Crying: ఏడ్చే మగాడిని నమ్మాల్సిందే... మగాళ్లూ హ్యాపీగా ఏడవండి, మానసిక ప్రశాంతత పొందండి

మగాళ్లు ఏడవకూడదు, ఏడ్చేవాడు మగాడు కాదు... ఇలాంటి నానుడి సమాజంలో నానిపోయి ఉంది.

(Image credit: Pixabay)

మగాళ్లు ఏడవకూడదు, ఎప్పుడూ సింహంలా గంభీరంగా కనిపించాలి... అదే మగతనమంటే. భావోద్వేగాలను బయటపెట్టుకున్నా, బాధ కలిగినప్పుడు కన్నీరు పెట్టుకున్నా అదో తప్పులాగా ‘ఆడపిల్లలా ఏడుస్తున్నాడు’అంటూ సమాజం నుంచి కామెంట్లు వినిపిస్తాయి. పురుషులు ఏడవకూడదు, ఆడవాళ్లు మాత్రమే ఏడుపుకు అర్హులు అని ఎవరు చెప్పారు? భారత రాజ్యాంగంలో రాశారా? లేక మన ప్రధాన మతగ్రంథాలు చెప్పాయా?  

వేదనతో మనసు నలిగిపోయినప్పుడు భరించలేని బాధ కలగడం సహజం. అలాంటప్పుడు దేవుడు మనకిచ్చిన వరం ‘ఏడుపు’. మనస్పూర్తిగా ఏడిస్తే ఎంత బాధైన ‘ఉఫ్’మని ఊదినట్టు మనసు నుంచి పోతుంది. ఆ బాధను తట్టుకునే శక్తి వస్తుంది. కానీ చాలా మంది మగాళ్లు ఏడవరు. ఆ బాధను పక్కవాళ్లతో పంచుకోరు.మనసు నిండా నింపేసుకుని భారంతో కుంగిపోతారు. ఏడవకూడదు అని గట్టిగా నిర్ణయించుకుని, స్వీయ ఆంక్షల చట్రంలో తమకు తామే కీడు చేసుకుంటారు. ఈ విషయాన్ని చెబుతోంది మేము కాదు, మిచిగాన్ యూనివర్సిటీ శాస్త్రవేత్తలు. మానసిక వేదన కలిగినప్పుడు ఏడవని, తమ బాధలను పక్కవాళ్లతో పంచుకోని మగవారు చివరికి ఏకాకులుగా మిగిలిపోతారని వారు చేసిన కొత్త అధ్యయనంలో తేలింది. దాదాపు 5500 మంది మగాళ్లపై ఈ అధ్యయనాన్ని నిర్వహించారు. అంతేకాదు ఇలాంటి పురుషులు త్వరగా మానిసక సమస్యల బారిన పడతారని కూడా అధ్యయనం చెబుతోంది. 

ఏడుపు చాలా ముఖ్యం?
నవ్వు మన ఆరోగ్యానికి ఎంత ముఖ్యమో, ఏడుపు కూడా అంతే ముఖ్యం అని చెబుతున్నారు పరిశోధకులు. మానసిక భావాలకు ప్రతిస్పందించి, కన్నీటి గ్రంథులు నీళ్లను ఉత్పత్తి చేస్తాయి. అవి కళ్ల ద్వారా బయటికి వస్తాయి. ఇదంతా మన శరీర ఫంక్షనింగ్ లో భాగమే. బాధ కలిగినప్పుడు ఏడిస్తే మెదడులో ఆక్సిటోసిన్, ఎండార్ఫిన్ అనే సంతోషాన్ని కలిగించే రసాయనాలు ఉత్పత్తి అవుతాయి. అందుకే ఏడ్చాక మనసు రిలీఫ్ గా ఉంటుంది. బాధ నుంచి బయట పడినట్టు అనిపిస్తుంది. మానసిక ప్రశాంతత కలుగుతుంది. 

ఆత్మహత్యలు చేసుకునేది వీళ్లే
ఏడవడం అంటే స్వీయ ఓదార్పును పొందడమే. కానీ మగాళ్లు ఆ ఓదార్పును పొందడం లేదు. యూకేలో జరిగిన ఓ సర్వేలో 55 శాతం మంది మగవారు... ఏడిస్తే తాము మగవాళ్లం కాదని అంటారేమోనని భయపడుతున్నారు. అందుకే వస్తున్న ఏడుపును కూడా బలవంతంగా ఆపేసుకుని, గంభీరంగా కనిపించడానికి ప్రయత్నిస్తున్నారు.  ప్రపంచంలో ప్రతి 40 సెకన్లకు ఒకరు ఆత్మహత్యకు పాల్పడుతున్నారు. వారిలో ఎక్కువమంది మగవారే. 

ముఖ్య గమనిక: ఆరోగ్య నిపుణులు, పలు అధ్యయనాల్లో పేర్కొన్న అంశాలను ఇక్కడ యథావిధిగా అందించాం. మీకు ఎలాంటి సందేహాలు ఉన్నా వైద్యుడు లేదా ఆహార నిపుణులను సంప్రదించాలి. ఈ కథనం కేవలం మీ అవగాహన కోసమేనని గమనించగలరు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి