Distance Education: టెన్త్‌ పాస్‌ అయినంత మాత్రాన డిగ్రీ చేయడం ఇకపై కుదరదు.. డిస్టెన్స్ ఎడ్యుకేషన్‌లో భారీ మార్పులు

క్వాలిటీ ఎడ్యుకేషన్ పెంచేందుకు యూజీసీ ఉన్నత విద్యలో కీలక మార్పులు చేసింది. డిస్టెన్స్ ఎడ్యుకేషన్‌లో డిగ్రీ చేయాలంటే ఇంటర్‌ తప్పని సరి చేసింది.

డిస్టెన్స్‌ ఎడ్యుకేషన్‌లో మార్పులు

వివిధ కారణాలతో చదువును మధ్యలోనే మానేస్తుంటారు చాలా మంది. తర్వాత చదువు కొనసాగించాలంటే మాత్రం రెగ్యులర్‌గా చదవడం వీలు కాదు. అందుకే అలాంటి వారికి డిస్టెన్స్ ఎడ్యుకేషన్, ఆన్‌లైన్ ఎడ్యుకేషన్ ఓ వరం లాంటిది. పదోతరగతి, ఇంటర్‌ పాసైన వాళ్లంతా పని చేసుకుంటూనే ఎలాంటి అటంకాల్లేకుండా డిగ్రీ పూర్తి చేసుకుంటున్నారు. చాలా మంది ఇలా చదివి ఉన్నతోద్యోగాలు పొందారు. 
ఈ ఆన్‌లైన్, డిస్టెన్స్ ఎడ్యుకేషన్‌ను మరింత సమర్థమంతంగా చేసేందుకు సిద్ధమైంది యూనివర్శిటీ గ్రాంట్స్ కమిషన్(యూజీసీ). ఇప్పటి వరకు ఉన్న నిబంధనలు మార్చేస్తోంది. మరింత కఠినతరం చేస్తోంది. 

ఇప్పటి వరకు పదో తరగతి పాసయి.. 18 ఏళ్లు నిండిన వాళ్లు ఎవరైనా ఎంట్రన్స్‌ టెస్టు ద్వారా డిగ్రీ చేసుకునే ఛాన్స్ ఉంది. ఇప్పుడు ఈ నిబంధన తీసేసింది యూజీసీ. ఇకపై డిగ్రీ చేయాలంటే కచ్చితంగా ఇంటర్‌ పాసయి ఉండాలని చెప్తోంది. ఇది నిజంగా చాలా మందిపై తీవ్ర ప్రభావం చూపనుంది. పదోతరగతి పాసైన చాలా మంది ఇంట్లో ఉన్న పరిస్థితులు కారణంగా ఉద్యోగాల్లో చేరిపోతున్నారు. ఉద్యోగంలో స్థిరత్వం వచ్చాక డిగ్రీ పూర్తి చేస్తున్నారు. తమ ఫీల్డ్‌లోనే ప్రమోషన్లు పొందుతున్నారు. ఇప్పుడు ఈ అవకాశం లేకుండా పోతోంది. ఈ నిబంధన అటు డిస్టెన్స్‌ ఎడ్యుకేషన్‌తోపాటు ఆన్‌లైన్ విద్యకు వర్తిస్తుందని తేల్చి చెప్పింది యూజీసీ 

తెలుగు రాష్ట్రాలు సహా చుట్టు పక్కల రాష్ట్రాల వాళ్లకు అంబేద్కర్‌ యూనివర్శిటీ గొప్ప వరంగా ఉంది. ఏటా ఈ యూనివర్శిటీ ఎంట్రన్స్‌ టెస్టు నిర్వహించి వందల మందిని డిగ్రీ కోర్సులు అందిస్తోంది. ఇకపై అలాంటి పరిస్థితి ఉండకపోవచ్చు. 

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి