Election Results: ఐదు రాష్ట్రాల ఎన్నికల తీర్పుతో జాతీయ రాజకీయాల్లోనూ మార్పులు - బీజేపీ, కాంగ్రెస్కు కఠిన పరీక్షలే!
five states election results: ఐదు రాష్ట్రాల అసెంబ్లీ ఎన్నికల ఫలితాలు దేశ రాజకీయాల్లో మార్పులు తేనున్నాయి. కాంగ్రెస్ తో పాటు బీజేపీ కూడా కఠిన పరీక్షను ఎదుర్కోనుంది.
tough tests for BJP and Congress: పశ్చిమ బెంగాల్, కేరళ, తమిళనాడు, అస్సాం, పుదుచ్చేరి ఎన్నికల ఫలితాలు కేవలం ప్రాంతీయ పోరాటాలు మాత్రమే కావు; ఇవి భారత జాతీయ రాజకీయాల గమనాన్ని నిర్ణయించే సెమీఫైనల్స్ వంటివి. ఈ ఎన్నికల ఫలితాలు అటు అధికార బీజేపీకి, ఇటు ఉనికి కోసం పోరాడుతున్న కాంగ్రెస్కు అగ్నిపరీక్షగా మారనున్నాయి.
బెంగాల్ దక్కించుకుంటే.. బీజేపీకి తిరుగుండదా?
ఈ ఐదు రాష్ట్రాల్లో అందరి కళ్ళు పశ్చిమ బెంగాల్పైనే ఉన్నాయి. ఒకవేళ బీజేపీ బెంగాల్ గడ్డపై జెండా పాతితే, అది భారత రాజకీయ చరిత్రలో ఒక కీలక మలుపు అవుతుంది. హిందీ హృదయభూమికి పరిమితమనే ముద్రను చెరిపేసి, తూర్పు, దక్షిణ భారత్లోనూ తిరుగులేని శక్తిగా ఎదిగినట్లు అవుతుంది. అస్సాంలో అధికారాన్ని నిలబెట్టుకుని, బెంగాల్ , పుదుచ్చేరిలను దక్కించుకుంటే కేంద్రంలోని ఎన్డీయే ప్రభుత్వానికి నైతిక బలం పెరగడమే కాకుండా, రాజ్యసభలోనూ బలం పెరిగి కీలక బిల్లుల ఆమోదం సులభతరం అవుతుంది.
కాంగ్రెస్ అస్తిత్వ పోరాటం - కేరళ, తమిళనాడుపైనే ఆశలు
కాంగ్రెస్ నేతృత్వంలోని యూడీఎఫ్ కూటమికి కేరళ, తమిళనాడు అత్యంత కీలకం. గత కొన్ని ఎన్నికలుగా వరుస ఓటములతో కుంగిపోయిన కాంగ్రెస్కు ఈ రెండు రాష్ట్రాలు లైఫ్ లైన్ వంటివి. ముఖ్యంగా కేరళలో అధికారం చేజిక్కించుకోలేకపోతే, జాతీయ స్థాయిలో కాంగ్రెస్ నాయకత్వంపై మరిన్ని ప్రశ్నలు తలెత్తుతాయి. తమిళనాడులో డీఎంకేతో కలిసి అధికారాన్ని పంచుకోవాలని ఆశిస్తున్నప్పటికీ, ప్రాంతీయ పార్టీల ఆధిపత్యం పెరిగే కొద్దీ కాంగ్రెస్ ఒక జూనియర్ భాగస్వామిగానే మిగిలిపోయే ప్రమాదం ఉంది.
లెఫ్ట్ పట్టు.. విజయ్ ఎంట్రీ మారుతున్న సమీకరణాలు
కేరళలో ఎల్డీఎఫ్ వరుసగా మూడో సారి అధికారాన్ని నిలబెట్టుకోవాలని చూస్తోంది, ఇది జరిగితే కాంగ్రెస్ పరిస్థితి మరింత ఘోరంగా మారుతుంది. మరోవైపు, తమిళనాడులో నటుడు విజయ్ నేతృత్వంలోని టీవీకే రాజకీయాల్లోకి రావడం సరికొత్త టెన్షన్ పుట్టిస్తోంది. దశాబ్దాలుగా ఉన్న డీఎంకే-ఏఐఏడీఎంకే మధ్య కేంద్రీకృతమైన రాజకీయాలను విజయ్ ఎంతవరకు ప్రభావితం చేస్తారనేది ఆసక్తికరంగా మారింది. విజయ్ ఓట్ల చీలిక కాంగ్రెస్-డీఎంకే కూటమికి నష్టం కలిగిస్తే, అది జాతీయ స్థాయిలో ప్రతిపక్షాల ఐక్యతపై దెబ్బకొడుతుంది.
ప్రాంతీయ పార్టీల ప్రాభవం.. జాతీయ పార్టీల సవాల్
ఈ ఎన్నికల్లో జాతీయ పార్టీలైన బీజేపీ, కాంగ్రెస్లకు ప్రాంతీయ పార్టీల నుంచి గట్టి సవాల్ ఎదురవుతోంది. మమతా బెనర్జీ , స్టాలిన్ , పినరయి విజయన్ వంటి బలమైన నాయకులు తమ కోటలను కాపాడుకోవాలని చూస్తున్నారు. ఈ ప్రాంతీయ శక్తులు బలోపేతం అయితే, 2029 సార్వత్రిక ఎన్నికల నాటికి జాతీయ రాజకీయాల్లో థర్డ్ ఫ్రంట్ లేదా ప్రాంతీయ పార్టీల కూటమి చక్రం తిప్పే అవకాశం ఉంది. ఒకవేళ ఫలితాలు బీజేపీకి అనుకూలంగా వస్తే, మోదీ నాయకత్వం మరింత బలోపేతం అవుతుం. దేశవ్యాప్తంగా ఒకే దేశం - ఒకే ఎన్నిక వంటి సంస్కరణల వైపు అడుగులు వేగంగా పడతాయి. అలా కాకుండా ప్రతిపక్షాలు మెరుగైన ఫలితాలు సాధిస్తే, కాంగ్రెస్ నేతృత్వంలోని ఇండియా కూటమికి కొత్త ఊపిరి అందుతుంది. మొత్తానికి, ఈ ఐదు రాష్ట్రాల ఫలితాలు ఢిల్లీ పీఠంపై పట్టు సాధించే క్రమంలో ఇరు పక్షాలకు దిక్సూచిగా మారనున్నాయి.
టాప్ హెడ్ లైన్స్
ట్రెండింగ్ వార్తలు
