Castor Oil on the Belly Button : బొడ్డుపై ఆముదం మసాజ్.. వైరల్ ట్రెండ్ వల్ల నిజంగా లాభాలున్నాయా? నిపుణులు చెప్పిన నిజాలు ఇవే
Castor Oil Belly Patch : ఈ రోజుల్లో ట్రెండ్ అవుతున్న ఆరోగ్య చిట్కాలలో నాభిపై ఆముదం రాయడం ఒకటిగా చెప్పవచ్చు. ఇలా పొట్టకు ఆముదం రాయడం వల్ల కలిగే లాభాలు ఏంటో.. నష్టాలో ఉన్నాయో లేదో తెలుసుకుందాం.
- బొడ్డులో ఆముదం పూయడం ఆరోగ్యానికి మేలు చేస్తుందని ట్రెండ్ అవుతోంది.
- కొంతమంది జీర్ణక్రియ, నొప్పి నివారణకు దీనిని ఉపయోగిస్తున్నారు.
- శాస్త్రీయ ఆధారాలు లేవని, చర్మపు చికాకు రావచ్చని నిపుణులు హెచ్చరిస్తున్నారు.
- తీవ్రమైన సమస్యలకు వైద్యుడిని సంప్రదించడం మంచిది.
Belly Button Oiling Trend : ఈరోజుల్లో హెల్తీ లైఫ్ స్టైల్ లీడ్ చేయడం ఎంత ముఖ్యమో.. అంతే కష్టంగా కూడా మారింది. ఉదయాన్నే నిద్రలేవడం, వ్యాయామం చేయడం, ఆరోగ్యకరమైన ఆహారం తీసుకోవడం, సమయానికి నిద్రపోవడం వంటివి కేవలం ప్రణాళికలుగానే మిగిలిపోతున్నాయి. ఫలితంగా సోషల్ మీడియాలో వైరల్ అవుతున్న ఆరోగ్య చిట్కాలకు ఎక్కువమంది ఆకర్షితులవుతున్నారు. అలా ఎక్కువమందిని అట్రాక్ట్ చేస్తోన్న ట్రెండ్లలో ఆముదం బెల్లీ ప్యాచ్ ఒకటి.
ఆముదాన్ని బొడ్డులో వేసి కాసేపు మసాజ్ చేస్తే ఆరోగ్యానికి ఎన్నో లాభాలు ఉన్నాయంటూ ట్రెండ్ చేస్తున్నారు. ఇది జీర్ణక్రియను మెరుగుపరుస్తుందని, వాపును తగ్గిస్తుందని, శరీరాన్ని డీటాక్స్ చేస్తుందని ప్రచారం జరుగుతోంది. అయితే ఇది ఎంతవరకు ప్రభావవంతమైనదో.. ఆముదం అప్లై చేయడం వల్ల కలిగే లాభాలు ఏంటో.. ఎలా అప్లై చేయాలో.. నష్టాలు ఉన్నాయో లేదో.. నిపుణులు ఇస్తోన్న సలహాలు ఏంటో చూసేద్దాం.
ఎలా అప్లై చేయాలంటే..
ఆముదం నూనెను దూది ఉండకు లేదా గుడ్డకు పూసి బొడ్డు ప్రాంతంలో ఉంచాలి. తర్వాత దానిని టేప్ లేదా గుడ్డతో సెట్ చేసుకుని.. కొన్ని గంటలు లేదా రాత్రంతా అలాగే వదిలేస్తారు. చాలామంది దీనిని వారానికి 4 నుంచి 7 సార్లు ఉపయోగించమని సిఫార్సు చేస్తారు. లేదా నిద్రపోయే ముందు రెండు, మూడు చుక్కలు ఆముదం బొడ్డులో నెమ్మదిగా మసాజ్ చేయాలి. ఇది మరో టెక్నిక్.
ఆముదం అప్లై చేయడం వల్ల కలిగే లాభాలు..
ఆయుర్వేదం ప్రకారం.. పొత్తికడుపు చుట్టూ ఉన్న ప్రాంతం జీర్ణాశయ శక్తితో ముడిపడి ఉంటుంది. జీర్ణశక్తిని, రోగనిరోధక శక్తిని కాపాడుకోవడానికి ఈ ప్రాంతం చాలా కీలకమైనదిగా పరిగణిస్తారు. ఈ పద్ధతి వల్ల కొంతమందిలో జీర్ణక్రియలో స్వల్ప మెరుగుదల, మలబద్ధకం నుంచి ఉపశమనం, కడుపు ఉబ్బరం తగ్గడం, పీరియడ్ నొప్పి నుంచి ఉపశమనం పొందవచ్చని నిపుణులు చెప్తున్నారు. అయితే దీనిని ఒక సహాయక చర్యగా మాత్రమే పరిగణిస్తారు.
శాస్త్రీయ ఆధారాలు
వైద్య నిపుణులు ఏమంటున్నారంటే.. ఈ ధోరణి అన్ని ఫలితాలు ఇస్తుందని నమ్మట్లేదు. బయటి నూనెలు శరీరంలోకి లోతుగా చొచ్చుకుపోకుండా నిరోధించే విధంగా మన చర్మ నిర్మాణం ఉందని నమ్ముతారు. అందువల్ల కడుపునకు ఆముదం నూనెను పూయడం వల్ల జీర్ణవ్యవస్థపై గానీ, హార్మోన్లపై గానీ ఏదైనా ప్రభావం ఉంటుందనడానికి శాస్త్రీయ ఆధారాలు లేవు. దానివల్ల కలిగే ఏ కొద్దిపాటి ఉపశమనమైనా.. ఆ వెచ్చదనం లేదా సున్నితమైన మసాజ్ వల్ల జరిగేవే అంటున్నారు.
సైడ్ ఎఫెక్ట్స్..
నిపుణుల అభిప్రాయం ప్రకారం.. దీనిని పరిమిత సమయం వరకు ఉపయోగించడం సురక్షితమే. కానీ ఎక్కువ సేపు లేదా రాత్రంతా పూయడం వల్ల చర్మపు చికాకు, రంధ్రాలు మూసుకుపోవడం లేదా మొటిమలు వంటి సమస్యలు రావచ్చు. సున్నితమైన చర్మం, అలర్జీలు లేదా చర్మ సమస్యలు ఉన్నవారు దీనికి దూరంగా ఉండాలని వైద్యులు సలహా ఇస్తున్నారు. గర్భిణీ స్త్రీలు కూడా దీనిని ఉపయోగించే ముందు వైద్యుడిని సంప్రదించాలని సూచిస్తున్నారు.
ఆముదంతో చేసే ఈ ప్రక్రియ జీర్ణక్రియను మెరుగుపరుస్తాయని, ఉబ్బరాన్ని తగ్గిస్తాయని లేదా నిద్రకు సహాయపడతాయని చెప్పడానికి బలమైన ఆధారాలు లేవని కొందరు వైద్యులు కూడా అంటున్నారు. జీర్ణక్రియ అనేది శరీరంలోని అంతర్గత అవయవాలు, పేగులు, నరాలు, హార్మోన్ల మధ్య జరిగే పరస్పర చర్య ద్వారా జరిగే ప్రక్రియ అని.. చర్మానికి నూనెను పూయడం వల్ల ఈ ప్రక్రియలపై ఎలాంటి ప్రభావం ఉండదని అంటున్నారు.
మీకు తరచుగా కడుపు ఉబ్బరం లేదా జీర్ణ సమస్యలు ఉంటే.. వైద్యుడిని సంప్రదించడం మంచిదని చెప్తున్నారు. అలాగే మీ ఆహారం, తగినంత నీరు తాగడం, శారీరక శ్రమ, ఒత్తిడి స్థాయిలపై శ్రద్ధ పెట్టడం మంచిదని సూచిస్తున్నారు.
గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.
టాప్ హెడ్ లైన్స్
ట్రెండింగ్ వార్తలు
