Sunny Deol - Gadar 2 Collections : తారా సింగ్ @ 260 కోట్లు - బాక్సాఫీస్ బరిలో సన్నీ డియోల్ దూకుడు తగ్గట్లేదుగా

'ఎప్పుడు వచ్చామన్నది కాదన్నయ్యా... బుల్లెట్ దిగిందా? లేదా?' - ఇదీ 'పోకిరి'లో మహేష్ బాబు డైలాగ్. హిందీ సినిమా 'గదర్ 2' కలెక్షన్స్ విషయంలో ఈ డైలాగ్ సరిపోతుంది ఏమో!?

హైదరాబాద్ లో నిర్వహించిన 'గదర్ 2' విలేకరుల సమావేశంలో సన్నీ డియోల్ 

ఎప్పుడు వచ్చామన్నది కాదన్నయ్యా... బుల్లెట్ దిగిందా? లేదా? - 'పోకిరి'లో సూపర్ స్టార్ మహేష్ బాబు (Mahesh Babu) చెప్పిన పంచ్ డైలాగుల్లో ఇదొకటి. డేరింగ్ & డాషింగ్ డైరెక్టర్ పూరి జగన్నాథ్ రాసిన ఈ డైలాగ్... ప్రస్తుతం హిందీ చలన చిత్ర పరిశ్రమలో సరికొత్త రికార్డులు క్రియేట్ చేస్తున్న 'గదర్ 2' (Gadar 2 Movie) కలెక్షన్స్ గురించి చెప్పడానికి సరిగ్గా సరిపోతుందేమో!?

సీక్వెల్... అదీ 22 ఏళ్ళ తర్వాత!
'గదర్' సినిమాలో సన్నీ డియోల్ (Sunny Deol) హీరో. ఆయనకు జోడీగా హీరోయిన్ అమీషా పటేల్ నటించారు. వీళ్ళిద్దరూ జంటగా నటించిన 'గదర్ : ఏక్ ప్రేమ్ కథ'లో జంటగా నటించారు. ఎప్పుడో 2011లో... అంటే 22 ఏళ్ళ క్రితం విడుదల అయ్యింది. అప్పట్లో ఆ సినిమా సంచలన విజయం సాధించింది. ఇప్పుడు దానికి సీక్వెల్ వచ్చింది. 'గదర్ 2' విడుదలకు ముందు కొంత మంది సందేహాలు వ్యక్తం చేశారు. ఇప్పుడు సన్నీ డియోల్ మార్కెట్ అంత లేదుగా? 22 ఏళ్ళ క్రితం వచ్చిన సినిమా గుర్తు ఉంటుందా? వంటి కామెంట్స్ కూడా వినిపించాయి. వాటన్నిటికీ బాక్సాఫీస్ కలెక్షన్లతో సన్నీ డియోల్ సమాధానం చెబుతున్నారు. 

'గదర్ 2' @ 260 కోట్లు
ఆగస్టు 11న 'గదర్ 2' ప్రేక్షకుల ముందుకు వచ్చింది. మొదటి రోజు నుంచి, తొలి ఆట నుంచి ఈ సినిమాకు హిట్ టాక్ లభించింది. బాక్సాఫీస్ బరిలో బ్లాక్ బస్టర్ అందుకున్నారు సన్నీ డియోల్. తారా సింగ్ పాత్రలో తనదైన నటనతో ఆయన ఆకట్టుకున్నారు. 

విడుదలైన ఐదు రోజుల్లో 'గదర్ 2' సినిమా 229 కోట్ల రూపాయల కలెక్షన్స్ మార్క్ అందుకుంది. అదీ కేవలం ఇండియాలో వసూళ్లు మాత్రమే. ఆరో రోజైన ఆగస్టు 16న కూడా సినిమా మంచి కలెక్షన్స్ రాబట్టింది. మొత్తం మీద ఈ సినిమా 260 కోట్లు కలెక్ట్ చేసింది. ప్రజెంట్ నార్త్ ఇండియాలో ఈ సినిమా జోరు చూస్తుంటే... షారుఖ్ ఖాన్ 'పఠాన్' రికార్డులు బ్రేక్ కావడం ఖాయం అని ట్రేడ్ పండితులు అంచనా వేస్తున్నారు. 

హైదరాబాద్ వచ్చిన సన్నీ డియోల్
నార్త్ ఇండియాతో పాటు సౌత్ ఇండియాలోని ప్రధాన నగరాల్లో కూడా 'గదర్ 2'కు మంచి స్పందన లభిస్తోంది. ఈ సందర్భంగా సన్నీ డియోల్ బుధవారం భాగ్య నగరం (Hyderabad) వచ్చారు. ఏఎంబీ సినిమాస్ లో జరిగిన కార్యక్రమంలో పాల్గొన్నారు. అలాగే, టాలీవుడ్ మీడియాతో ముచ్చటించారు. తెలుగు ప్రేక్షకులు తనపై చూపిస్తున్న అభిమానానికి, ఈ చిత్రాన్ని విజయవంతం చేసినందుకు సన్నీ డియోల్ ధన్యవాదాలు తెలియజేశారు. అక్షయ్ కుమార్ 'ఓ మై గాడ్ 2' కంటే ఈ సినిమాకు ఎక్కువ కలెక్షన్స్ వస్తుండటం విశేషం. 

అనిల్ శర్మ దర్శకత్వం వహించిన ఈ సినిమాలో ఉత్కర్ష శర్మ, సిమ్రత్ కౌర్, మనీష్ వాధ్వా, అర్జున్ ద్వివేది  కీలక పాత్రలు పోషించారు. జీ స్టూడియోస్ సమర్పణలో అనిల్ శర్మ, కమల్ ముకుత్ ఈ చిత్రాన్ని నిర్మించారు. 

ముఖ్యమైన, మరిన్ని ఆసక్తికర కథనాల కోసం ‘టెలిగ్రామ్’లో ‘ఏబీపీ దేశం’లో జాయిన్ అవ్వండి.
Join Us on Telegram: https://t.me/abpdesamofficial