కానిస్టేబుల్ ఆత్మహత్యాయత్నం ఓ డ్రామా.. వాస్తవాలను వెల్లడించిన హైదరాబాద్ పోలీస్ శాఖ
Hyderabad Police | జూబ్లీహిల్స్ జోన్లో పనిచేస్తున్న కానిస్టేబుల్ ఎం యాదగిరిపై పోలీస్ శాఖ క్రమశిక్షణా చర్యలో భాగంగా సస్పెండ్ చేయడంతో ఆత్మహత్య డ్రామా చేశారని పోలీస్ ఉన్నతాధికారులు పేర్కొన్నారు.
హైదరాబాద్ నగర పోలీస్ ఉన్నతాధికారులపై ఒక కానిస్టేబుల్ చేస్తోన్న ఆరోపణలు పూర్తిగా అవాస్తవమని పోలీస్ శాఖ స్పష్టం చేసింది. జూబ్లీహిల్స్ జోన్ మహిళా పోలీస్ స్టేషన్లో పనిచేస్తున్న కానిస్టేబుల్ ఎం. యాదగిరి (PC 6211) చేసిన వ్యాఖ్యలు నిరాధారమైనవని అధికారులు తెలిపారు. యాదగిరిపై విధి నిర్వహణలో పలు తీవ్రమైన ఆరోపణలు ఉన్నాయని, ఆయన తరచుగా రోల్ కాల్స్కు గైర్హాజరు కావడం, డ్యూటీ సమయంలో రెస్ట్ రూమ్లో నిద్రపోవడం, యూనిఫామ్ నిబంధనలు పాటించకపోవడం వంటి క్రమశిక్షణా రాహిత్యానికి పాల్పడుతున్నారని వెల్లడించారు.
సస్పెండ్ చేశారనే కానిస్టేబుల్ ఆత్మహత్య డ్రామా..
ముఖ్యంగా, స్టేషన్కు వచ్చే బాధితుల నుంచి డబ్బులు డిమాండ్ చేసినట్లు ఫిర్యాదులు రావడంతో, పలుమార్లు హెచ్చరించినప్పటికీ ఆయన తీరు మార్చుకోకపోవడంతో శనివారం నాడు నగర పోలీస్ కమిషనర్ ఆయనను సస్పెండ్ చేశారు. సస్పెన్షన్ ఉత్తర్వులు అందుకున్న తర్వాత తన తప్పులను కప్పిపుచ్చుకునేందుకే యాదగిరి ఆత్మహత్య డ్రామాకు తెరతీశారని అధికారులు ధ్వజమెత్తారు. శనివారం మధ్యాహ్నం 3:00 గంటల సమయంలో సోషల్ మీడియాలో సెల్ఫీ వీడియో పోస్ట్ చేసి, అధికారులను బ్లాక్ మెయిల్ చేసే ప్రయత్నం చేశారని వారు తెలిపారు. ఉన్నతాధికారుల వేధింపుల వల్లే తాను ఆత్మహత్య చేసుకుంటున్నట్లు ఆయన విడుదల చేసిన వీడియో కేవలం ఒక కల్పిత నాటకమని, ఉద్దేశపూర్వకంగానే పోలీస్ వ్యవస్థపై దుష్ప్రచారానికి పాల్పడుతున్నారని పేర్కొన్నారు.
గతంలో తప్పుడు వీడియోతో సస్పెన్షన్ వేటు
యాదగిరికి గతంలోనూ ఇటువంటి అలవాట్లు ఉన్నాయని పోలీస్ శాఖ వివరించింది. గతంలో ఎస్సార్ నగర్ ట్రాఫిక్ పోలీస్ స్టేషన్లో పనిచేసేటప్పుడు చిరు వ్యాపారుల నుంచి అక్రమ వసూళ్లకు పాల్పడి, మొబైల్ డ్యూటీ నుంచి తప్పించినప్పుడు కూడా ఇలాగే సోషల్ మీడియాలో తప్పుడు వీడియో పెట్టి సస్పెండ్ అయ్యారని గుర్తుచేశారు. అలాగే మోఘల్పురా మరియు బోరబండ ఔట్పోస్ట్లో పనిచేసిన సమయంలోనూ అవినీతి కార్యకలాపాలు, బెల్ట్ షాపులు, వైన్ షాపుల నిర్వాహకులను వేధించడం వంటి పనులకు పాల్పడినట్లు రికార్డులు ఉన్నాయని తెలిపారు.
బాధ్యతాయుతమైన పోలీస్ వృత్తిలో ఉంటూ పదేపదే ప్రవర్తనా నియమావళిని ఉల్లంఘించినందుకే కానిస్టేబుల్ యాదగిరిపై క్రమశిక్షణా చర్యలు తీసుకోవడం జరిగిందని పోలీస్ ఉన్నతాధికారులు స్పష్టం చేశారు. పోలీస్ వ్యవస్థలో క్రమశిక్షణా రాహిత్యాన్ని ఎట్టి పరిస్థితుల్లోనూ ఉపేక్షించబోమని, వాస్తవాలను వక్రీకరించి అధికారుల ప్రతిష్టను దెబ్బతీసేలా యాదగిరి సర్క్యులేట్ చేస్తున్న కల్పిత వీడియోను ఎవరూ నమ్మవద్దని హైదరాబాద్ పోలీస్ శాఖ కోరింది.
టాప్ హెడ్ లైన్స్
ట్రెండింగ్ వార్తలు
