CIBIL Score : హోమ్ లోన్ తీసుకోవాలంటే సిబిల్ స్కోర్ ఎంత ఉండాలి? తగ్గితే మెరుగుపరిచే 5 మార్గాలు ఇవే

CIBIL Score for House Loan : ఇళ్లు కొనుక్కోవాలని.. దాని కోసం హోమ్ లోన్ తీసుకోవాలని అనుకుంటున్నారా? అయితే మీ సిబిల్ స్కోర్ ఎంత ఉండాలో తెలుసా? మంచి సిబిల్​ స్కోర్ కోసం ఫాలో అవ్వాల్సిన టిప్స్ ఇవే.

ఇంటి లోన్ కావాలంటే ఎంత సిబిల్ స్కోర్ ఉండాలి?

Source : Envato

Show Quick Read

Key points generated by AI, verified by newsroom

• సిబిల్ స్కోర్ క్రెడిట్ విశ్వసనీయతను, రుణ అర్హతను నిర్ణయిస్తుంది.
• 750 పైన స్కోర్ రుణాలు, క్రెడిట్ కార్డులు సులభతరం చేస్తుంది.
• EMIలు, క్రెడిట్ బిల్లులు సకాలంలో చెల్లించడం ముఖ్యం.
• రుణాల మధ్య సమతుల్యత, క్రమమైన రిపోర్ట్ తనిఖీ మేలుచేస్తుంది.

CIBIL Score for Home Loan : మీరు ఇళ్లు కొనుక్కోవడానికి లోన్ కోసం బ్యాంకుకు వెళ్తే.. వాళ్లు ముందుగా మీ సిబిల్ స్కోర్‌ చెక్ చేస్తారు. గృహ రుణం కోసం మంచి సిబిల్ స్కోర్ చాలా ముఖ్యం. ఒకవేళ మీ సిబిల్ స్కోర్ తక్కువగా ఉండి.. మీ గృహ రుణం క్యాన్సిల్ అయితే.. దానిని వీలైనంత త్వరగా ఎలా మెరుగుపరచుకోవాలో ఇప్పుడు తెలుసుకుందాం. 

సిబిల్ స్కోర్ అంటే..

క్రెడిట్ ఇన్ఫర్మేషన్ బ్యూరో ఇండియా లిమిటెడ్ (CIBIL) దేశంలోనే మొట్టమొదటి క్రెడిట్ ఇన్ఫర్మేషన్ కంపెనీ. ఇది క్రెడిట్ కార్డ్, రుణాల తిరిగి చెల్లింపుల రికార్డులను సేకరించి.. నిర్వహించడమే దీని పని. వీటి ఆధారంగా ఈ సంస్థ ఒక వ్యక్తికి సంబంధించిన సిబిల్ స్కోర్‌ను కేటాయిస్తుంది. సిబిల్ స్కోర్ అనేది మీ రుణ తిరిగి చెల్లింపు చరిత్రను ప్రతిబింబించే 3-అంకెల సంఖ్య. ఈ సంఖ్య డబ్బును అప్పుగా తీసుకోవడంలో, తిరిగి చెల్లించడంలో మీ విశ్వసనీయతను సూచిస్తుంది. అందుకే బ్యాంకులు, ఇతర సంస్థలు రుణం లేదా క్రెడిట్ కార్డ్ మంజూరు చేసే ముందు ఈ స్కోర్‌ను చెక్ చేస్తాయి. 

సిబిల్ స్కోర్ ఎంత ఉంటే మంచిది?

సిబిల్ స్కోర్ ఎల్లప్పుడూ 300 నుంచి 900 మధ్య ఉంటుంది. 750 లేదా అంతకంటే ఎక్కువ స్కోర్‌ను అద్భుతమైనదిగా పరిగణిస్తారు.  ఇది రుణం లేదా క్రెడిట్ కార్డ్ పొందడాన్ని సులభతరం చేస్తుందని గమనించాలి. 650 కంటే తక్కువ క్రెడిట్ స్కోర్ ఉన్న వ్యక్తులు రుణాలు తీసుకునేప్పుడు, క్రెడిట్ కార్డు తీసుకునేప్పుడు చాలా ఇబ్బందులను ఎదుర్కొంటారు. అలాగే బ్యాంకులు అధిక వడ్డీ రేట్లను వసూలు చేస్తాయి.

సిబిల్ స్కోర్ మెరుగుపరిచే అంశాలు..

మీ సిబిల్ స్కోర్‌ను మెరుగుపరచుకోవాలనుకుంటే.. ఇక్కడ 5 మార్గాలు ఉన్నాయి. అన్నిటికంటే ముందుగా.. మీరు ఇప్పటికే ఏదైనా రుణం తీసుకుంటే దాని EMIని సకాలంలో చెల్లించండి. వీటి చెల్లింపులో ఏ మాత్రం ఆలస్యం జరిగినా అది మీ సిబిల్ స్కోర్‌ను దెబ్బతీస్తుంది. మీ సిబిల్ స్కోర్‌ను మెరుగుపరచుకోవడానికి ఇది అత్యంత ముఖ్యమైన విషయం. 

క్రెడిట్ హంగర్..

చాలా మంది తక్కువ వ్యవధిలోనే పదేపదే రుణాలు లేదా క్రెడిట్ కార్డుల కోసం దరఖాస్తు చేసుకుంటారు. దీనివల్ల ఆ వ్యక్తికి డబ్బు అత్యవసరమని.. కేవలం రుణాలపైనే ఆధారపడి ఉన్నాడని బ్యాంకు భావిస్తుంది. దీనినే క్రెడిట్ హంగర్ అంటారు. ఈ అలవాటు మీ సిబిల్ స్కోర్‌ను దెబ్బతీస్తుంది. అందువల్ల మీరు అవసరం లేకుండా పదేపదే రుణాలు లేదా కార్డుల కోసం దరఖాస్తు చేసుకోవడాన్ని నివారించాలి.

క్రెడిట్ బిల్స్..

మీ క్రెడిట్ కార్డ్ బిల్లులను ఎల్లప్పుడూ సమయానికి చెల్లించండి. క్రెడిట్ కార్డ్ వాడకం మీ సిబిల్ స్కోర్‌పై గణనీయమైన ప్రభావాన్ని చూపుతుంది. కాబట్టి మీ క్రెడిట్ కార్డ్ బిల్లులను సమయానికి చెల్లించేలా చూసుకోండి. దీనివల్ల ఎక్కువ కట్టాల్సిన అవసరం ఉండదు. అలాగే సమతుల్యమైన సిబిల్ స్కోర్‌ను నిర్వహించడానికి సహాయపడుతుంది. 

బ్యాలెన్స్ అవసరం..

గృహ రుణాలు, కార్ లోన్‌ల వంటి సురక్షిత రుణాలకు.. పర్సనల్ లోన్స్, క్రెడిట్ కార్డ్‌ల వంటి అసురక్షిత రుణాలకు మధ్య సమతుల్యతను పాటించడం అవసరం. కేవలం వ్యక్తిగత రుణాలు లేదా కార్డ్‌లపై మాత్రమే ఆధారపడటం ఆదర్శంగా ఉండదు. రెండింటిలోనూ సమతుల్యతను పాటించడం మెరుగైన క్రెడిట్ స్కోర్‌కు దోహదం చేస్తుంది. మీరు నిజంగా మీ క్రెడిట్ స్కోర్‌ను మెరుగుపరచుకోవాలనుకుంటే.. సంవత్సరానికి కనీసం రెండుసార్లు మీ క్రెడిట్ రిపోర్ట్‌ను తనిఖీ చేసుకోండి. మీ పేరు మీద ఏవైనా మోసపూరిత రుణాలు ఉన్నాయో లేదో నిర్ధారించుకోవడానికి ఇది మీకు సహాయపడుతుంది. ఒకవేళ ఉంటే.. మీరు వాటిని వెంటనే సరిదిద్దుకోవచ్చు.

మీరు మీ సిబిల్ స్కోర్‌ను స్వయంగా కూడా తనిఖీ చేసుకోవచ్చు. దీనికోసం సిబిల్ అధికారిక వెబ్‌సైట్‌ను సందర్శించి.. ఉచిత సిబిల్ స్కోర్, నివేదికలను పొందవచ్చు. Get Free CIBIL Score And Reports పై క్లిక్ చేయండి. ఇక్కడ మీరు మీ పేరు, ఇమెయిల్, పుట్టిన తేదీ, నంబర్, పాన్ నంబర్ నింపడం ద్వారా మీ సిబిల్ స్కోర్ గురించి పూర్తి సమాచారాన్ని పొందుతారు.

మరిన్ని చదవండి

స్విచ్ ఆఫ్ చేసిన మొబైల్ ఫోన్ లైవ్ లొకేషన్‌ ఇలా తెలుసుకోండి.. యాపిల్, ఆండ్రాయిడ్ యూజర్స్ కోసం

సెకండ్ హ్యాండ్ ఏసీ కొనాలనుకుంటున్నారా? అయితే ఈ విషయాలు అస్సలు లైట్ తీసుకోకండి