US Israel Strikes On Iran: దుబాయ్‌లో చిక్కుకున్న 'లెజెండ్' హీరోయిన్... ప్రధాని మోడీ సాయం కోరుతూ పోస్ట్

Sonal Chauhan Stuck In Dubai: గాడ్ ఆఫ్ మాసెస్ బాలకృష్ణ సరసన 'లెజెండ్', 'డిక్టేటర్', 'రూలర్' సినిమాల్లో నటించిన హీరోయిన్ సోనాల్ చౌహన్. ఇరాన్ మీద అమెరికా - ఇజ్రాయెల్ దాడి నేపథ్యంలో మోదీ సాయం కోరారు.

దుబాయ్ లో చిక్కుకున్న సోనాల్ చౌహాన్

Source : Sonal Instagram

హీరోయిన్ సోనాల్ చౌహన్ (Sonal Chauhan) గుర్తు ఉన్నారా? గాడ్ ఆఫ్ మాసెస్, నట సింహం నందమూరి బాలకృష్ణతో మూడు సినిమాలు చేశారు. 'లెజెండ్', 'డిక్టేటర్', 'రూలర్' సినిమాల్లో నటించారు. రామ్ పోతినేనితో 'పండగ చేస్కో' చేశారు. ఇప్పుడీ అందాల భామ దుబాయ్‌లో చిక్కుకున్నారు. వివరాల్లోకి వెళితే... 

ఇరాన్ మీద ఇజ్రాయెల్ & అమెరికా యుద్ధం నేపథ్యంలో దుబాయ్‌ ఎయిర్‌ పోర్ట్‌లో పలు విమానాలు క్యాన్సిల్ చేశారు. దాంతో చాలా మంది ప్రయాణికులు దుబాయ్ విమానాశ్రయంలో చిక్కుకుపోయారు. దుబాయ్‌లో తమ ఇంటి పైనుంచి రాకెట్ లాంచర్లు వెళ్లిన వీడియో షేర్ చేశారు హీరో విష్ణు మంచు. హీరోయిన్ సోనాల్ చౌహాన్ సైతం ప్రస్తుతం దుబాయ్‌లో ఉన్నారు. ప్రధాని నరేంద్ర మోడీ సహాయం కోరుతూ ఆమె ఓ పోస్ట్ చేశారు.

దుబాయ్‌లో చిక్కుకున్న సోనాల్ చౌహాన్

సోనాల్ చౌహాస్ శనివారం ఇన్‌స్టాగ్రామ్ స్టోరీలో ఓ పోస్ట్ చేశారు. ''గౌరవనీయులైన ప్రధాని నరేంద్ర మోడీ గారికి... నేను ప్రస్తుతం దుబాయ్‌లో ఉన్నారు. వార్ టెన్షన్ మధ్య చిక్కుకున్నాను. విమానాలు క్యాన్సిల్ చేశారు. ఇండియాకు తిరిగి రావడానికి స్పష్టమైన దారి కనిపించడం లేదు. సురక్షితంగా ఇంటికి (ఇండియాకు) తిరిగి రావడానికి సహాయం చేయమని కోరుతున్నాను. భారత ప్రభుత్వ మార్గదర్శకత్వం, మద్దతు కోరుకుంటున్నా. సురక్షితంగా తిరిగి రావడానికి నేను ఎదురు చూస్తున్నా... థాంక్స్‌'' అని సోనాల్ పేర్కొన్నారు.

డబుల్ ఒలింపిక్ మెడలిస్ట్, తెలుగు అమ్మాయి పీవీ సింధు కూడా ఇలాంటి సమస్యను ఎదుర్కొంటున్నారు. ఆమె కూడా దుబాయ్ విమానాశ్రయంలో చిక్కుకున్నారు. ఇన్‌స్టాగ్రామ్‌లో సింధు సైతం ఓ పోస్ట్ చేశారు. ''తదుపరి సమాచారం వచ్చే వరకు అన్ని విమానాలు నిలిపివేశారు'' అని ఆమె తెలిపారు.

హిందీలో 'జన్నత్'తో సోనాల్ చౌహాన్‌కు గుర్తింపు

సోనాల్ చౌహాన్ హిందీ సినిమాల గురించి చెప్పాలంటే... త్వరలో 'మిర్జాపూర్' సినిమాలో ఆమె కనిపించనున్నారు. సోనాల్ 2008లో విడుదల అయిన 'జన్నత్' సినిమాతో గుర్తింపు పొందారు. ఆమె బాలీవుడ్ ఫస్ట్ సినిమా అది. దాంతో ఓవర్ నైట్ స్టార్ అయ్యారు. ఆ తర్వాత తెలుగు సినిమా 'రెయిన్‌బో'లో కనిపించారు. కన్నడ, తమిళ, తెలుగు సినిమాలు కూడా చేశారు.

'పెహ్లా సితారా, లెజెండ్, 3జీ, బుద్ధా హోగా తేరా బాప్, సైజ్ జీరో, రూలర్, పల్టన్, డిక్టేటర్, ది పవర్, ది ఘోస్ట్, ఆదిపురుష్' వంటి చిత్రాలు చేశారు సోనాల్ చౌహాన్. 'ఆదిపురుష్‌'లో మండోదరి పాత్రలో నటించారు. చివరిగా 'దర్ద్' సినిమాలో కనిపించారు. ఆ సినిమాలో ఆమె ఫాతిమా పాత్రలో కనిపించారు. అది ఆమె మొదటి బంగ్లాదేశ్ - బెంగాలీ సినిమా. సోనాల్ అనేక మ్యూజిక్ వీడియోలు కూడా చేశారు.