Pocso Case: యువతిపై పోక్సో కేసు నమోదు... మైనర్ తో ఆ పనిచేసినందుకే... రిమాండ్ విధించిన కోర్టు

తమిళనాడులో ఓ యువతి మైనర్ ను బలవంతం చేసి పెళ్లి చేసుకుంది. దీంతో ఆమెపై పోక్సో యాక్ట్ కింద కేసు నమోదు చేశారు.

యువతిపై పోక్సో కేసు(ప్రతీకాత్మక చిత్రం)

తమిళనాడులో 19 ఏళ్ల యువతిపై పోక్సో చట్టం కింద కేసు నమోదు చేశారు. మైనర్ ని వివాహం చేసుకున్న కేసులో యువతికి న్యాయస్థానం రిమాండ్ విధించింది. తమిళనాడు పొల్లాచికి చెందిన 19 ఏళ్ల యువతి స్థానికంగా ఉన్న పెట్రోల్ స్టేషన్లో  పనిచేస్తోంది. ఆ ప్రాంతంలో ఉంటున్న 17 ఏళ్ల యువకుడితో ప్రేమ వ్యవహరం నడిపింది. వీరిద్దరూ కలిసి పెట్రోల్ స్టేషన్​కు వెళ్లేవారు. ఈ క్రమంలో వీరి మధ్య ప్రేమ చిగురించింది. ఆ యువతికి ఇంట్లో పెళ్లి సంబంధాలు చూడడం మొదలుపెట్టారు. ఈ సమయంలో యువకుడు ఓ సర్జరీ కోసం ఆస్పత్రిలో జాయిన్ అయ్యాడు. యువతి ఆసుపత్రికి వెళ్లి పెళ్లి సంబంధాల విషయం యువకుడికి చెప్పింది. 

బలవంతంగా పెళ్లి

ఇంట్లో పెద్దలు పెళ్లి నిశ్చయించే ముందే పెళ్లి చేసుకుందామని యువకుడిని బలవంతం పెట్టింది. ఆ తర్వాత దగ్గర్లోని దేవాలయానికి వెళ్లి వివాహం చేసుకున్నారు. అనంతరం ఈ విషయం యువకుడి ఇంట్లో తెలిసింది. ఇంటికి వచ్చిన యువకుడిని తల్లిదండ్రులు నిలదీశారు. దీంతో పెళ్లి విషయాన్ని చెప్పేశాడు. 19 ఏళ్ల యువతితో వివాహం చేసుకున్నట్లు తల్లిదండ్రులకు వివరించాడు. ఈ వ్యవహారంపై యువకుడి తల్లిదండ్రులు యువతిపై పొల్లాచి మహిళా పోలీస్ స్టేషన్​లో ఫిర్యాదు చేశారు.

రిమాండ్ విధింపు

ఈ కేసుపై విచారణ చేపట్టిన పోలీసులకు అసలు విషయం తెలిసింది. యువకుడిని బలవంతం చేసి పెళ్లికి ఒప్పించినట్లు నిర్థారించుకున్నారు. ఈ విషయంపై దృష్టి సారించిన కోయంబత్తూరు జిల్లా ఎస్పీ యువతిని అరెస్టు చేయాలని ఆదేశించారు. యువతిని అదుపులోకి తీసుకుని పోక్సో చట్టం ప్రకారం కేసు నమోదు చేశారు. అనంతరం ఆమెను స్థానిక కోర్టులో ప్రవేశపెట్టారు. న్యాయస్థానం ఆమెకు రిమాండ్ విధించింది.