Brahmamudi April 6th: కావ్యని పుట్టింటికి తీసుకెళ్తానన్న రాజ్- నడిరోడ్డు మీద స్వప్న, తప్పించుకున్న రాహుల్

కావ్య, రాజ్ కి పెళ్లి కావడంతో సీరియల్ ఇంట్రెస్టింగ్ గా సాగుతోంది. ఈరోజు ఎపిసోడ్లో ఏం జరిగిందంటే..

Image Credit: Disney Plus Hotstar/ Star Maa

కావ్యని రాజ్ ఈడ్చుకొచ్చి ఇంట్లో పడేసి చెడామడా తిడతాడు. ఎందుకు ఈ ఆవేశమని కావ్య ఎదురు ప్రశ్నిస్తుంది. నేను ఏం నేరం చేశానో నిరూపించమని అడుగుతుంది. నేనే సాక్షిని నా కళ్ళే సాక్ష్యమని చెప్తాడు. వీళ్ళ అక్క ఎక్కడ ఉందో తెలుసు కదా నేను వెళ్లకముందే తాను స్వప్నకి చెప్పి తనని తప్పించేసిందని చెప్తాడు.

రాజ్: మీ అక్క అంటే నీకు అసూయ అందుకే తనని తప్పు చేసి నువ్వు తాళి కట్టించుకున్నావ్. తప్పు చేసింది స్వప్న కాదు నువ్వు

కావ్య: ఏం మాట్లాడుతున్నారు అది అమాయకురాలని ఎవరో తప్పు దారి పట్టించారని, దాని జీవితాన్ని కాపాడి బుద్ధి చెప్పాలని అనుకున్నా. ఏ చెల్లి అయినా అక్క జీవితం నాశనం చేయాలని అనుకుంటుందా. నా జీవితాన్ని నేనే ఎందుకు చిన్నాభిన్నం చేసుకుంటాను. దిక్కులేని పక్షిలాగా ఎందుకు స్టోర్ రూమ్ లో ఉంటాను

రాజ్: అదంతా నటన ఎవరూ నమ్మకండి. పెళ్లి నుంచి స్వప్న వెళ్లిపోలేదు తనే తప్పించేసింది. తనని నేను పట్టుకుంటే ఎక్కడ తన గురించి బయటపడుతుందో అని భయపడి తప్పించేసింది

ఇంద్రాదేవి: అక్క కోసం ఆరాటపడుతుంటే తను ఎందుకు తప్పు చేస్తుంది   

రాజ్: అదంతా నటన నేను తీసుకొస్తానని చెప్పాను కదా అయినా హోటల్ కి ఎందుకు వచ్చింది

ఇంట్లో అందరూ కావ్య తప్పు చేసిందని అపార్థం చేసుకుని తలా ఒక మాట అంటారు. నిజంగా ఏ తప్పు చేయలేదని కావ్య చెప్తున్నా కూడా రాజ్ వినిపించుకొడు. ఎందుకొచ్చావని అంటే నేను దుగ్గిరాల ఇంటి కోడలిని మీకు ఆవేశం వస్తే ముందు వెనుకా ఆడపిల్ల అని కూడా చూడరు. ఈ దుగ్గిరాల ఇంటి వారసుడి రోడ్డు ఎక్కి ఆడపిల్లని అవమానిస్తుంటే చూస్తూ ఊరుకుంటారా? మీతో పెళ్లి ఇష్టం లేదని వెళ్లిపోయిందని నిజం బయట వాళ్ళకి తెలిస్తే పోయేది ఎవరు పరువు. అప్పుడు ఎవరి ఇంటికి మచ్చ వస్తుంది. ఎవరు ఒప్పుకున్నా ఒప్పుకోకపోయినా ఇది నా ఇల్లు. ఇది నా వంశం. ఈ వంశ పరువు మర్యాదలు కాపాడాల్సిన బాధ్యత నాకు ఉంది. అందుకే ఆ గొడవ ఆపాలని అక్కడకి వచ్చాను. గొడవ పడటానికి మా అక్క లేదని తెలిసింది. మీకు కంట పడితే ఇలాగే గొడవ చేసి రచ్చ చేసి మాటలు అంటారని తెలిసి తప్పించుకోవాలని అనుకున్నాను. తప్పు చేసింది మీరు మా అక్క చేతిలో దగా పడ్డారు. అందుకు చాలా బాధగా అనిపించింది. దయచేసి నన్ను దోషిని చేయకండి. ఇంతమంది ముందు నన్ను నేల మీదకి తోసేసి అవమానించారు. నన్ను నన్నుగా నాకు దానం చేయండని బాధపడుతుంది.

కృష్ణమూర్తి బొమ్మలకు వేసిన రంగులు బాగోలేవని వచ్చిన అతను అంటాడు. డబ్బులు కూడా తగ్గించి ఇస్తాడు. మీరు వేసిన బొమ్మలకి గిరాకీ తగ్గిపోయిందని తక్కువ డబ్బులు ఇచ్చేసి వెళ్ళిపోతాడు. కనకం ఆవేశంగా స్వప్నని తిట్టుకుంటూ ఇంటికి వస్తుంది. స్వప్న ఎక్కడ ఉందో తెలుసా అని కృష్ణమూర్తి అడుగుతాడు. యాభై వేలు బిల్లు ఎగ్గొట్టి దొడ్డి దారిన పారిపోయిందని మండిపడుతుంది. దీనంతటకి కారణం నువ్వేనని భర్త తిడతాడు. మీరు చేసిన తప్పుకి నా కూతురి అత్తారింట్లో అవమానాలు భరిస్తుందని స్వప్నని తిడతాడు. గుడి దగ్గర మెట్ల మీద కూర్చుంటే పూజారి ప్రసాదం తీసుకొచ్చి ఇస్తాడు. దాన్ని తీసుకుని గబాగబా తినేస్తుంది. రాహుల్ ని ఎలాగైనా ఇక్కడికి రప్పించుకోవాలని అనుకుని కాల్ చేస్తుంది. రాహుల్ ఫోన్ టేబుల్ మీద ఉంటే రాజ్ అటుగా వస్తాడు. తాను వచ్చి తీసుకునే లోపు రాహుల్ వచ్చి ఫోన్ తీసేసుకుంటాడు. నీడలేని ఆడదానిలా ఎంతకాలం రోడ్డు మీద ఉండాలని కోపంగా అడుగుతుంది. రాహుల్ ఎప్పటిలాగానే కావ్య మీద నిందలు వేస్తాడు. తన దగ్గర ఒక్క రూపాయి కూడా లేదని డబ్బులు అడిగేసరికి రాజ్ వస్తున్నాడని అబద్ధం చెప్పి ఫోన్ పెట్టేస్తాడు. స్వప్న ఎలా తప్పించుకుందా అని కావ్య అనుమానపడుతుంది. ఈ ఇంట్లోనే ఎవరో ఇన్ఫర్మేషన్ ఇచ్చి ఉంటారని ఆలోచిస్తూ ఉంటే రాజ్ కోపంగా తన దగ్గరకి వస్తాడు.