Sri Lankan Chilli Vada Recipe : శ్రీలంక స్పెషల్ మిర్చి వడ.. టేస్టీ, క్రంచీ స్నాక్ కోసం ఈ రెసిపీ ట్రై చేసేయండి
Mirchi Vada Recipe : సాయంత్రం అయితే మిర్చి బజ్జీలు తినేవారు చాలామందే ఉంటారు. అయితే మీరు ఎప్పుడైనా మిర్చి వడ గురించి విన్నారా? అయితే ఈ టేస్టీ రెసిపీ మీరు ట్రై చేయాల్సిందే.
Tea Time Special Crispy and Spicy Chilli Vada : సాయంత్రం అయిందంటే చాలు. చాలామంది తమకి ఇష్టమైన స్నాక్స్ లాగించేస్తారు. అలాంటి వాటిలో మిర్చి బజ్జీ ఒకటి. అయితే ఎప్పుడూ మిర్చి బజ్జీ కాకుండా.. వడగా తిన్నారా? టేస్టీగా, క్రిస్పీగా తినాలనుకుంటే ఈ శ్రీలంక స్పెషల్ రెసిపీని ట్రై చేయొచ్చు. చాలా సింపుల్గా, ఇంట్లో చేసుకోగలిగే ఈ మిర్చివడను ఎలా చేసుకోవాలో.. కావాల్సిన పదార్థాలు ఏంటో ఇప్పుడు తెలుసుకుందాం.
కావాల్సిన పదార్థాలు
పెసరపప్పు - 150 గ్రాములు
వెల్లుల్లి - 2 రెబ్బలు
అల్లం - 1 అంగుళం
రవ్వ - 2 టేబుల్ స్పూన్లు
ఉప్పు - రుచికి తగినంత
కారం - 1 టీస్పూన్
పసుపు - పావు టీస్పూన్
మిర్చి ఫ్లేక్స్ - 1 టీస్పూన్
మెంతుల ఆకులు - అర టీస్పూన్
గరం మసాలా - అర టీస్పూన్
ధనియాలు - 1 టేబుల్ స్పూన్
జీలకర్ర - 1 టీస్పూన్
కొత్తిమీర - అరకప్పు (తురుము)
నూనె - డీప్ ఫ్రైకి సరిపడేంత
పచ్చిమిర్చి - 10 (కారం తక్కువ ఉండేవి)
తయారీ విధానం
ముందుగా పెసరపప్పు నానబెట్టుకోవాలి. కనీసం రెండు గంటల ముందు నానబెట్టుకుంటే మంచిది. పెసరపప్పు నానిన తర్వాత.. ఓ రెండు స్పూన్లు తీసి పక్కన పెట్టుకోవాలి. మిగిలిన పెసరపప్పులో అల్లం, వెల్లుల్లి వేసి మిక్సీ చేసుకోవాలి. తర్వాత దీనిని ఓ పెద్ద మిక్సింగ్ గిన్నెలోకి తీసుకోవాలి. దానిలో పక్కకి తీసిన పెసరపప్పు, రవ్వ, కారం, ఉప్పు, జీలకర్ర, మిర్చి ఫ్లేక్స్, మెంతి ఆకులు, గరం మసాలా, ధనియాలు (నలిపి వేయాలి), జీలకర్ర, కొత్తిమీర వేసి కలపాలి.
పిండిని బాగా మెత్తగా, అన్ని బాగా కలిసేలా కలుపుకోవాలి. పిండిలో నీళ్లు వేయకూడదు. ఇప్పుడు పిండిని మూత వేసి పక్కన పెట్టుకోవాలి. పది నిమిషాల తర్వాత తురిమిన ఉల్లిపాయ ముక్కలు వేసుకుని మరోసారి పిండిని బాగా కలపాలి. ఇప్పుడు మిర్చి తీసుకుని.. దానిపై ఈ మిశ్రమాన్ని చుట్టాలి. ఇలా అన్ని చుట్టుకున్న తర్వాత స్టౌవ్ వెలిగించాలి. మీడియం మంట మీద కడాయి పెట్టి దానిలో డీప్ ఫ్రైకి సరిపడేంత నూనె వేసుకోవాలి.
నూనె బాగా కాగిన తర్వాత.. దానిలో ఈ మిర్చీలను వేసుకోవాలి. అవి క్రిస్పీగా, గోల్డెన్ కలర్ మారిన తర్వాత తీసేయాలి. అంతే టేస్టీ, క్రిస్పీ మిర్చి వడ రెడీ. వీటిని మీరు నేరుగా లేదా టమాటా కెచెప్తో కలిపి తినేయొచ్చు. మరి ఇంకెందుకు ఆలస్యం. మీరు కూడా హాయిగా సాయంత్రం వేళల్లో పిల్లలకు స్నాక్స్గా, ఛాయ్తో పాటు మీకు కూడా సపోర్ట్గా ఉండే టేస్టీ ఐటమ్ చేసేసుకోండి.
టాప్ హెడ్ లైన్స్
ట్రెండింగ్ వార్తలు
