Custard Apple: డయాబెటిస్ రోగులు కూడా హ్యాపీగా తినొచ్చు... తింటే ఎన్ని లాభాలో

చలికాలం వచ్చిందంటే చాలు సీతాఫలాలు కుప్పలుగా రోడ్లపై అమ్మకానికి రెడీగా ఉంటాయి. వాటిని తినడం వల్ల ఎన్ని ఆరోగ్యప్రయోజనాలో...

(Image credit: Pixabay)

కస్టర్డ్ యాపిల్ గా పిలుచుకునే సీతాఫలాలు చలికాలంలో మాత్రమే పండే సీజనల్ పండ్లు. విటమిన్లు, ఖనిజాలు, యాంటీఆక్సిడెంట్లు పుష్కలంగా ఉండే పండ్లను కచ్చితంగా తినమని సిఫారసు చేస్తారు వైద్యులు. ముఖ్యంగా డయాబెటిస్ రోగులు కొన్ని రకాల పండ్లు తినడానికి సంకోచిస్తారు. అందులో అధికంగా చక్కెర ఉంటుందనే భయం వారిది. అయితే మధుమేహులు ఎలాంటి భయం లేకుండా సీతాఫలం  పండ్లను తినచ్చు.  ఎందుకంటే ఇందులో గ్లైసెమిక్ ఇండెక్స్ తక్కువగా ఉంటుంది. ఈ పండ్లను తింటే రక్తంలో గ్లూకోజ్ స్థాయులు ఆకస్మికంగా పెరిగే ఛాన్స్ తక్కువ. కాబట్టి ఎలాంటి సంకోచం లేకుండా డయాబెటిక్ రోగులు ఈ  పండ్లను తినవచ్చు. 

ఇతర ఆరోగ్యప్రయోజనాలు

1. సీతాఫలంలో ఫైబర్ అధికంగా ఉంటుంది. పేగులలో ఆహారం మృదువుగా కదిలేందుకు సాయపడుతుంది. దీనివల్ల జీర్ణక్రియ మెరుగుపడుతుంది. అలాగే పేగుల్లోని మంచి బ్యాక్టిరియా ‘మైక్రోబయామ్ ’ను పెంచడంలో సహాయపడుతుంది. తద్వారా పేగుల ఆరోగ్యం మెరుగుపడుతుంది. 
2. వీటిలో యాంటీ ఆక్సిడెంట్ లుటీన్ పుష్కలంగా ఉంటుంది. ఇది కంటి ఆరోగ్యాన్ని కాపాడుతుంది.  కంటిలో మచ్చలు ఏర్పడే 
సమస్యను కూడా దూరం చేస్తుంది.
3. గుండె ఆరోగ్యానికి సీతాఫలం చాలా మేలు చేస్తుంది. దీనిలో మెగ్నీషియం, పొటాషియం వంటి పోషకాలు రక్తపోటును నియంత్రించడంలో ముందుంటాయి. సీతాఫలంలో యాంటీఇన్ఫ్లమేటరీ లక్షణాలు అధికంగా ఉంటాయి. దీని వల్ల శరీరంలో వాపు రాకుండా అడ్డుకుంటుంది. రక్తంలో చక్కెరస్థాయిలను నియంత్రణలో ఉంచుతుంది.  
4. రోగనిరోధక శక్తిని పెంచడానికి కూడా సీతాఫలంలోని పోషకాలు సహకరిస్తాయి. ఈ పండులో విటమిన్ సి పుష్కలంగా ఉంటుంది. దీని వల్ల రోగనిరోధక శక్తి పెరుగుతుంది. ఇన్ఫెక్షన్లు, వైరల్ జ్వరాలు, వ్యాధులు త్వరగా దరి చేరవు.

ముఖ్య గమనిక: ఆరోగ్య నిపుణులు, పలు అధ్యయనాల్లో పేర్కొన్న అంశాలను ఇక్కడ యథావిధిగా అందించాం. మీకు ఎలాంటి సందేహాలు ఉన్నా వైద్యుడు లేదా ఆహార నిపుణులను సంప్రదించాలి. ఈ కథనం కేవలం మీ అవగాహన కోసమేనని గమనించగలరు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి