Monkeypox: ప్రపంచ దేశాలకు డేంజర్ బెల్స్- మంకీపాక్స్‌పై WHO స్ట్రాంగ్ వార్నింగ్!
Monkeypox: మంకీపాక్స్ వైరస్ ఇప్పటివరకు 12 దేశాలకు విస్తరించినట్లు డబ్ల్యూహెచ్ఓ తెలిపింది.
Monkeypox: మంకీపాక్స్ వైరస్ ప్రపంచాన్ని గడగడలాడిస్తోంది. ప్రస్తుతం ఈ వైరస్ రోజురోజుకు విస్తరిస్తోంది. దీంతో ప్రపంచ ఆరోగ్య సంస్థ హెచ్చరించింది. వైరస్ కేవలం పది రోజుల్లోనే 12 దేశాలకు విస్తరించింది. ఇప్పటివరకు 92 కేసులు నమోదయ్యాయి.
మంకీపాక్స్ కేసులు మరింత వేగంగా పెరిగే అవకాశం ఉందని డబ్ల్యూహెచ్ఓ హెచ్చరించింది. జాగ్రత్తగా ఉండాల్సిన అవసరం ఉందని పేర్కొంది.
ఆఫ్రికాతో మొదలైన ఈ డేంజరస్ వైరస్ అక్కడ్నించి ఇతర దేశాలకు పాకడం కూడా మొదలైపోయింది. అమెరికా, ఇంగ్లాండ్‌లలో అక్కడక్కడ ఈ వైరస్ సోకిన రోగులు ఆసుపత్రికి రావడం అక్కడ కలవరంగా మారింది. తుమ్ము, దగ్గులు, గాలి ద్వారా ఈ వైరస్ వ్యాపించదని నిపుణులు చెబుతున్నారు. ఈ వైరస్ సోకిన వ్యక్తితో శారీరకంగా చాలా దగ్గరగా ఉంటేనే ఇదే సోకే అవకాశం ఉందని చెబుతున్నారు. ఆ సమయంలో ఈ వైరస్ నోరు, ముక్కు, కళ్లు, శ్వాసనాళం ద్వారా లోపలికి ప్రవేశించవచ్చు. అలాగే గాయాలు తగిలినప్పుడు చర్మం ఓపెన్ అయి ఉంటుంది. వైరస్ ఆ గాయం ద్వారా శరీరంలో చేరే అవకాశం ఉంది.
లక్షణాలు
మంకీపాక్స్ మశూచిని పోలి ఉంటుంది. ఇది ఆఫ్రికాలోని పశ్చిమదేశాల్లో, మధ్య దేశాల్లో కనిపిస్తుంది. ప్రారంభ దశలో జలుబుగా ఎక్కువమంది భావిస్తారు. ఇది తీవ్రంగా మారినప్పుడు చర్మంపై ఎర్రటి దద్దుర్లు పెరగిపోతాయి. ప్రారంభదశలో కనిపించే లక్షణాలు ఇలా ఉంటాయి.
1. తలనొప్పి
2. జ్వరం
3. వెన్ను నొప్పి
4. కండరాల నొప్పి
5. చలి
6. అలసట
అమ్మవారిలాగే...
చికెన్ పాక్స్ ను మన దగ్గర అమ్మవారు అని పిలుచుకుంటారు. దాదాపు అందులో కనిపించే లక్షణాలే మంకీ పాక్స్ వైరస్ సోకినప్పుడు కూడా కనిపిస్తాయి. అరచేతులు, అరికాళ్లపై అధికంగా దద్దుర్లు వచ్చే అవకాశం ఉంది. అమ్మవారు సోకినా కూడా తీవ్ర జ్వరం ఉంటుంది. మంకీ పాక్స్ సోకినా తీవ్ర జ్వరం కనిపిస్తుంది.
మాంసాహారం తినేవారిలో అధికంగా ఈ వైరస్ వచ్చే అవకాశం ఉంది. సరిగా ఉడకని మాంసం తినడం వల్ల లేదా ఈ వైరస్‌ను మోస్తున్న జంతువులను ముట్టుకోవడం, కౌగిలించుకోవడం, ముద్దులు పెట్టడం వంటివి చేయడం వల్ల కూడా మంకీపాక్స్ వైరస్ శరీరంలో చేరుతుంది. ఈ వైరస్ సోకాక రెండు నుంచి నాలుగు వారాల్లో పోతుంది. ప్రాణాలు తీసేంత ప్రమాదకరమైనది కాదని ఆరోగ్యినిపుణులు నిర్ధారించారు.
ఈ వైరస్‌ను 1958లో తొలిసారి గుర్తించారు. కోతులలో ఈ వైరస్ మొదటిసారి బయటపడడంతో దీనికి మంకీ పాక్స్ అని పేరు వచ్చింది.
టాప్ హెడ్ లైన్స్
ట్రెండింగ్ వార్తలు
