింగ్ ఇప్పుడు చర్చనీయాంశంగా మారింది. రాజకీయం వేరు, రాష్ట్ర ప్రయోజనాలు వేరనే సూత్రాన్ని రేవంత్ అమలు చేస్తున్న తీరుపై అందర్నీ ఆశ్చర్యపరుస్తోంది.
రేవంత్ రిలేషన్ షిప్ మేనేజ్మెంట్ అదుర్స్
తెలంగాణ ముఖ్యమంత్రి రేవంత్ రెడ్డి అనుసరిస్తున్న రిలేషన్ షిప్ మేనేజ్మెంట్ రాజకీయ వర్గాలను విస్మయానికి గురిచేస్తోంది. సాధారణంగా కాంగ్రెస్ నాయకులు బీజేపీని, ముఖ్యంగా ప్రధాని మోదీని తీవ్రస్థాయిలో విమర్శిస్తుంటారు. రేవంత్ కూడా రాజకీయ వేదికలపై మోదీపై విమర్శల వర్షం కురిపిస్తారు. కానీ, ప్రధానమంత్రి రాష్ట్ర పర్యటనకు వచ్చినప్పుడు, ఢిల్లీకి వెళ్లినప్పుడు ఆయనను బడే భాయ్ అని సంబోధించి రాష్ట్ర ప్రయోజనాల కోసం విజ్ఞప్తులు చేయడం ఆయన పరిణతికి నిదర్శనం. రాజకీయం గడప వరకేనని, అధికారిక హోదాలో ఉన్నప్పుడు రాష్ట్ర అభివృద్ధి కోసం కేంద్రంతో సఖ్యతగా ఉండటమే ముఖ్యమని ఆయన బలంగా నమ్ముతున్నారు.
హైకమాండ్ నమ్మకం కూడా !
రేవంత్ రెడ్డి అనుసరిస్తున్న ఈ ద్వంద్వ వ్యూహం వల్ల కాంగ్రెస్ అంతర్గత రాజకీయాల్లో ఆయనపై తరచూ ఫిర్యాదులు వెల్లువెత్తుతుంటాయి. బీజేపీతో లోపాయికారీ ఒప్పందం ఉందేమో అని , అదానీ వంటి సంస్థలతో ఒప్పందాలు చేసుకోవడం ఏంటి అని సొంత పార్టీ నేతలే ఢిల్లీకి సమాచారం పంపుతుంటారు. అయితే, రేవంత్ తన రాజకీయ చాణక్యంతో అటు రాహుల్ గాంధీ, ఇటు మల్లికార్జున ఖర్గేల వద్ద బలమైన విశ్వసనీయతను సంపాదించుకున్నారు. రాష్ట్రంలో పార్టీని అధికారంలోకి తీసుకురావడం, క్లిష్ట పరిస్థితుల్లో కూడా ఎంపీ సీట్లను గెలిపించడం ద్వారా తనపై వచ్చే ఫిర్యాదుల కంటే తన పనితీరు మెరుగ్గా ఉందని ఆయన హైకమాండ్కు నిరూపించగలిగారు.
వ్యక్తిగత స్నేహం - రాజకీయ వైరం
రేవంత్ రెడ్డి రాజకీయంలో మరో కోణం ఏమిటంటే.. రాజకీయంగా ఎంతగా విబేధించినా వ్యక్తిగత స్నేహాలను ఆయన పక్కన పెట్టరు. గతంలో ఇతర పార్టీల్లో ఉన్నప్పుడు ఏర్పడిన మిత్ర సంబంధాలను ఇప్పటికీ కొనసాగిస్తున్నారు. అసెంబ్లీలో ప్రత్యర్థులపై గర్జించే రేవంత్, అదే ప్రత్యర్థులతో లాబీలో నవ్వుతూ పలకరించడం చూసి కేడర్ ఆశ్చర్యపోతుంటుంది. రాజకీయం అంటే ప్రజా క్షేత్రంలో పోరాటం.. వ్యక్తిగత ద్వేషం కాదు అనే ధోరణి ఆయనలో స్పష్టంగా కనిపిస్తుంది. దీనివల్ల ప్రతిపక్షాల్లో ఉన్న కీలక నేతలతో కూడా ఆయనకు కమ్యూనికేషన్ ఛానల్స్ తెరిచే ఉంటాయి.
అదానీ నుంచి మోదీ వరకు.. వ్యూహాత్మక అడుగులు
జాతీయ స్థాయిలో రాహుల్ గాంధీ అదానీ గ్రూప్పై నిరంతరం విమర్శలు గుప్పిస్తుంటే, రేవంత్ రెడ్డి మాత్రం తెలంగాణ అభివృద్ధి కోసం అదానీ గ్రూప్తో వేల కోట్ల రూపాయల ఒప్పందాలు కుదుర్చుకున్నారు. ఇది హైకమాండ్ ఆగ్రహానికి కారణం కావచ్చని అందరూ భావించినా, రేవంత్ మాత్రం రాహుల్ గాంధీ చెప్పేది క్రోనీ క్యాపిటలిజం గురించి, నేను చేసేది రాష్ట్రంలో ఉద్యోగాల సృష్టి కోసం అని అత్యంత చాకచక్యంగా వివరణ ఇచ్చి విమర్శకుల నోళ్లు మూయించారు. ఈ స్పష్టతే ఆయనను ఇతర ముఖ్యమంత్రుల కంటే భిన్నంగా నిలబెడుతోంది.
ఇమేజ్ మేకోవర్
రేవంత్ రెడ్డి కేవలం ఒక ఫైర్ బ్రాండ్ నాయకుడిగానే కాకుండా, స్టేట్స్ మ్యాన్ తరహా లక్షణాలను అలవరుచుకుంటున్నారు. అటు కాంగ్రెస్ అధిష్టానం వద్ద పక్కా విధేయుడిగా ఉంటూనే, ఇటు కేంద్రంతో పాలనాపరమైన సంబంధాలను నెరుపుతూ, తెలంగాణలో తన పట్టును పెంచుకుంటున్నారు. రాజకీయాలను వ్యక్తిగతానికి మిక్స్ చేయకుండా ఆయన చేస్తున్న ఈ ప్రయాణం, రానున్న రోజుల్లో ఆయనను దేశ రాజకీయాల్లో కీలక నేతగా మార్చడం ఖాయమని విశ్లేషకులు భావిస్తున్నారు. రేవంత్ రెడ్డి రాజకీయ శైలి అగ్రెసివ్ అండ్ డిప్లొమాటిక్ సమ్మేళనం. రాష్ట్రం కోసం మెత్తగా, రాజకీయం కోసం గట్టిగా ఉండటమే ఆయన సక్సెస్ మంత్రం అనుకోవచ్చు.
టాప్ హెడ్ లైన్స్
ట్రెండింగ్ వార్తలు
