Colon Cancer : ఈ 5 లక్షణాలు కనిపిస్తే లైట్ తీసుకోకండి.. పెద్దపేగు క్యాన్సర్ హెచ్చరిక సంకేతాలు ఇవే
Warning Signs of Colon Cancer : మీ శరీరంలో ఈ 5 లక్షణాలు కనిపిస్తుంటే.. అప్రమత్తంగా ఉండాలని.. లేకపోతే అవి పెద్ద పేగు క్యాన్సర్కు దారి తీస్తాయని అంటున్నారు. ఇంతకీ ఆ ప్రమాద హెచ్చరికలు ఏంటి?
Hidden Signs of Colon Cancer : పెద్దపేగు క్యాన్సర్ ప్రారంభ లక్షణాలు చాలా సాధారణమైనవిగా ఉంటాయి. అందుకే వీటిని చాలామంది నిర్లక్ష్యం చేస్తారు. కానీ పెద్దపేగు క్యాన్సర్ను సూచించే ఈ 5 సూక్ష్మ సంకేతాలను నిర్లక్ష్యం చేయవద్దని వైద్యులు హెచ్చరిస్తున్నారు. ముఖ్యంగా యువకుల్లో ఈ లక్షణాలు కనిపిస్తే వెంటనే అలెర్ట్ అవ్వాలని నిపుణులు సూచిస్తున్నారు. లేదంటే ఈ క్యాన్సర్ మిమ్మల్ని బలి తీసుకుంటుందని హెచ్చరిస్తున్నారు.
ఈ రోజుల్లో యువతలో పెద్దపేగు క్యాన్సర్ కేసులు వేగంగా పెరుగుతున్నాయి. అందుకే వైద్యులు కొన్ని హెచ్చరికలు జారీ చేస్తున్నారు. ఈ సమస్యను త్వరగా గుర్తించక.. అది పెరిగి శరీరంలోని ఇతర భాగాలకు వ్యాపిస్తే బతికే అవకాశాలు సుమారు 10 శాతానికి పడిపోతాయని నిపుణులు చెబుతున్నారు. అందుకే సకాలంలో చికిత్స ప్రారంభించాలని అంటున్నారు.
తేలికపాటి లక్షణాలు..
పెద్దపేగు క్యాన్సర్ ప్రారంభ లక్షణాలు చాలా తేలికగా ఉండటం వల్ల వీటిని తరచుగా లైట్ తీసుకుంటారు. కొన్నిసార్లు ఈ లక్షణాలు బాధాకరంగా ఉండవు. కాబట్టి ఈజీగా ఇగ్నోర్ చేస్తారు. బ్రిస్టల్లోని ది లాగోమ్ క్లినిక్లో జనరల్ ప్రాక్టీషనర్ అయిన డాక్టర్ జాక్ ఓగ్డెన్ ప్రకారం.. ఈ క్యాన్సర్ ఉంటే ప్రధానంగా ఈ ఐదు లక్షణాలు తరచుగా కనిపిస్తాయంటున్నారు. అవి పెద్దగా నొప్పిని కలిగించవని.. కానీ తప్పనిసరిగా శ్రద్ధ వహించాల్సిన కీలకమైన సంకేతాలు ఇవేనని అంటున్నారు. ఇంతకీ ఆ సంకేతాలు ఏంటంటే..
ఐరన్ లోపం
మొదటి లక్షణం ఐరన్ లోపం లేదా రక్తహీనత. కారణం తెలియని అలసట, పాలిపోయిన చర్మం, లేదా ఆయాసం వంటివాటిని తేలికగా తీసుకోకూడదు. కొన్నిసార్లు ఇది కణితి వల్ల కలిగే అంతర్గత రక్తస్రావం కారణంగా సంభవించవచ్చు.
జీర్ణ సమస్యలు
తరచుగా మలబద్ధకం లేదా విరేచనాలు, లేదా నీళ్ల విరేచనాలు వంటి పేగు సంబంధిత సమస్యలు కూడా మరో లక్షణం. ఇది కణితి కారణంగా ప్రేగులలో అడ్డంకి మారుతుంది.
బరువు తగ్గడం
మూడవ లక్షణం ఏంటంటే.. ఎలాంటి ప్రయత్నం లేకుండా అకస్మాత్తుగా బరువు తగ్గుతారు. మీరు డైటింగ్ లేదా వ్యాయామం చేయకపోయినా.. వేగంగా బరువు తగ్గుతుంటే.. అది మీ శరీరంలో ఏదో సమస్యను సూచిస్తుంది. కొన్నిసార్లు కణితి కారణంగా శరీరం పోషకాలను సరిగ్గా గ్రహించలేదు.
కడుపు నొప్పి
నాలుగవ లక్షణం కడుపునకు సంబంధించినది. ఉదాహరణకు నిరంతర నొప్పి, తిమ్మిర్లు, లేదా కొద్దిగా తిన్న తర్వాత కూడా కడుపు నిండినట్లు అనిపించడం. ఈ లక్షణం పేగుల సమస్యను కూడా సూచించవచ్చు.
మలంలో రక్తం
ఐదవ, అత్యంత ముఖ్యమైన లక్షణం మలంలో రక్తం పడటం. మలం నల్లగా లేదా ముదురు ఎరుపు రంగులో కనిపిస్తే.. అది శరీరంలో పైభాగంలో ఎక్కడో రక్తస్రావం జరుగుతోందని సూచించవచ్చు. ఇది కొన్నిసార్లు హెమరాయిడ్స్ (మొలలు) లేదా అనల్ ఫిషర్స్ వల్ల కూడా కలుగుతుంది. కానీ దీనిని నిర్లక్ష్యం చేయడం ప్రమాదకరం.
ఈ లక్షణాలలో ఏవైనా ఎక్కువ కాలం కొనసాగితే.. వెంటనే వైద్య సహాయం తీసుకోవాలని నిపుణులు సలహా ఇస్తున్నారు. మల పరీక్షలు, ఇతర వైద్య పరీక్షలు అంతర్లీనంగా ఉన్న సమస్యను నిర్ధారించడంలో సహాయపడతాయి.
గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.
టాప్ హెడ్ లైన్స్
ట్రెండింగ్ వార్తలు
