Sitara Ghattamaneni: సితార గొప్ప మనసు - అనాథల కోసం 'గుంటూరు కారం' స్పెషల్ షో

Guntur Karam Special Screening: సూపర్ స్టార్ మహేష్ బాబు కుమార్తె సితార తనది గొప్ప మనసు అని మరోసారి నిరూపించుకున్నారు. అనాథల కోసం స్పెషల్ షో వేశారు.

అనాథ బాలలతో సితార ఘట్టమనేని 

సూపర్ స్టార్ మహేష్ బాబు స్టార్ హీరో. తెలుగు చిత్రసీమలోని అగ్ర హీరోల్లో ఆయన ఒకరు. మహేష్ తాను గొప్ప హీరో మాత్రమే కాదు... తనది గొప్ప మనసు అని పలు సందర్భాల్లో చాటి చెప్పారు. ఎంతో మంది చిన్నారులకు గుండె ఆపరేషన్లు ఫ్రీగా చేయిస్తున్నారు. మహేష్ కుమార్తె సితారది సైతం తనది గొప్ప మనసు. ఇప్పటికే తండ్రికి తగ్గ తనయ అనిపించుకున్నారు. ప్రశంసలు అందుకున్నారు. మరోసారి సితార చేసిన పనికి ప్రశంసలు దక్కుతున్నాయి. పూర్తి వివరాల్లోకి వెళితే...

అనాథల కోసం 'గుంటూరు కారం' స్పెషల్ షో
మహేష్ బాబు కథానాయకుడిగా త్రివిక్రమ్ శ్రీనివాస్ దర్శకత్వం వహించిన తాజా సినిమా 'గుంటూరు కారం'. సంక్రాంతి కానుకగా థియేటర్లలో విడుదలైంది. ఆల్రెడీ 212 కోట్ల రూపాయల గ్రాస్ కలెక్ట్ చేసిందని నిర్మాణ సంస్థ హారిక అండ్ హాసిని క్రియేషన్స్ వెల్లడించింది. లేటెస్టుగా ఈ సినిమాను కొంత మంది అనాథలకు సితార చూపించారు.

చీర్స్ ఫౌండేషన్ సంస్థకు చెందిన అనాథ బాలలకు గచ్చిబౌలిలోని ఏఎంబీ సినిమాస్ మల్టీప్లెక్స్‌లో మహేష్ బాబు ఫౌండేషన్ సహకారంతో 'గుంటూరు కారం' స్పెషల్ స్క్రీనింగ్ ఏర్పాటు చేశారు సితార. అనంతరం ఆ బాలలతో కాసేపు ముచ్చటించారు. వారితో ఫోటోలు దిగారు. సినిమా తమకు నచ్చిందని ఆ చిన్నారులు చెప్పినట్లు తెలిసింది.

A cinematic celebration 💕#SitaraGhattamaneni hosted a special screening of #GunturKaaram for orphan kids of Cheers Foundation at @amb_cinemas in association with #MaheshBabuFoundation ❤️@MBfoundationorg @urstrulymahesh#BlockbusterGunturKaaram pic.twitter.com/oE9Gq2k5Ao

— Ramesh Bala (@rameshlaus) January 21, 2024

కోటి రూపాయలు ఛారిటీకి ఇచ్చిన సితార
సూపర్ స్టార్ ఫ్యామిలీలో జన్మించినప్పటికీ... సితారలో అసలు ఎటువంటి గర్వం ఉండదని ఆమెను సన్నిహితంగా చూసిన జనాలు చెబుతారు. ఆ మధ్య ఓ ప్రోగ్రాంకు సితార వెళ్లారు. ముసలావిడ మెట్లు ఎక్కడానికి ఇబ్బంది పడుతుంటే ఆమెను సాయం అందించారు సితార. పీఎంజే జ్యువెలరీ సంస్థ ప్రచారకర్తగా సితార యాడ్ చేశారు. దాని ద్వారా వచ్చిన కోటి రూపాయలను ఛారిటీకి ఇచ్చేశారు. ఆమె మంచి మనసు గురించి చెప్పడానికి ఇవి ఉదాహరణలు.

త్వరలో 'గుంటూరు కారం' సక్సెస్ మీట్!?
'గుంటూరు కారం' విడుదలకు ముందు ప్రీ రిలీజ్ ఈవెంట్ నిర్వహించారు. అది తప్ప హీరోతో పాటు దర్శకుడు త్రివిక్రమ్ మీడియా ముందుకు వచ్చింది లేదు. ఆ తర్వాత మహేష్ బాబు, శ్రీ లీలతో ఒక ఇంటర్వ్యూ విడుదల చేశారు. పబ్లిసిటీ విషయంలో సినిమా యూనిట్ లో ప్రొఫైల్ మైంటైన్ చేసింది. అయినప్పటికీ... సినిమా కోట్ల రూపాయల వసూళ్లు సాధించింది. 

సినిమా విడుదలైన తర్వాత మహేష్ బాబు ఇంట్లో 'గుంటూరు కారం' బ్లాక్ బస్టర్ సెలబ్రేషన్స్ నిర్వహించారు. నైజాంలో సినిమాను డిస్ట్రిబ్యూట్ చేసిన 'దిల్' రాజు, ఆయన సోదరుడు శిరీష్ సహా దర్శకులు మెహర్ రమేష్ వంటి సన్నిహితులు ఆ పార్టీకి అటెండ్ అయ్యారు. లేటెస్ట్ టాక్ ఏమిటంటే... త్వరలో సినిమా సక్సెస్ మీట్ ఏర్పాటు చేయనున్నారట. త్రివిక్రమ్, తమన్ సహా ఆ వేడుకకు అందరూ అటెండ్ అవుతారని టాక్.